რადიო „კომერსანტის“ გადაცემა პროფესიონალებში „აისეტის“ კვლევითი ინსტიტუტის მკვლევარმა დავით კეშელავამ 2020 წელი შეაჯამა და ეკონომიკაზე შეზღუდვების გავლენის შესახებ ისაუბრა. მისი განმარტებით, 2020 წელი 90-იანი წლების შემდეგ ყველაზე მძიმე წელი იყო, რადგან კრიზისი ყველა სექტორს შეეხო.
„კომპლექსურად რომ შევაფასოთ მაკროეკონომიკური მაჩვენებლები, პრაქტიკულად ყველა მიმართულებით სერიოზული გაუარესება გვაქვს, იყო მასშტაბური კრიზისი, რომელიც ყველა სექტორს შეეხო, რა თქმა უნდა გავლენა იყო ასიმეტრიული და განსაკუთრებით მძიმე ნეგატიური დატვირთვა ძირითადად სერვის სექტორზე მოდიოდა, რადგან შეზღუდვები მათზე პირდაპირ მოქმედებს.
მონეტარული პოლიტიკის გავლენა შეზღუდულია, რადგან ინფლაციის მიმართულებით გარკვეული შიშები მაინც არსებობს, იმისათვის, რომ ეკონომიკური ზრდა წაახალისოს მონეტარული პოლიტიკის ინსტრუმენტებს ცენტრალური ბანკი აქტიურად ვერ იყენებს. რაც შეეხება ფისკალურ პოლიტიკას მთელი წლის განმავლობაში სახელმწიფომ ბევრი ფული დახარჯა და ამ დროში ბევრი ვალიც აიღო, თუმცა რა თქმა უნდა ლოქდაუნის და სირთულეების პერიოდში ამ ეფექტის ეკონომიკაზე გადაცემა მარტივად ვერ ხდება“ - აღნიშნა დავით კეშელავამ.
კითხვაზე თუ რა ეკონომიკური ნაბიჯები გადაიდგა და რა შეიძლებოდა შეზღუდვების პირობებში გაკეთებულიყო დავით კეშელავა პასუხობს, რომ ეპიდემიოლოგიური სიტუაციის სამართავად პირველ რიგში ოქროს შუალედის მოძებნაა საჭირო.
„ყოველთვის როდესაც მკაცრი ზომების მიღებაზე ან ჩაკეტვაზე ვსაუბრობთ, აქვე ინოვაციურ გეგმაზეც უნდა ვიფიქროთ, რადგან ჩაკეტვა თავიდან ავიცილოთ. ასეთი ჩაკეტვები და მკაცრი შეზღუდვები ეკონომიკაზე ნეგატიურად მოქმედებს, რასაც შესაძლოა მომავალშიც ჰქონდეს გამოვლინება. ჩვენ დავაზარალეთ და ძალიან ცუდ მდგომარეობაში ჩავაგდეთ სერვის სექტორი, როდესაც ეს კრიზისი ჩაივლის, შესაძლოა, რომ კამპანიების ნაწილმა მუშაობა ვერ გააგრძელონ და შესაძლოა წლები დასჭირდეს იმას, რომ იმ მდგომარეობას დავუბრუნდეთ, რომელშიც პანდემიამდე ვიყავით.
ძალიან მარტივია, რომ ფიტნეს კლუბებს და სხვადასხვა სფეროს წარმომადგენლებს ფუნქციონირება ავუკრძალოთ, მაგრამ იქნებ ვიფიქროთ და რაღაც გაიდლაინების და წესების დაცვით გავხსნათ სექტორი.
მათი თუნდაც ნაწილობრივი დატვირთვით ოპერირება, ეკონომიკისთვისძალიან კარგი იქნება და ამ კომპანიებსაც შევინარჩუნებთ.“ - აღნიშნა დავით კეშელავამ.
კეშელავამ შეზღუდვების შემსუბუქებაზეც ისაუბრა და განმარტა, რომ მსგავსი ტიპის გახსნები, როგორიც დღეს გვაქვს, ეკონომიკაზე დიდ გავლენას ვერ მოახდენს.
„შესაძლოა ტრანსპორტის ამუშავებამ რაღაც სექტორზე დადებითად იმოქმედოს, მაგრამ საერთო ჯამში ეკონომიკის გახსნის პირველ ეტაპს მასობრივ გახსნად ვერ შევაფასებ, რადგან მისი გავლენა ეკონომიკაზე ძალიან დაბალი იქნება. რაც შეეხება ეკონომიკის გახსნის შემდეგ ეტაპს, მგონი გეგმაც არ არსებობს, თითქოს სიტუაციიდან გამომდინარე იღებენ გადაწყვეტილებებს. პრაქტიკულად დაგეგმვას ვერ ვახერხებთ, რადგან რამდენიმე კვირის შემდეგ რა იქნება ისიც არ ვიცით“ - აღნიშნა დავით კეშელავამ.
კეშელავას განმარტებით რაც უფრო გაჭიანურდება გახსნის პროცესი, მით უფრო დაზარალდება ეკონომიკა და ადამიანები, ამიტომ უნდა მოიძებნოს რაღაც გზები რომ რეკომენდაციების დაცვით სერვის სექტორს მუშაობის შესაძლებლობა მიეცეს.