საქართველოს ფარმაცევტული ბაზრის ერთ-ერთმა უმსხვილესმა მოთამაშემ შპს „ავერსი ფარმას“ 2019 წლის კონსოლიდირებული ფინანსური ანგარიშგებები გამოაქვეყნა, რომლის მიხედვითაც კომპანიის საოპერაციო წლის მოგება 77%-ით შემცირდა.
2019 წლის მონაცემებით, შპს „ავერსი ფარმას“ საოპერაციო წლის მოგებამ 3,170,283 ლარი შეადგინა, ხოლო 2018 წლის მაჩვენებელი 13,749,931 ლარს შეადგენდა.
აღსანიშნავია, რომ 2019 წელს კომპანიის აქტივები გაიზარდა და სულ 333,747,468 ლარი შეადგინა, ხოლო 2018 წელს ეს მაჩვენებელი 292,139,233 ლარი იყო.
ანგარიშგების მიხედვით, 2019 წელს კომპანიის ფინანსური კოეფიციენტები 2018 წელთან შედარებით გაუარესდა. რაც ძირითადად გამოწვეულია ლარის ოფიციალური გაცვლითი კურსის გაუფასურებით დოლარისა და ევროსთან მიმართებით.
„ვინაიდან, უდიდესი ნაწილი რომელიც ჩვენს სააფთიაქო ქსელში იყიდება არის იმპორტირებული, ხოლო რეალიზაციის დიდი ნაწილი არის ეროვნულ ვალუტაში, მნიშვნელოვან რისკს მიეკუთვნება სავალუტე რისკი, რადგან არასტაბილური კურსის პირობებში მაღალია ალბათობა, რომ ანგარიშსწორებისას გართულდეს მომწოდებელთან შესაბამისი ვალუტის გადარიცხვა. COVID-19 ვირუსის გავრცელებით გამოწვეული რისკები, რამაც შესაძლოა მნიშნელოვანი გავლენ მოახდინოს კომპანიის ამონაგებზე, სავაჭრო მოთხოვნების გაუფასურებაზე და ასევე მარაგებისა და გრძელვადიანი აქტივების გაუფასურების ზრდაზე“, - აღნიშნულია ანგარიშგებაში.
შპს „ავერსი-ფარმა“ წარმოადგენს შეზღუდული პასუხისმგებლობის საზოგადოებას, რომელიც დაარსდა 1999 წლის 14 მაისს საქართველოს კანონმდებლობის შესაბამისად. კომპანიის ძირითადი საქმიანობა არის ფარმაცევტული და პირადი ჰიგიენის პროდუქტების საცალო და საბითუმო ვაჭრობა. 2019 და 2018 წლის 31 დეკემბრის მდგომარეობით კომპანიის 67% და 33% ფლობდნენ პაატა კურტანიძე და ნიკოლოზ კურტანიძე. „ავერსის“ საქმიანობა 2019 წლის მონაცემებით ხორციელდებოდა 268 აფთიაქით.
ნინო თამაზაშვილი