2021 წელი საავტომობილო ინდუსტრიაში უპრეცედენტო გამოწვევებით იყო სავსე, მათ შორის ყველაზე მეტად მიკროჩიპების დეფიციტით გამოწვეულმა პრობლემებმა კომპანიებს ახალი თავსატეხი გაუჩინა და რიგ შემთხვევებში ქარხნების გაჩერებაც კი მოუწიათ. შედეგად კომპანიების უმეტესობას გაყიდვები შეუმცირდა.
თუმცა მათ შორის იყვნენ ისეთებიც, რომლებმაც შეძლეს დაბალი გაყიდვების პირობებშიც კი მაღალი შემოსავლის მიღება, ეს კი ძვირადღირებულ მოდელებზე წარმოების კონცენტრირებით და შესაბამისად, მათგან მეტი შემოსავლის მიღებით მოხერხდა. საბოლოო ჯამში კი გამოვიდა ისე, რომ წამყვანმა პრემიუმ-კლასის ავტომწარმოებლებმა გლობალურად ნაკლები ავტომობილი გაყიდეს, თუმცა წინა წელთან შედარებით შემოსავლები მაინც გაეზარდათ.
Aston Martin, BMW Group, Daimler, Ferrari, Ford, Geely Group, General Motors, Honda, Hyundai Motor Group, Isuzu, Mazda, Renault-Nissan, Stellantis, Subaru, Suzuki, Tata Group, Tesla, Toyota, და Volkswagen Group-ის შემოსავლებმა 2021 წელს 1,89 ტრილიონი დოლარი შეადგინა, რაც 13%-იანი ზრდაა 2020 წელთან შედარებით, თუმცა 6%-ით ნაკლებია პანდემიამდელ 2019 წელთან შედარებით. საინტერესოა, რომ ამ პროცენტებს არ ემთხვევა გაყიდვების მაჩვენებელი, ვინაიდან ამ კომპანიებმა 2021 წელს 69,54 მილიონი ავტომობილი გაყიდეს, რაც 2%-ით მეტია 2020 წელთან შედარებით და 14%-ით ნაკლები 2019 წელთან შედარებით. ეს კი ნიშნავს, რომ კომპანიებმა ან ფასები გაზარდეს პროდუქტზე ან ფასდაკლებებისგან თავი შეიკავეს.
შედეგად, 2021 წელს კომპანიებმა თითო გაყიდული ავტომობილიდან საშუალოდ 27,270 დოლარის შემოსავალი მიიღეს, რაც 11%-ით მეტია 2020 წელთან შედარებით და 10%-ით მეტი 2019 წელთან შედარებით. სხვა სიტყვებით რომ ვთქვათ მიღებული ყოველი 100 დოლარის შემოსავლიდან კომპანიებს სუფთა მოგებაში რჩებოდათ 7,60 დოლარი. შედარებისთვის, 2020 წელს ეს ციფრი - 3,60 დოლარი, ხოლო 2019 წელს - 5,10 დოლარი იყო.
რაც შეეხება თითო გაყიდული ავტომობილიდან მიღებულ ყველაზე დიდ სუფთა მოგებას, ასეთებს შორის კვლავ ლიდერი იყო Ferrari. რომლის ოპერაციული მარჟინალობა 21.4%-დან 25.5%-მდე გაიზარდა. ოფიციალური მონაცემებით კი, გამოდის, რომ კომპანიამ თითო გაყიდული მოდელიდან მიიღო 106,078 დოლარის სუფთა მოგება.
წყარო: "ბიზნესპრესნიუსი"