Holiday Inn Express-ი დედაქალაქის ისტორიულ ნაწილში, ავლაბარში 2022 წელს გაიხსნება. სამშენებლო ფართობი 7 903 კვ.მ-ს მოიცავს. 

სასტუმროს მშენებლობას „ელემენტ კონსტრაქშენი“ შპს „იპოცენტრისა“ და შპს „სიმეტრიას“ დაკვეთით ახორციელებს.  სასტუმრო ავლაბარში, ტურისტებისთვის აქტიურ ზონაში განთავსდება და მომხმარებლებს 121 ნომერს შესთავაზებს.  ვიზიტორებისთვის გათვალისწინებულია ფართო საკონფერენციო დარბაზი და გამწვანებული შიდა ეზო. 6 სართულის გარდა, ობიექტი ერთ მიწისქვეშა სართულსაც მოიცავს.

გასულ წელს  „კომერსანტს“ პროექტის დეველოპერ კომპანია „სიმეტრიაში“  განუცხადეს,  რომ პროექტის ინვესტორი ქართულ - ყაზახური კომპანია „შპს იპოცენტრია“. სასტუმროს მშენებლობაში კი 10 მლნ დოლარზე მეტი დაიხარჯება.

„კონცეფცია მდგომარეობს იმაში, რომ სასტუმროს საზოგადოებრივი თავშეყრის ადგილები მაქსიმალურად კომფორტული იყოს. სამუშაო სივრცე, ლობი ყველაფერი არის ერთ სივრცეში გაერთიანებული. გამოყენებული გვაქვს პირობითი ტიხრები, მსუბუქი შემინვით. სასტუმროს აქვს ატრიუმის ტიპის შიდა ეზო. მაქსიმალურად ვეცადეთ, რომ თბილისურ-იტალიური ეზოს კონცეფცია შეგვემუშავებინა, ამიტომ აივნებს ხის ეფექტი ექნება“- განმარტა კომპანიის წარმომდგენელმა. 

Holiday Inn Express მსოფლიოს ერთ-ერთი უდიდესი სასტუმროების ქსელის „ინტერკონტინენტალის“ ბრენდია.

პროექტის განმახორციელებელ სამშენებლო კომპანია „ელემენტ ქონსთრაქშენს“ ეკუთვნის ასევე თემურ ჭყონიას „კოკა-კოლას“ ახალი ქარხნის პროექტი და „ბილტმორის“  სასტუმრო. 

მარიამ მორგოშია