საზოგადოებრივი ტრანსპორტი მობილური ამცრელი კაბინეტის ფუნქციას, უკვე რამდენიმე დღეა ითავსებს. ამ ეტაპზე ავტობუსის 3 ლოკაციაა: მეტროსადგურების - ,,ახმეტელის“, ,,ვარკეთილის“ და ,,ვაგზლის მოედნის“ ტერიტორიების მიმდებარედ. წესით, განსაზღვრულია ავტობუსების მოძრაობის გრაფიკი და ლოკაციებიც თითო უბანში, მინიმუმ, სამია, თუმცა აცრის მსურველებს სხვადასხვა მისამართზე ყოველდღიურად უშედეგოდ უწევთ ლოდინი, რის გამოც მოსახლეობაში დიდი დაბნეულობაა. იმ ფონზე, როცა მთავრობა იმუნიზაციის პროცესის გააქტიურებაზე საუბრობს, ამ სერვისის მიწოდების ხარისხი ვერანაირ კრიტიკას ვერ უძლებს.

ერთი ლოკაციაზე, გლდანში, ხიზანიშვილის ქუჩაზე ასაცრელად მისული ხალხი ამ დღეების განმავლობაში უშედეგოდ ელის მოძრავი კაბინეტის გამოჩენას. მათი უმეტესობა მოხუცები არიან. მიუხედავად იმისა, რომ ეს მოქალაქეები სისტემატურად უკავშირდებიან ,,ცხელ ხაზს“, რეალურად არასწორ ინფორმაციას იღებენ, რის გამოც ბევრი ადამიანი ვერ ახერხებს იმუნიზაციის პროცესში ჩართვას. მოქალაქეები ,,კომერსანტთან“ საუბარში აცხადებენ, რომ მომსახურება ვერ მიიღეს.

,,ცხელ ხაზზე მითხრეს, რომ ავტობუსს 11 საათიდან 2 საათამდე უნდა დავლოდებოდით ხიზანიშვილის ქუჩაზე, მაგრამ მოძრავი აცრის პუნქტი საერთოდ არ გამოჩენილა. მცხუნვარე მზის ქვეშ ველოდით 11-დან 3 საათამდე, მანამდე სახლში ვითხოვე სერვისის მიღება, რადგან 86 წლის მოხუცი ვარ, ავადმყოფი და ვერ მოვახერხებდი მეტრომდე ჩასვლას. თუმცა მითხრეს, რომ ვერ გამიწევდნენ ადგილზე მომსახურებას, რადგან არ ვარ ,,ჩაწოლილი“. ტაქსის ფული კი არა, წამლის ყიდვის საშუალება არ მაქვს. მთელი ნახევარი კილომეტრი ტყუილად ვიარე, ავტობუსი არ გამოჩენილა. დღის ბოლოს ითქვა, რომ ,,ფაიზერი“ არ ჰქონდათ და ამიტომ ვერ მოვიდნენ, არ ვიცი რამდენად მართალია, ფაქტია, რომ აცრა ვერ გავიკეთე, საერთოდ ჩავიქნიე ხელი“, - მოუთხრობს „კომერსანტს“ 86 წლის მოხუცი ლეილა ცირეკიძე.

გლდანში ვერც 78 წლის ციალა გახოკიძე აიცრა. მისი თქმით, ასაცრელ პუნქტამდე მისვლას ვერ ახერხებს, ადგილზე კი არავინ მოდის, ამიტომ მოძრავი ასაცრელი პუნქტის სერვისით ვერ ისარგებლა.

,,თავიდან არასწორად გავრცელდა ინფორმაცია. ახლაც რომ დარეკოთ ცხელ ხაზზე, გიპასუხებენ, რომ ხიზანიშვილის ქუჩაზე 2 საათამდე შეგვიძლია აცრა, მაგრამ ავტობუსი საერთოდ არ გამოჩენილა. დავიღალე ლოდინით, მერვე მიკრორაიონიდან ფეხით მეტრომდე ჩასვლა ბევრ ახალგაზრდას არ შეუძლია, მით უმეტეს, მოხუცები ამ გზას ვერ გავივლით. თან, სახლშიც ხომ უნდა დავბრუნდე უვნებელი, როგორი სურვილიც არ უნდა მქონდეს, საშუალება არ მაქვს, რომ აცრის პუნქტამდე მივაღწიო, რატომ გვატყუებენ, არ მესმის, ცხელ ხაზზე ისიც კი მითხრეს, საცობის გამო ვერ მოდიანო. მათაც კი არ აქვთ ინფორმაცია, სრული ქაოსია“, - ამბობს ციალა გახოკიძე.

ჯანდაცვის სამინისტროს მიერ გავრცელებული ინფორმაციის საფუძველზე კი მოძრავი აცრის პუნქტებში მოქალაქეები წინასწარი რეგისტრაციის გარეშე, ფაიზერის და სინოვაკის ვაქცინით იცრებიან. მათ ჯანმრთელობის მდგომარეობას კი რესპუბლიკური საავადმყოფოს ექიმები აკვირდებიან.

ავტობუსში განთავსებულია ყველა საჭირო სამედიცინო აღჭურვილობა, რაც აცრილების პირველადი დახმარებისთვის შეიძლება გახდეს საჭირო.

ფაქტია, რომ საქართველოში იმუნიზაციის პროცესს გაცილებით მეტი ეფექტი ექნებოდა, რომ ვაქცინაციის მოძრავი პუნქტები უფრო ეფექტურად მუშაობდნენ. პრობლემა ნამდვილად არის და გამოსწორებას საჭიროებს, ელემენტარულ დონეზე მაინც, რათა მოქალაქეები უფრო სწორად იყვნენ ინფორმირებული.

შეგახსენებთ, რომ ბოლო 24 საათში საქართველოში კორონავირუსის საწინააღმდეგო ვაქცინა 17 670-მა მოქალაქემ გაიკეთა.

სულ ქვეყანაში კოვიდსაწინააღმდეგო ვაქცინებით აცრილია 1 164 402 ადამიანი.

ცნობისთვის, ბოლო 24 საათში, ქვეყანაში კოვიდინფიცირების 1 915 ახალი შემთხვევა დაფიქსირდა. გარდაიცვალა 78 ინფიცირებული, სულ საქართველოში ვირუსმა 7 329 ადამიანი იმსხვერპლა.

მარი ჩიტაია