საქართველოს საგარეო ვაჭრობა ინვარში გასული წლის ანალოგიურ პერიოდთან შედარებით 16.5%-ით შემცირდა. მათ შორის ექსპორტი 16.2%-ით და იმპორტი 16.6%-ით. გასული წლის #1 საექსპორტო პარტნიორთან - ჩინეთთან 40%-იანი ვარდნა ფიქსირდება, რის გამოც მან მე-3 ადგილზე გადაინაცვალა, სამაგრიროდ 800%-ით გაიზარდა აშშ-ში გატანილი პროდუქციის ღირებულება.
იანვარში ექსპორტზე სულ $224 მლნ-ის პროდუქტი გავიდა, 1 წლის წინანდელთან შედარებით $44 მლნ-ით ნაკლები. პროცენტულადაც და თანხობრივადაც ყველაზე დიდი კლება ჩინეთში აღინიშნა, სადაც ექსპორტი $45 მლნ-დან $27 მლნ-მდე შემცირდა. $18 მლნ-იანი კლების მიზეზი სპილეძის მადნებზე მოთხოვნის შემცირებაა, რომელიც $41 მლნ-ის ნაცვლად მხოლოდ $22 მლნ-ის გაიყიდა.
ნახტომისებური 809%-იანი ზრდის შემდეგ აშშ-სი ექსპორტმა $14.3 მლნ-ს მიაღწია და მე-7 ადგილი დაიკავა. ჩინეთისგან განსხვავებით აშშ-ისთან ვაჭრობის დეტალები საქსტატს არ გამოუქვეყნებია. ერთთვიან ზრდაზე დაყრდნობით კი რაიმე ტენდენციაზე საუბარი ჯერ ადრეა. შეერთებულ შტატებთან თავისუფალი ვაჭრობის ხელშეკრულების გაფორმებასთან დაკავშირებით მოლაპარაკებები წლების წინ დაიწყო. სასურველი შედეგი ამ ეტაპისთვის არ ჩანს.
თუ 2019 წელს რუსეთი საექსპორტო პარტნიორებში პირველ ადგილს იკავებდა, 2021 წელს მეოთხეზე გადაინაცვლა. ერთ წელიწადში რუსეთში გატანილი პროდუქციის ღირებულება 32%-ით $23 მლნ-მდე შემცირდა. 24 და 25 პროცენტიანი კლება აღინიშნება ასევე სომხეთოსა და აზერბაიჯანის მიმართულებითაც. თურქეთში ექსპორტი 8%-ით $15 მლნ-მდე გაიზარდა, გერმანიაში კი 126%-ით $5.7 მლნ-მდე.