ავიაციის სფეროში შეზღუდვები უმეტესწილად მოხსნილია, მაგრამ პრობლემა მაინც ვერ მოგვარდა. ავიაექსპერტი იასე ზაუტაშვილი მთავარ დაბრკოლებად სახელმწიფოს პოლიტიკას მიიჩნევს. მისი თქმით, პანდემიისას ქართული კომპანიები ფაქტობრივად გაკოტრდნენ და მათი მდგომარეობა ჯერჯერობით უიმედოა.
ზაუტაშვილის თქმით, გამოსავალი შეიძლება ვერც მოიძებნოს, სანამ ტურისტული ნაკადები არ გაიზრდება და ქართული კომპანიების განვითარების ხელშემწყობი ნაბიჯები არ გადაიდგმება.
,,კორონავირუსმა დიდი დარტყმა მიაყენა დარგს, საჰაერო სივრცე დიდწილად გამოუყენებელი დარჩა. ცოტა ხნის წინ გამოქვეყნდა სტატისტიკა, რამაც აჩვენა, თუ როგორია ჩვენი საჰაერო სივრცის დატვირთულობა. 40%-იანი სხვაობაა პანდემიამდელ წელთან შედარებით, რაც დიდი პრობლემაა. დარგის პერსპექტივა და განვითარების შესაძლებლობა დამოკიდებულია ტურისტული ნაკადების შემოსვლის მაჩვენებლებზე, რაც ჯერჯერობით დაბალია. ცალკე საკითხია უცხოური კომპანიების დომინანტი როლი ქართულ ავიაციაში. ერთ-ერთი მთავარი პრობლემაც ეს არის, სანამ ეროვნული კომპანია არ გვეყოლება, სარგებელს ქვეყანა ვერ იგრძნობს. საქართველოში ოპერირებით ისინი დიდ შემოსავალს იღებენ, მდიდრდებიან, მაგრამ არანაირი სარგებელი ამისგან ბიუჯეტს არ აქვს, სანამ ეს მიდგომა არ შეიცვლება, დარგს არაფერი ეშველება“, - ამბობს ,,კომერსანტთან“ იასე ზაუტაშვილი.
რაც შეეხება ქართული ავიაციის პერსპექტივას, ექსპერტის ვარაუდით, წლის ბოლომდე შეიძლება სიტუაცია გამოსწორდეს, ხოლო 2024 წლისთვის დარგმა პანდემიამდელი მდგომარეობა დაიბრუნოს, რაც სწორ და თანმიმდევრულ პოლიტიკას მოითხოვს.
,,იმუნიზაციაში მიღწეულ გლობალურ შედეგზეა ავიაცია დამოკიდებული ნებისმიერ ქვეყანაში, მათ შორის საქართველოშიც. მიმოსვლა ქვეყნებს შორის უნდა იყოს უსაფრთხო, ამიტომ რაც შეიძლება ბევრი ადამიანი უნდა აიცრას, ამის გარეშე მგზავრების ზრდა წარმოუდგენელია. მნიშვნელოვანია, რომ ადამიანებმა შეძლონ ფრენების დაგეგმვა, მშვიდად დაჯავშნონ ბილეთები და იმოგზაურონ. წლის ბოლომდე შეიძლება მდგომარეობა მცირედით გამოსწორდეს, მაგრამ 2024 წლამდე დიდ ცვლილებას არ ველი, დაახლოებით 2-3 წელია საჭირო, რომ დარგმა დაკარგული პოზიციები აღიდგინოს“, - დასძენს ზაუტაშვილი ,,კომერსანტთან“.
ოფიციალური მონაცემით, 2021 წელს საქართველოს საჰაერო სივრცე 87 314-ჯერ გამოიყენეს. 2020 წელთან შედარებით საჰაერო გადაფრენების რაოდენობა 31%-ით არის გაზრდილი, თუმცა 2019 წელთან შედარებით საქართველოს საჰაერო სივრცეში გადაფრენა თითქმის 40%-ით არის შემცირებული.
მარი ჩიტაია