ქვეყანა მეათე მოწვევის პარლამენტს ირჩევს - საკანონმდებლო ორგანო სულ მალე ახალი შემადგენლობით გააგრძელებს საქმიანობას. რომელი სექტორები საჭიროებს რეფორმებს და როგორ უნდა დაკომპლექტდეს ახალი პარლამენტი ? – „კომერსანტი“ საქართველოს ტურიზმის ადმინისტრაციის ყოფილ ხელმძღვანელს, მაია სიდამონიძეს ახალ პარლამენტთან და მინისტრთა კაბინეტთან დაკავშირებულ მოლოდინებზე ესაუბრა. მაია სიდამონიძის თქმით, არსებულ მინისტრთა კაბინეტში კომპეტენტური და განათლებული კადრების ნაკლებობაა.
„არ ჩანს უწყება,რომელიც წარმატებულად უძღვება თავის საქმეს. ვფიქრობ, რომ საჭიროა კომპეტენტური, განათლებული ახალგაზრდა მინისტრთა კაბინეტი, რომელიც დაკომპლექტებული იქნება რეფორმატორთა ჯგუფით და მიხედავს ჩაძირულ ეკონომიკასა და გაკოტრებულ ბიზნესს. ჩასატარებელია მნიშვნელოვანი რეფორმები აბსოლუტურად ყველა დარგში. ახალმა მინისტრთა კაბინეტმა უნდა იზრუნოს განათლების სექტორზეც, ვინაიდან დღევანდელი გარემო და არსებული სიტუაცია, სწორედ განათლების სისტემაში არსებულ ხარვეზებთან არის დაკავშირებული. მე ვერ ვხედავ რომელიმე უწყება თავის საქმეს წარმატებით უძღვებოდეს “- აცხადებს მაია სიდამონიძე.
არჩევნების შემდეგ მნიშვნელოვან გასატარებელ რეფორმებს შორის მაია სიდამონიძე ტურიზმის რეფორმასაც ასახელებს. მისი თქმით, დასახვეწია ტურიზმის კანონმდებლობა და მომსახურების სფერო.
„ვინაიდან ეპიდემიოლოგიური სიტუაცია მსოფლიოში მძიმეა და მიმდინარე და მომავალ წელს არ არის დაგეგმილი ინტენსიური ტურისტული მიმოსვლები, შეგვიძლია ვიფიქროთ ბევრი პრობლემის და არსებული ქაოტური მდგომარეობის მოწესრიგებაზე. აუცილებელია დავპოზიციონირდეთ ახლებურად, როგორც უსაფრთხო, სამოგზაურო ქვეყანა. ამისთვის კი მნიშვნელოვანი იქნება ეპიდსიტუაციის სწორი მართვა. ჩვენნაირ ქვეყანას,რომელსაც დანგრეული ეკონომიკა აქვს და ბევრ განვითარებულ ქვეყანას ჩამორჩება, დრო არ აქვს დასაკარგი. უნდა ვიყოთ რეფორმატორები, როგორც აქამდე ვიყავით. ჩვენ რეფორმებს რეგიონის ქვეყნები სწავლობდნენ, დღეს უკვე აღარ არის ასე. ამიტომ, ვფიქრობ, რომ რეფორმების ხაზი უნდა გავაგრძელოთ. ინტენსიური მუშაობა უნდა მიმდინარეობდეს ეკონომიკის აღორძინებაზე და უმუშევრობის პრობლემა, რაც დღეს გვაქვს, უნდა გადაწყდეს. ამას კი შეძლებს გუნდი,რომელიც იქნება მოტივირებული, ენერგიული და განათლებული. ვფიქრობ, რომ ასაკობრივი თვალსაზრისითაც ახალი სისხლია საჭირო,“- აღნიშნავს მაია სიდამონიძე.
ბაჩო ადამია