პანდემია, რომელმაც მიმდინარე წელს მსოფლიო დააზარალა, საქართველოშიც ეკონომიკის ყველა სექტორს შეეხო, მათ შორის,საავტომობილო ბაზარს. როგორც სექტორის წარმომადგენლები განმარტავენ, ავტომობილი პირველადი გამოყენების საგნებში არ შედის და მისი შეძენა ბევრისთვის პრიორიტეტი არ არის.
საქართველოში რენოს ოფიციალური წარმომადგენლობის „ფრანს ავტოს“ გაყიდვებისა და ლოგისტიკის ხელმძღვანელი თამარ მეტრეველი “კომერსანტთან“ საუბარში აცხადებს, რომ ბოლო 2 თვის განმავლობაში კომპანია არ ფუნქციონირებდა, აღნიშნულ პერიოდში მიღებული ზარალი კი საკმაოდ დიდია.
„ორი კვირაა აღვადგინეთ მუშაობა. ეს პერიოდი კომპანიისთვის ძალიან მძიმე გამოდგა. ვერ ვახდენდით რეგისტრაციებს, მცირე შეკვეთები გვქონდა მაგრამ ეს არის მინინმუმი იმასთან შედარებით, როგორც ვმუშაობდით. როდესაც პირველი ეტაპი დაიწყო და ობიექტებმა ფუნქციონირება დაიწყეს, შევძელით რამდენიმე მანქანის გაფორმება. კომპანიის სერვისი, სახელმწიფო სტრუქტურებს ემსახურებოდა, სხვა ყველაფერი გაჩერებული იყო და დღეის მდგომარეობით, საკმაოდ დიდ ზარალზე ვართ.“,-განაცხადა თამარ მეტრეველმა.
„ფრანს ავტოს“ წარმომადგენლებს, მუშაობის განახლების დროს განსხვავებული სურათი დახვდათ. როგორც გაყიდვებისა და ლოგისტიკის ხელმძღვანელი აცხადებს, ბაზრის არასტაბილური მდგომარეობისა და გლობალური პრობლემის გამო კომპანია გაყიდვების იმ მცირე მაჩვენებელსაც არ ელოდა რაც ორი კვირის განმავლობაში მიიღო.
„ადგილზე მოსულებს სრულიად გაყინული მდგომარეობა და უძრავი ბაზარი დაგვხვდა. ქვეყანაში რა მდგომარეობაცაა ანალოგიურია ყველა სფეროში. გახსნის დღიდან დღემდე უმნიშვნელო ძვრები დაიწყო, თუმცა, შექმნილი ვითარებიდან გამომდინარე ამასაც არ მოველოდით.მიუხედავად იმისა, რომ ანტიკრიზისული გეგმა არ გვქონია და დღესაც არ გვაქვს, მაინც შევძელით თანამშრომლების შენარჩუნება. ამ პერიოდში ხელფასსაც დათქმულ დროს გავცემთ.“-აღნიშნა მეტრეველმა და იმ ფაქტსაც გაუსვა ხაზი, რომ ბიზნესი მხოლოდ გარემოპირობებზეა დამოკიდებული.
„რადგან ავტომობილი არ არის პირველადი მოხმარების, ამიტომ გარეფაქტორებზე და სხვა ბიზნესის მუშაობაზე ვართ დამოკიდებული. უმრავლესობა დიდი დარტყმის ქვეშაა და პროპორციულად ასახულია ჩვენზეც. ამ დროს კი მოლოდინი ნეიტრალური გვაქვს, არც პესიმისტურად ვუყურებთ საკითხს, თუმცა განვლილი 2 თვე და დღევანდელი მდგომარეობა არ გვაძლევს საბაბს 100%-ით ოპტიმისტები ვიყოთ. ბაზრის დასტაბილურებას ველოდებით, ამ დროს კი მეორე ეტაპი არ უნდა დაგვატყდეს თავს. თუ ამას გადავლახავთ ბიზნესიც ჩვეულ რიტმს დაუბრუნდება“,- განაცხადა თამარ მეტრეველმა.
ნათია ლომიძე