აშშ-ს ფედერალური რეზერვის უფროსის ჯერომ პაუელის თქმით, ამერიკის ეკონომიკა ამ დროისთვის „გარდატეხის წერტილში იმყოფება“ და მთავარი რაც მას აკლია, ზრდის სტაბილურობა და მდგრადობაა.

„ვითარება დარგების მიხედვით განსხვავდება. ზოგიერთ დარგში საქმეები ძალიან კარგად მიდის, ზოგში კი პირიქით. ის, რასაც ჩვენ ამჟამად ვხედავთ, გარდატეხის წერტილში მყოფი ეკონომიკაა“, - მიიჩნევს პაუელი.

მისი თქმით, ეს წერტილი ადგილია,  საიდანაც ეკონომიკა სწრაფ ზრდას დაიწყებს, ხოლო სამუშაო ადგილები მოსალოდნელზე მაღალი ტემპით შეიქმნება. ეკონომიკურ ზრდას ხელს პირველ რიგში მასშტაბური ვაქცინაცია, საგადასახადო-საბიუჯეტო და ფულად-საკრედიტო პოლიტიკაში დახმარება უწყობს.

მისი თქმით, ამჟამად აშშ-ს ეკონომიკისთვის მთავარი საფრთხეა კორონავირუსის ხელახალი გავრცელება.

„ვაქცინაცია წარმატებით მიმდინარეობს, და ეს ეკონომიკის და ზოგადად ნორმალური ცხოვრების აღდგენის იმედს იძლევა, თუმცა მოდუნება არ შეიძლება. ბევრი მაგალითი გვიჩვენებს, რომ ვაქცინაციის მიუხედავად, პანდემიის მესამე ტალღის რისკი მაინც საკმაოდ მაღალია. ამიტომაც კარგი იქნება, თუ ადამიანები პირბადეებს ტარებას და სოციალურ დისტანცირებას განაგრძობენ“, - მიიჩნევს ჯერომ პაუელი.

მისი თქმით, ყველაზე ნელი ტემპებით აღდგენა ადამიანებს შორის კონტაქტზე დამყარებულ დარგებში - ტურიზმში, გართობაში, სარესტორნო და სასტუმრო ბიზნესში ხდება.

„ფედერალური რეზერვის პროგნოზით, ამერიკის ეკონომიკის მყარი ზრდა 2021 წლის მეორე ნახევარშია მოსალოდნელი. მე შემიძლია ვთქვა, რომ ზრდა, რომელსაც ჩვენ ამ პერიოდში ველოდებით, ძალიან დამაჯერებელი იქნება“, - თვლის ჯერომ პაუელი.

მისი თქმით, ფედერალური რეზერვიც და კერძო სექტორიც 2021 წელს ეკონომიკურ ზრდას 6-7%-ს დონეზე ელის, რაც ბოლო 30 წლის მანძილზე ყველაზე მაღალი მაჩვენებელი იქნება.

„ასევე მოსალოდნელია უმუშევრობის მნიშვნელოვანი შემცირება, დღევანდელ 6%-დან 4-5%-მდე“, - მიიჩნევს ამერიკის მთავარი ბანკირი.

რამდენიმე დღის წინ ფედერალური რეზერვის უფროსმა მონაწილეობა საერთაშორისო სავალუტო ფონდის მიერ ორგანიზებულ კონფერენციაში მიიღო, სადაც განაცხადა, რომ აშშ-ს ეკონომიკის აღდგენა კორონავირუსზე სრული გამარჯვების გარეშე შეუძლებელია.

„ვირუსი სასაზღვრო რეჟიმს არ იცავს და მანამ სანამ მთელი მსოფლიო ვაქცინირებული არ იქნება და სანამ ახალი მუტაციების რისკი არ მოიხსნება, ჩვენ სრულად და დამაჯერებლად ეკონომიკის აღდგენას ვერ შევძლებთ. ეს მთელს მსოფლიოს და ამერიკასაც ეხება“ - განაცხადა მაშინ ჯერომ პაუელმა.

ჯერ კიდევ თებერვალში ფედერალური რეზერვს უფროსი ამბობდა, რომ დასაქმების პანდემიამდელ მაჩვენებლებთან დაბრუნებას წლები დასჭირდება.

„პანდემიის დასაწყისში, 2020 წლის თებერვალში, უმუშევრობამ შტატებში 3,5% შეადგენდა, ხოლო უკვე აპრილში ეს მაჩვენებელი 14,8%-დე გაიზარდა, რაც პანდემიის პერიოდის მაქსიმუმია. 2021 წლის იანვარში უმუშევრობა 6%-მდე შემცირდა“, - განაცხადა პაუელმა.