5 ივლისს ათობით სახელმწიფომ იკისრა ვალდებულება, დახმარება გაუწიოს უკრაინას მოსალოდნელი ხანგრძლივი და ძვირადღირებული აღდგენითი პროცესის დროს. ამასთან, მათ განაცხადეს, რომ საჭიროა ფართო მასშტაბის რეფორმების გატარება გამჭვირვალობის ხელშესაწყობად და კორუფციასთან გასამკლავებლად.
ეს გადაწყვეტილებები მიღებულ იქნა შვეიცარიის ქალაქ ლუგანოში, სადაც დღეს დასრულდა უკრაინის აღდგენისადმი მიძღვნილი ორდღიანი კონფერენცია. კონფერენციის დასრულების შემდეგ 40-მდე ქვეყნის ლიდერებმა ხელი მოაწერეს „ლუგანოს დეკლარაციას“, რომელიც შეიცავს უკრაინის აღდგენის პრინციპებს. ხელმომწერებმა, რომელთა შორის არიან შეერთებული შტატები, დიდი ბრიტანეთი, საფრანგეთი და იაპონია, „უმკაცრესად“ დაგმეს უკრაინის წინააღმდეგ რუსეთის აგრესია და მოსკოვს მოუწოდეს დაუყოვნებლივ გაიყვანოს თავისი ჯარები.
შვეიცარიის პრეზიდენტმა ინიაციო კასისმა, რომელიც უკრაინის შესახებ კონფერენციის ერთ-ერთი მასპინძელი იყო, მაღალი შეფასება მისცა დეკლარაციას და მას უწოდა „საკვანძო მნიშვნელობის პირველი ნაბიჯი უკრაინის აღდგენის გრძელ გზაზე.“
ხელმომწერები მიესალმნენ ნაკისრ ვალდებულებებს, პოლიტიკურად, ფინანსურად და ტექნიკურად დაეხმარონ უკრაინას და მიიღეს „ლუგანოს პრინციპები“ - აღდგენითი პროცესის გზამკვლევი. კიევმა განაცხადა, რომ ომით დანგრეული უკრაინის აღდგენა 750 მილიარდ დოლარამდე დაჯდება.
უკრაინის პრემიერ-მინისტრმა დენის შმიჰალმა 5 ივლისს თქვა, რომ დეკლარაცია „ჭეშმარიტად არის დასაწყისში ჩვენი გრძელვადიანი“ პროცესისა.