პენტაგონი აცხადებს, რომ აშშ უკრაინას 2,2 მილიარდ დოლარამდე ოდენობის სამხედრო დახმარების ახალ პაკეტს გამოუყოფს.
პაკეტში შედის მაღალი სიზუსტის რაკეტები და HAWK საზენიტო-სარაკეტო სისტემები, ასევე სხვა საბრძოლო მასალა და იარაღი. ამის შესახებ Reuters პენტაგონის განცხადებაზე დაყრდნობით წერს.
აშშ უკრაინაში ასევე გააგზავნის შორ მანძილზე მოქმედ სარაკეტო სისტემა GLSDB-ს, რომელთა მოქმედების რადიუსი 150 კილომეტრზე მეტია. სხვა დეტალები იმის შესახებ, თუ რა შედის 2,2 მილიარდი დოლარის დახმარების პაკეტში, მოცემული არ არის.
„ჯამში, აშშ-მა 2014 წლიდან უკრაინას უსაფრთხოების დახმარების სახით 32 მლრდ დოლარი გამოუყო, მათ შორის 29,3 მლრდ დოლარი რუსეთის არაპროვოცირებული და უკანონო ინტერვენციის შემდეგ. დღეს გამოცხადებული დახმარება მოიცავს კრიტიკულად მნიშვნელოვან საჰაერო თავდაცვის საშუალებებს, რაც დაეხმარება უკრაინას, დაიცვას თავისი ხალხი, ასევე ჯავშანტრანსპორტიორებს და სხვა ტექნიკას, რომელსაც უკრაინა ასე ეფექტიანად იყენებს, მათ შორის „ჯაველინებს“, ტანკსაწინააღმდეგო რაკეტებს, არტილერიას, აღჭურვილობასა და კონვენციურ და შორ მანძილზე მოქმედ რაკეტებს“, – განაცხადა პენტაგონის პრესსპიკერმა პატრიკ რაიდერმა.