იტალიური ავეჯის სახლი „ვერონა“ პანდემიის მიუხედავად აღმაშენებლის ხეივანში ახალ მაღაზიას ხსნის და წელს გაყიდვების მინიმუმ გაორმაგებას გეგმავს. როგორც „კომერსანტს“ ავეჯის სახლი „ვერონას“ ერთ-ერთმა დამფუძნებელმა არჩილ მგალობლიშვილმა განუცხადა, ახალ 9000 კვ.მ. ფართის შენობაში ბევრად დიდი ასორტიმენტი იქნება წარმოდგენილი.

„პანდემიის მიუხედავად, ვიზრდებით, ახალ შენობაში გადავდივართ და დიდი მოლოდინი გვაქვს, რომ გაყიდვებს მინიმუმ გავაორმაგებთ. ზოგადად ადგილიდან ავეჯს არ ვყიდით, ძირითადად შეკვეთებზე ვმუშაობთ, მაგრამ მხოლოდ ახლა, გადასვლის გამო, გადავწყვიტეთ რომ ძველი კოლექცია ახალ მაღაზიაში არ გადაგვეტანა და  40%-იანი ფასდაკლება დავიწყეთ. ახალი მაღაზია სავარაუდოდ 10 დღეში გაიხსნება, რომელიც ჩვენი აშენებული შენობაა და არქიტექტურულად ძალიან საინტერესო პროექტია. ახალი შენობა აღმაშენებლის 51 ნომერში განთავსდება, რომელიც ჯამში 9000 კვ.მ. ფართს მოიცავს და თბილისში ერთ-ერთი გამორჩეული არქიტექტურული ნაგებობა იქნება. ახალ ადგილას ასორტიმენტიც ბევრად დიდი გვექნება ვიდრე ახლა არის. ელეგანტური და კლასიკური, ტენდენციური და მოდური, თანამედროვე და მინიმალისტური გავაერთიანეთ მარტივად და შევქმენით უნიკალური სავაჭრო ცენტრი, სადაც ივლისიდან თვიდან მომხმარებლებს მიიღებს სრულიად ახალი ავეჯის სახლი “ვერონა“, - განაცხადა არჩილ მგალობლიშვილმა.

ავეჯის სახლი „ვერონა“  ბაზარზე  2013 წელს გამოჩნდა. ავეჯის სფეროში თხუთმეტწლიანი გამოცდილების მქონე პროფესიონალებმა გადაწყვიტეს დაეარსებინათ ავეჯის სახლი, სადაც ქართველი მომხმარებლებისთვის ერთ სივრცეში იქნებოდა თავმოყრილი ყველა ის პრემიუმ კლასის იტალიური ავეჯი, რაც საჭიროა სახლის, ოფისისა თუ სასტუმროს მოსაწყობად.

ნინო თამაზაშვილი