7 ოქტომბერს ახალგორში ე.წ. სამხრეთ ოსეთის საზოგადოებრივი პალატის წარმომადგენლები რაიონის მოსახლოებას შეხვდნენ.

საუბრის მთავარი თემა იყო ის, რაც მოსახლეობას ყველაზე მეტად აწუხებს -  უკვე წელიწადზე მეტია, რაც რაიონი გარე სამყაროსგან სრულიად იზოლირებულია. მთელი ამ პერიოდის განმავლობაში ადგილობრივები საქართველოში სამკურნალოდ ვერ მიდიან, ნათესავებს ვერ ნახულობენ და სამსახურებშიც ვერ დადიან.

ვითარება ახალგორში ჰუმანიტარულ კატასტროფას მიუახლოვდა, რამდენიმე ადამიანი უკვე გარდაიცვალა იმის გამო, რომ თბილიში მათი ჰოსპიტალიზაცია ჩაკეტილი საზღვრების გამო ვერ მოხერხდა.

გარდა ამისა, ადამიანებმა შემოსავლის წყარო დაკარგეს, რადგანაც ბევრი ახალგორელი თბილისის მიერ კონტროლირებად ტერიტორიაზე მუშაობდა ან მცირე ბიზნესით იყო დაკავებული  - ეს ყველაფერი დღეს დახურულია.

სამოქალაქო აქტივისტის თამარ მეარაყიშვილის თქმით, ადრე ადგილობრივები ასეთი ტიპის ვიზიტებისადმი დიდ ინტერესს იჩენდნენ, თუმცა ამჯერად  ასე არ არის.

„ახალგორიდან თბილისამდე ორი ნაბიჯია. არასერიოზულია იმის წარმოდგენა, რომ პრეზიდენტმა ბიბილოვმა არაფერი იცის პრობლემაზე, რომელიც თვითონვე შექმნა და აქ დელეგაციას აგზავნის, რათა გაიგოს რა ხდება. ამიტომაც ადგილობრივები ამ ინიციატივას ფორმალობად მიიჩნევენ და ნერვების მოშლა არ სურთ. თუმცა, ნაწილი შეხვედრაზე მაინც მოვიდა“  - ამბობს მეარაყიშვილი.

ცხინვალიდან 8 მაღალჩინოსანი ჩამოვიდა, მათ შორის საზოგადოებრივი პალატის თავჯდომარე სერგეი კუდიევი.

ის მოსახლეობას საყვედურობდა - „თქვენ რა, სამხრეთ ოსეთის მოქალაქეები არა ხართ? რატომ ამბობთ, რომ პრეზიდენტმა თქვენ მძევლებად აგიყვანათ? არ იცით, რომ საზღვარი კორონავირუსის გამოა ჩაკეტილი?“.

თუმცა, კორონავირუსზე გადაბრალება არ გამოდის, რადგანაც საზღვარი 2019 წლის სექტემბერში დაიკეტა, პანდემია კი მარტში დაიწყო.

„საავადმყოფოებშიც კი არ გვიშვებენ. მძევლები ვართ, აბა ვინ?“ - პასუხობდნენ მას ახალგორელები.

ადგილობრივ მოსახლეობას არც დიდი პოლიტიკა აინტერესებთ და არც დაპირებების სჯერათ. მათ ერთადერთი თხოვნა აქვთ, გაიხსნას საზღვარი თბილისის მიერ კონტროლირებად ტერიტორიასთან.

შედეგად ისინი ერთადერთი, უკვე არაერთხელ მოსმენილი პასუხს იღებენ - „ მოვისმინეთ და აწი გადავწყვეტთ“.

მეარაყიშვილის თქმით, დელეგაციის წევრები ცდილობდნენ ადგილობრივების დარწმუნებას, რომ არსებული პრობლემების თაობაზე არაფერი იციან. ისინი ყველაფერს ადგილობრივ, რაიონულ ადმინისტრაციას აბრალებდნენ, თუმცა ახალგორელები ამით არ ტყუვდებიან - მათ კარგად იციან, რომ ახალგორის ჩაკეტვის და საკონცენტრაციო ბანაკად გადაქცევის ინიციატორი თავად ე.წ. სამხრეთ ოსეთის პრეზიდენტი ანატოლი ბიბილოვია.

სწორედ ისაა ერთადერთი ადამიანი, რომელსაც ამ ვითარების გამოსწორება რამდენიმე წუთში შეუძლია, და ამისთვის საზოგადოებრივი პალატა საერთოდ არაა საჭირო.

მოამზადა თენგიზ აბლოთიამ