დონალდ ტრამპის ადმინისტრაციამ აშშ-ს და თურქეთს შორის სამხედრო თანამშრომლობაზე ახალი შეზღუდვები შემოიღო. ამ გადაწყვეტილების მიზეზი ანკარის მიერ საჰაერო თავდაცვის რუსული სისტემის С-400-ს ყიდვა გახდა.

შეზღუდვების მთავარი სამიზნეა თურქეთის თავდაცვითი მრეწველობის სამმართველო - მისი ხელმძღვანელების მიმართ პერსონალური სანქციების გარდა, მიღებული გადაწყვეტილება თურქეთისთვის ამერიკული სამხედრო ტექნოლოგიების მიწოდებას კრძალავს.

ინფორმაცია იმის თაობაზე, რომ ტრამპის ადმინისტრაცია თავისი არსებობის ბოლო კვირებში თურქეთის მიმართ სანქციების პაკეტს ამზადებს, მასმედიაში რამდენიმე დღის წინ გავრცელდა. 14 დეკემბერს კი აშშ-ს სახელმწიფი მდივანმა მაიკ პომპეომ განაცხადა, რომ სანქციების შემოღების გადაწყვეტილება უკვე მიღებულია.

მისი თქმით, თურქეთს გონს მოსვლის და რუსეთთან თანამშრომლობაზე უარის თქმის შესაძლებლობა კიდევ დარჩენილი აქვს.

„რუსეთთან თანამშრომლობა თურქეთისთვის სულ უფრო მეტად პრობლემური და პოლიტიკური რისკების შემცველი იქნება. მოვუწოდებ თურქეთს  С-400-ს საკითხი შტატებთან ერთად გადაწყვიტოს“ - განაცხადა პომპეომ.

თურქეთთან ურთიერთობების კურატორმა სახელმწიფო დეპარტამენტში მეტიუ პალმერმა განაცხადა, რომ ვაშინგტონი თავის მოკავშირეს ზურგს კი არ აქცევს, არამედ მას ურთიერთვალდებულებების შესახებ ახსენებს.

„ჩვენ ვმუშაობთ თურქ კოლეგებთან შტატებთან ურთიერთობების გამყარებისთვის, და ვცდილობთ გავაგებინოთ მათ, რომ ჩვენთან თანამშრომლობა მათთვის ბევრად უფრო მომგებიანია, ვიდრე რუსეთთან. ჩვენ ძალიან პოზიტიურად ვაფასებთ თურქეთის როლს ნატო-ში, კერძოდ ავღანეთს და კოსოვოს მისიაში. თუმცა, თურქეთის მიერ С-400-ს შეძენა ქვეყნის, როგორც ნატოს წევრის, ვალდებულებებს უხეშად ეწინაამღდეგება“ - განაცხადა დიპლომატმა.

კონკრეტულ ზომებთან დაკავშირებით ახსნა-განმარტება შტატებს ფინანსთა სამინისტრომ გააკეთა.

როგორც უკვე თქვა, ვაშინგტონის მთავარი სამიზნეა თურქეთის თავდაცვითი მრეწველობის სამმართველო. ამ უწყებასთან დაკავშირებული რამდენიმე ადამიანს მიმართ პერსონალური სანქციებია შემოღებული - მათ შორის არიან სამმართველოს უფროსი ისმაილ დემირი, მისი მოადგილე ფარუკ იგიტი, ამავე უწყების საჰაერო თავდაცვის დეპარტამენტის უფროსი მუსტაფა ალპერი და მისი მოადგილე სერხატ გენჩოგლუ.

მათი ანგარიშები და აქტივები შტატებში გაიყინება, და მათ შტატებში შესვლა აეკრძალებათ.

გარდა ამისა, დოკუმენტი თურქეთისთვის საექსპორტო ლიცენზიის და ამერიკული ტექნოლოგიების გადაცემას, ფინანსურ ორგანიზაციებს კი თურქეთის თავდაცვითი მრეწველობისთვის სესხების გაცემა კრძალავს.

ასევე აშშ შეეწინაამღდეგება საერთაშორისო ფინანსური ინსტიტუტების  მიერ თურქეთისთვის სესხების გამოყოფას იმ შემთხვევაში, თუ ამ სახსრების სამხედრო დანიშნულებით გამოყენების ალბათობა იქნება.

Kommersant.ru

მოამზადა თენგიზ აბლოთიამ