რეექსპორტი დღითიდღე იზრდება და საზღვრების გახსნის შემდეგ, ვვარაუდობთ, რომ შეიძლება საკმარისი ავტომობილებიც არ ჰყავდეს ბაზარს. სომხეთი, აზერბაიჯანი, ყირგიზეთი, რუსეთი, უკრაინა - ამ ქვეყნებში ავტომობილების მიმართულებით შიმშილია და შეიძლება რეალიზაცია იმაზე მეტი იყოს ვიდრე პანდემიამდე  და ერთიანად დაიძრან, — ასე აფასებს კავკასიის ავტოიმპორტის დირექტორი გიორგი სურგულაძე პანდემიის პირობებში ავტომობილების ბაზარზე რეალიზაციის დინამიკასა და სამომავლო პროგნოზებს.

როგორც სურგულაძე განმარტავს, საქართველოში შემოყვანილი ავტომობილების 60 პროცენტი მუდმივად საზღვარგარეთ გადიოდა. პანდემიამ და საზღვრების ჩაკეტვამ პროცესები შეაფერხა, თუმცა დილერები ონლაინ— ვაჭრობის მიმართულებით გააქტიურდნენ. რუსეთს, უკრაინას, ყირგიზეთს, აზერბაიჯანსა და სომხეთს ამ მიმართულებით უზბეკეთიც შემოუერთდა და დიდ როლს თამაშობს რეექსპორტის ბაზარზე. 

ექსპორტის რაოდენობა რა თქმა უნდა შეიზღუდა, რადგან საზღვრები ჩაკეტილია, თუმცა მეზობელმა ქვეყნებმა, სადაც მსგავსი რამ ხდება, ონლაინ ვაჭრობა დაიწყეს და ექსპორტი დღითიდღე იმატებს. ძველ ნიშნულს მაინც ვერ უბრუნდება, მაგრამ ამ მიმართულებით კვირიდან კვირამდე მატება იგრძნობა, რაც ძალიან კარგია. ცხადია, ბრუნვამ დაიწია, მაგრამ პრობლემის შემქმნელს და აპოკალიფსურს ვერ დავარქმევდი, რადგან ფუჭებადი საქონელი არ არის.

ჩვენ ბაზარზეც, რეალიზაცია რა თქმა უნდა პროცენტულად შემცირებულია, მაგრამ 15-20 %-ით, მეტად არა, — განმარტავს გიორგი სურგულაძე. 

რაც შეეხება ავტომობილების ფასებს, ზოგ ქვეყანაში დეფიციტის გამო, ღირებულება გაზრდილი ან სტაბილურად ძველ ნიშნულზეა შენარჩუნებული. 

მანქანებზე ფასები გაზრდილია, არ გაიაფებულია, რადგან იმ ქვეყნებში სადაც რეექსპორტი ასე ონლაინ და მაინც შეზღუდული სახით არის, იქ ავტომობილებზე დეფიციტი გაჩნდა და ფასები სტაბილურად იგივე ან უფრო მაღალია.

აზერბაიჯანი და უკრაინა უფრო მაღალ საფასო სეგმენტზეა ორიენტირებული, ეს არის 15000 დოლარი და ზევით ავტომობილები.  საქართველოში აქცენტი პრიუსებზე და ამ ფასის ავტომობილებზეა, ხოლო სომხეთი  უფრო  დაბალი კატეგორიის ავტომობილების მომხმარებლებში გადის, — აღნიშნა სურგულაძემ.

მარიამ მორგოშია