მაშინ, როდესაც საქართველოდან ავტომობილების საექსპორტო მიმართულებას ახალი ქვეყნები ემატება და რეექსპორტის კუთხით, ჩვენი ქვეყანა საავტომობილო ჰაბად ყალიბდება, ქვეყანაში ახალი ავტომობილების წარმომადგენლობები გაყიდვების კუთხით 30-40- პროცენტიან კლებას განიცდიან. როგორც კომერსანტს „იბერია ბიზნეს ჯგუფში“ განუცხადეს, პანდემიისა და შეზღუდვების გამო, შესაძლოა გაყიდული ავტომობილების დარეგისტრირებაც პრობლემური გახდეს და ონლაინ ვაჭრობასაც აღარ ჰქონდეს დადებითი ეფექტი.
„იბერია ბიზნეს ჯგუფი საქართველოში წარმოადგენს ისეთ საავტომობილო ბრენდებს, როგორებიცაა აუდი, ვოლკსვაგენი, შკოდა, კია, მიცუბიში. ახალი ავტომობილების ბაზარი მიმდინარე წელს 30 პროცენტით შემცირდა. ბუნებრივია, რომ ეს ჩვენც შეგვეხო - 25 პროცენტიანი კლება გვაქვს, რაც განპირობებულია ძირითადად საცალო ბაზრის შემცირებით. პანდემიამ, რეგულაციებმა და შოურუმების დაკეტვამ საკმაოდ ნეგატიური გავლენა იქონია ბაზარზე. ჯერ ბოლომდე არ ვიცით, შევძლებთ თუ ვერ შევძლებთ გაყიდული მანქანების რეგისტრაციას, თუ ვერც დავარეგისტრირეთ მანქანები, ეს კიდევ 10-15 პროცენტით შეგვიმცირებს გაყიდვებს. გამომიდნარე იქიდან, რომ წლის ბოლოა და დეკემბერი საკმაოდ აქტიური თვეა ავტომობილების გაყიდვების თვალსაზრისით, ველოდით მეტ აქტიურობას. ამ დროს თუ ვერ შევძელით ოპერირება, ეს ნეგატიურად აისახება ჩვენზე. ჩვენთვის ახლა პრიორიტეტი არის თანამშრომლების შენარჩუნება, მაგრამ ეს დამოკიდევბულია მიმდინარე პროცესებზე, მერე კი ალბათ იძულებული ვიქნებით, რომ ჩვენც შემცირება დავგეგმოთ. კლიენტებს ონლაინ პლატფორმას ვთავაზობთ, რათა მათ შეძლონ ავტომობილის დათვალიერება ვიზუალურად, მაგრამ ტრანზაქციისას შეხების წერტილი გვჭირდება - მანქანის გადაფორმება უნდა მოხდეს, ვიზუალურად უნდა ნახოს მომხმარებელმა და ამაზე ჯერ მარეგულირებლისგან არ მიგვიღია პასუხი. ეს თუ აგვეკრძალა, გაყიდვებს ვერ უზრუნველვყოფთ,“ - განმარტავს ავტოჰოლდინგის დირექტორი დავით გოგორიშვილი.
ამასობაში „ჰიუნდაი“ გაყიდვების 90 პროცენტიან ვარდნას განიცდის და წარმომადგენლობა ახალი მოდელების ჩამოყვანასაც ერიდება.
„ძალიან შემცირებულია რეალიზაციაც, მოთხოვნაც. ავტომობილი მაინც ფუფუნების საგნად ითვლება. მოლოდინებიც თუ რამე არ შეიცვალა, არ გვაქვს პოზიტიური. ახლა ერთადერთი რაც გეგმად გვაქვს არის თანამშრომლების შენარჩუნება, სხვა მხრივ, მივყვებით დინებას. 90 პროცენტითაა შემცირებული ახალი ავტომობილების რეალიზაცია. ამ ეტაპზე, მარაგები გვაქვს და ახალი მოდელებიც კი გამოდის, მაგრამ ვერიდებით მათ ჩამოყვანას, ისედაც რეალიზაციის პროცესი მძიმედ მიდის. რთულია რამე პროგნოზების გაკეთება და ამის განწყობაც ნაკლებად არის უკვე,“ - ამბობს Hyundai auto Georgia-ს დირექტორი დავით გიორგობიანი.