აშშ-ს ხელისუფლებამ არასაიმიგრაციო სამუშაო ვიზების გაცემის წესები გაამკაცრა. ეს პირველ რიგში H-1B-ს ტიპის ვიზებს ეხება, რომლებიც მაღალი კვალიფიკაციის მუშებისთვისაა გათვალისწინებული.

ახალი წესების ძალაში შესვლის შემდეგ,  უცხოელი მოქალაქეების დასაქმებისთვის დაშვებული „სპეციალური პროფესიების“ სია შემცირდება.

აშშ-ს შიდა უსაფრთხოების სამინისტროს ინფორმაციით, ახალი შეზღუდვები ამერიკაში სამუშაო ვიზით მყოფი უცხოელების მესამედს შეეხება. ახალი ნორმები ძალაში 60 დღის შემდეგ შევა.

სამინისტოს მონაცემებით, ბოლო წლებში 500 000-ზე მეტი არასაიმიგრაციო სამუშაო ვიზა არა ახალი სამუშაო ადგილებისთვის, არამედ უკვე არსებულ ვაკანსიებზე ამერიკელების ჩანაცვლებისთვის გაიცა. ამან აშშ-ს მოქალაქეებს შორის უმუშევრობა გაზარდა და ზოგიერთ სფეროში ხელფასების შემცირებაც გამოიწვია.

თუ ადრე ვაშინგტონში ამ ტენდენციას ყურადღებას ნაკლებად აქცევდნენ, დღეს, კორონავირუსის და მასშტაბური ეკონომიკური კრიზისით გამოწვეული უმუშევრობის ზრდის ფონზე, ამ პრობლემამ სულ სხვანაირი აქტუალობა შეიძინა.

„H-1B-ს კატეგორიების ვიზების გაცემის პროცედურის გართულება ამერიკელი მუშების დაცვის უფრო ფართო პროგრამის ნაწილია“  - ნათქვამია უწყების განცხადებაში.

ამ ტიპის ვიზების გაცემის აზრი მუშახელის დეფიციტის შევსება და ამერიკაში მაღალი კვალიფიკაციის სპეციალისტების მოზიდვა იყო. ეს აშშ-ს კონკურენტუნარიანობას და მიმზიდველობას  გაზრდიდა.

თუმცა, შემდეგ  პროგრამა დაუშვებლად გაფართოვდა და  დღეს ამერიკელი თანამშრომლების უფლებებს უხეშად არღვევს.

უწყების ხელმძღვანელის ჩად ვოლფის თქმით, აშშ შევიდა ეპოქაში, როდესაც ქვეყნის ეკონომიკური უსაფრთხოება ეროვნული უსაფრთხოების ნაწილი გახდა.

„მარტივად რომ ვთქვათ, ეკონომიკური უსაფრთხოება - ეს ქვეყნის უსაფრთხოებაა. ჩვენ ყველაფერი იმისთვის უნდა გავაკეთოთ, რომ პირველ ადგილზე ამერიკელი კადრი იდგეს“ - განაცხადა ვოლფმა.

სამუშაო ვიზების გაცემის გამკაცრების თაობაზე გადაწყვეტილება დონალდ ტრამპმა ამა წლის ივნისში მიიღო. მისი თქმით, ეკონომიკური ვარდნის და კორონავირუსის პანდემიის პირობებში, სამუშაო ვიზების სისტემა  „ამერიკელების დასაქმებისთვის წარმოუდგენელ საფრთხეს შეიცავს“.

ამის გამო ტრამპა 2020 წლის ბოლომდე რამდენიმე კატეგორიის უცხოელისთვის სამუშაო ვიზების გაცემა შეაჩერა.

 
მათ შორისაა დასაქმება ტექნოლოგიების სფეროში, სეზონური სამუშაოებზე, კომპანიების შიდა თანამდებობრივ გადაადგილებებზე სხვა ქვეყნებიდან შტატებში.

ასევე შეიზღუდა კულტურული და პროფესიული გაცვლის პროგრამების ფარგლებში ვიზების გაცემა.

​rbc.ru

მოამზადა თენგიზ აბლოთიამ