აგვისტომ ჩინურ ტექნოლოგიურ კომპანიებს ცუდი ახალი ამბები მოუტანა, აშშ-მ Huawei-ს წინაამღდეგ სანქციები გაამკაცრა, აუკრძალა ამერიკელებს ჩინურ სერვის TikTok-თან ყოველგვარი კონტაქტები და ჩინური მესენჯერი WeChat. ამიტომ დღეს უკვე თამამად შეიძლება ითქვას, რომ აშშ ჩინეთთან სრულ მასშტაბიან ტექნოლოგიურ ომს იწყებს.

2018 წელს Huawei ჩიპებს ამერიკული კომპანიებისგან ყიდულობდა, მათ შორის Qualcomm, Intel, Micron დაBroadcom იყვნენ. საშუალოდ წლის მანძილზე მათგან ჩიპების შეძენაზე ჩინური კონცერნი 13 მლრდ. დოლარს ხარჯავდა. 2019 წელს აშშ-მ კომპანიის წინაანღდეგ სანქციები შემოიღო და ამერიკული სათადარიგო ნაწილების შესყიდვა აუკრძალა. გამოსავალი ერთი შეხედვით მოიძებნა - Huawei-მა ჩიპების ყიდვა ტაივანური​ Taiwan Semiconductor Manufacturing Corporation (TSMC) -სგამ დაიწყო.

პარალელურად, ამერიკული სანქციების მიუხედავად, 2019 წელს Huawei-ს შემოსავალი 19,1%-ით გაიზარდა, ზრდა 2020 წელსაც გაგრძელდა. ჩინურმა კონცერნმა ასევე 5G-ს ტექნოლოგიების დანერგვის თაობაზე სხვადასხვა ქვეყნებთან 90 კონტრაქტი გააფორმა.

კარგად მიდის საქმეები სმარტფონების გაყიდვის მხრივ - Huawei მე-2 ადგილზე გავიდა და პირველობა მხოლოდ Samsung-ს დაუთმო.

ამ სიტუაციაში აშშ-მ სანქციები გაამკაცრა, კერძოდ ნებისმიერი ქვეყნის კომპანიას Huawei-სთვის ჩიპების გაყიდვა აეკრძალა იმ შემთხვევაში, თუ მათ წარმოებაში ამერიკული ტექნოლოგიები და დანადგარები გამოიყენება.

ეს სანქციები გაცილებით სერიოზულია, რადგანაც, ბოლო თაობის ჩიპების წარმოების ტექნოლოგიას ამერიკული KLA, Lam Research და Applied Materials ფლობენ. ჩინური კონცერნის მიერ შესყიდული ტაივანური ჩიპების ტექნოლოგიებს ამერიკული HiSilicon ფლობს. შესაბამისად, ეს შესაძლებლობა Huawei-სთვის დაიხურა, ამიტომაც კონცერნის ხელმძღვანელობამ განაცხადა, რომ უკვე შექმნა საკუთარი ჩიპები და ამ მხრივ შტატებზე დამოკიდებული უკვე არ არის. თუმცა, როგორც ჩანს ჩინური ჩიპების გამოყენების დრო ჯერ არ მოსულა და კომპანიამ ჩიპების იმპორტირება შუამავლების დახმარებით განაგრძო.

თუმცა, კიდევ უფრო მძიმე ბოლო დარტყმა აღმოჩნდა. ახალი სანქციები უკრძალავს ამერიკული ტექნოლოგიებით დამზადებული ჩიპების მიყიდვას შუამავლებსაც კი, რომელთა უკან Huawei დგას. საბოლოო ჯამში გამოდის, რომ ჩიპების ვერც ერთი მწარმოებელი ჩიპებს Huawei-ს ვერ მიაწვდის, Huawei კი მათ შუამავლების დახმარების გარეშეც ვერ შეიძენს.

ჩინურ კომპანიას შემქნილი სიტუაციიდან გამოსვლა ძალიან გაუჭირდება და შესაძლოა ეს იყო სასიკვდილო განაჩენი. Huawei თითქმის ყველა პროდუქციაში სმარტფონებით დაწყებული 5G-ს აღჭურვილობით დასრულებული ჩიპებს აქტიურად გამოიყენებს. სხვათაშორის ბრიტანეთმა 5G-ს ქსელის განვითარებაზე Huawei-ს უარი სწორედ სანქციების გამო ჩიპების მიწოდების არასტაბილურობის რისკის გამო უთხრა.

ვაშინგტონის შეტევა მხოლოდ Huawei-ით არ შემოიფარგლება დონალდ ტრამპის ბოლო გადაწყვეტილება სერვის TikTok-ს ეხება. კერძოდ, აშშ TikTok-ის მფლობელ Bytedance-ისგან მოითხოვს 90 დღის მანძილზე კომპანია Musical.ly-სთან შერწყმის შედეგად მიღებულ ყველა აქტივზე უარის თქმას. სწორედ Musical.ly-სთან დადებული გარიგების წყალობით TikTok-მა გლობალური აუდიტორია მიიღო, რადგანაც Musical.ly იყო მოკლე ვიდერგოლების პირველი სერვისი, რომელიც შტატებში პოპულარული იყო. Musical.ly-ს ინფრასტრუქტურა დღეს აქტიურად გამოიყენება TikTok-ის მიერ, სანქციების აღსრულების შეთხვევაში Bytedance სერვისზე კონტროლს მთლიანად დაკარგავს.

გარდა ამისა, ამერიკის ფიზიკურ და იურიდიულ პირებს TikTok-თან ყოველგვარი კონტაქტები აკრძალა, როგორც მომხმარებლის დონზე, ასევე საქმიანი გარიგებების მიზნით. წილის ყიდვასთან დაკავშირებით მოლაპარაკებებს Microsoft აწარმოებდა, თუმცა, სანქციების შემოღების შემდეგ პროცესი შეჩერდა. WeChat-ის წინაამღდეგ სანქციები ნაკლებად საშიშია, რადგანაც ეს მესენჯერი ჩინეთის ფარგლებს გარეთ პოპულარობით არ სარგებლობს. თუმცა, იმ შეთხვევაში, თუ სანქციებით მესენჯერის დაყენება აიფონებზე აიკრძალება, ეს ზარალს Apple-ს მიაყენებს, რომელიც ასეთ შემთხვევაში ჩინურ ბაზარს დაკარგავს.

მეორეს მხრივ, სანქციებით WeChat-ისთვის ამერიკული ტექნოლოგიების მიწოდება იკრძალება, ეს კი მესენჯერის ინფრასტრუქტურას დიდ ზიანს მიაყენებს. ამ საკითხში კითხვები პასუხებზე მეტია.

ერთადერთი, რისი თქმაც გარკვევით შეიძლება ისაა, რომ აშშ ჩინური ტექნოლოგიების ექსპანსიას ომს უცხადებს. შტატების ხელისუფლების მიერ გამოცხადებული მასშტაბური პროგრამა „სუფთა ქსელი“ ამერიკული ბაზრიდან ჩინური ტექნოლოგიური და საკომუნიკაციო კომპანიების განდევნას, ჩინური მობილური სერვისების და ჩინურ სმარტფონებზე ამერიკული პროგრამების დაყენების აკრძალვას გულისხმობს.

rbc.ru

თენგიზ აბლოთია