აშშ-მა ჩინეთი ვალუტით მანიპულატორთა სიიდან ამოიღო. BBC-ის ცნობით, ამის შესახებ ვალუტის საკითხებზე ფინანსთა სამინისტროს მიერ მომზადებულ 6 თვის მიმოხილვაშია ნათქვამი.
უწყების განცხადებით, ჩინეთმა უნდა მიიღოს ზომები, რათა „მუდმივად სუსტი ვალუტა არ ჰქონდეს“. მათივე მტკიცებით, ახლა იუანთან მიმართებით დოლარი ბოლო 20 წლის განმავლობაში საშუალო კურსზე 8%-ით უფრო მაღლა დგას, რაც ორი ქვეყნის ურთიერთობებში „სავაჭრო დისბალანსს“ ქმნის.
ფინანსთა სამინისტროს განცხადებით, ჩინეთის ეკონომიკის მყარი საფუძვლები და გააზრებული სტრუქტურული პოლიტიკა იუანის გამყარებას შეუწყობს ხელს.
აშშ-ის ფინანსთა სამინისტრომ ჩინეთი „ვალუტით მანიპულატორთა“ სიაში გასული წლის აგვისტოში მას შემდეგ შეიყვანა, რაც ჩინური იუანი დოლართან მიმართებით გაუფასურდა.
ვალუტით მანიპულატორებად ის ქვეყნები ითვლებიან, სადაც ცენტრალური ბანკი სავალუტო ინტერვენციების გზით ეროვნული ვალუტის კურსის შემცირებას ცდილობენ.
აშშ-მა ჩინეთის პროდუქციას გადასახადები 2018 წელს დაუწესა. გასული წლის ივნისში, 25%-იანი ტარიფები დაწესდა, რომელიც მთლიანობაში 50 მილიარდ დოლარს მოიცავდა. სექტემბერში ამოქმედდა 10%-იანი ტარიფი, რომლის საერთო ღირებულება 200 მილიარდი დოლარი იყო. 2019 წლის მაისში, პრეზიდენტმა დონალდ ტრამპმა განაცხადა, რომ აშშ-ჩინეთის სავაჭრო მოლაპარაკებები ნელა მიმდინარეობდა და გადასახადები მაინც აიწევდა.
11 ოქტომბერს Bloomberg-ი წერდა, რომ აშშ და ჩინეთი ვაჭრობის საკითხზე ნაწილობრივ შეთანხმდნენ. 22 დეკემბერს ტრამპმა ჩინეთთან სავაჭრო მოლაპარაკებებში პროგრესი დაადასტურა და განაცხადა, რომ შეთანხმების პირველი ნაწილი ძალიან მალე გაფორმდება.
imedinews.ge