აშშ-ს სენატმა ერთხმად მიიღო კანონპროექტი, რომლითაც ჩინურ კორპორაციებს, როგორებიცაა Alibaba Group Holding-ი და Baidu Inc-ი, აშშ-ს საფონდო ბირჟებზე აქციების განთავსება აეკრძალათ. ეს ყველაფერი კი მსოფლიოს ორ უმსხვილეს ეკონომიკურ გიგანტს შორის არსებული დაძაბულობის კიდევ ერთი ეტაპია.
კანონპროექტი, რესპუბლიკელმა სენატორმა ჯონ კენედიმ და დემოკრატმა კრის ვან ჰოლენმა შეიმუშავეს.
ამერიკელმა კანონმდებლებმა ჩინეთის უმსხვილესი კორპორაციებიდან შემოდინებულ მილიარდობით დოლარს, ფაქტობრივად კარები მიუხურეს. შეშფოთებას მათში იწვევს ის, რომ ამერიკული ფული აზიური ქვეყნის უმსხვილესი ტექნოლოგიური კორპორაციების საქმიანობას აფინანსებს, რომელიც მოიცავს სფეროებს, ხელოვნური ინტელექტით დაწყებული მონაცემთა ბაზით დასრულებული.
აშშ-ში რეგისტრირებული ჩინური კომპანიების აქციების ფასი, მათ შორის Baidu-სა და Alibabas აქტივები ნიუ იორკის ბირჟაზე დღეს მნიშვნელოვნად დაეცა მაშინ, როდესაც მთლიანობაში ბაზარი ზრდას განიცდიდა.
თუ კომპანია ვერ ამტკიცებს, რომ არ იმყოფება უცხო ქვეყნის კონტროლქვეშ, ზედიზედ სამი წლის მანძილზე ვერ ხდება მათი საქმიანობის აუდიტორული შემოწმება, მაშინ ამ კომპანიის ფასიანი ქაღალდები აშშ-ს ბირჟებზე იკრძალება.
„მე არ მინდა ახალი ცივი ომის წამოწყება, უბრალოდ ჩინეთმა წესების მიხედვით უნდა ითამაშოს“ - განაცხადა სენატორმა კენედიმ.
95 პროცენტი იმ ფირმების, რომელთა ფინანსების დაკვირვება აშშ-ს აუდიტორების მიერ ვერ ხერხდება, ჩინელ აუდიტორებს იყენებენ.
„აშშ-ს მიერ ლისტინგის პროცესების გამკაცრებამ შესაძლოა სამომავლოდ მსხვილი ჩინური კომპანიების გეგმებზეც იმოქმედოს. მაგრამ რადგანაც დიდი ხანია მიმდინარეობს პროცესები და განხილვები ამ საკითხზე, სხვა ჩინური კომპანიები უკვე დარეგისტრირდნენ ჰონგკონგში ან გეგმავენ ამის გაკეთებას,“ - განაცხადა ანალიტიკოსმა ჯეიმს ჰალმა.
ყველა ჩინური ორგანიზაცია, რომელიც დარეგისტრირებულია აშშ-ში, შეიძლება უახლოს წლებში მნიშვნელოვნად დაზარალდეს.
ტრამპმა ჩინეთის მიმართ რიტორიკა ოთხშაბათის განცხადებებით გაამკაცრა, სადაც ჩინეთის ლიდერი სი ძინ პინი აშშ-სა და ევროპის წინააღმდეგ დეზინფორმაციულ და პროპაგანდისტულ შეტევებში დაადანაშაულა.
„ეს ყველაფერი „ზემოდან“ მოდის. ჩინეთს ძალიან უნდა, რომ საპრეზიდენტო მარათონი ყოფილმა ვიცე-პრეზიდენტმა ჯო ბაიდენმა მოიგოს,“-განაცხადა აშშ-ს პრეზიდენტმა.
სამშაბათს სენატორმა კენედიმ FOX NEWS-ს განუცხადა, რომ კანონპროექტი ამერიკული ბირჟების მიმართ დაინერგება, როგორებიცას ნიუ-იორკის საფონდო ბირჟა და Nasdaq-ი.
„ისინი იტყუებიან მე კი კანონპროექტი მაქვს, რომელიც მათ ხელს შეუშლის წესების დარღვევაში“ - განაცხადა კენედიმ.
ყველაფერი დაიწყო იმით, რომ ჩინეთმა ორგანიზაცია PCAOB-ს (ინვესტორების დაცვა აუდიტის მეშვეობით) უარი უთხრა იმ ფირმების ბუღალტრული ჩანაწერების შემოწმებაზე, რომელთა აქციები ამერიკულ საფონდო ბირჟებზე ივაჭრება.
გასულ კვირას ტრამპმა განაცხადა, რომ თვალს ადევნებს ჩინურ კორპორაციებს, რომლებიც აშშ-ს ბირჟაზე ოპერირებენ, მაგრამ წესებს არღვევენ . მანვე აღნიშნა, რომ მათი შეფერხება უსიამოვნო შედეგებს გამოიწვევს და ბირჟები ლონდონის ან ჰონკონგის ბაზარზე გადაინაცვლებენ.
Bloomberg.com
მარიამ მორგოშია