სამშენებლო სექტორი სამუშაოების განახლების შესახებ მთავრობის გადაწყვეტილებას დადებითად აფასებს. დეველოპერები „ბიზნესპარტნიორთან“ განმარტავენ, რომ ვადაზე 1 კვირით ადრე მუშაობის აღდგენის უფლება ბაზრისთვის უმნიშვნელოვანესია.

კომპანია „არსის“დირექტორი, ბესო ორთოიძე აღნიშნავს, რომ დარგის მოთამაშეების უმრავლესობა ჯანდაცვის სამინისტროს გაცემულ რეკომენდაციებსაც ითვალისწინებს.

„მივესალმებით პრემიერის ამ ინიციატივას. სამშენებლო სექტორი და მისი მომიჯნავე ბიზნეს-სექტორები ქვეყანაში მნიშვნელოვან ეკონომიკურ დოვლათს ქმნიან. თუნდაც 1 კვირით ადრე დაწყება ამ კრიზისის ფონზე ნამდვილად მნიშვნელოვანია. თითქმის ყველა კომპანია მუშაობის დასაწყებად მზად არის. ასევე უსაფრთხოების შემოწმებაც გავლილი აქვთ. იმედია, ყველა მათგანი გაითვალისწინებს ჯანდაცვის სამინისტროს რეკომენდაციებს. ეს პერიოდი ნამდვილად საკმარისი იყო.

იქიდან გამომდინარე, რომ მშენებლობაზე დასაქმებულ ადამიანებს მუშაობა ღია სივრცეში უწევთ და ეს ნაკლებად საფრთხის შემცველია, რა თქმა უნდა, შეიძლებოდა, რომ ცოტა ადრეც მოხსნილიყო შეზღუდვები, თუმცა სხვა რეგულაციებთან მიმართებით მუშაობა მაინც შეუძლებელი იქნებოდა. ტრანსპორტი გაჩერებული იყო, ვერ ხერხდებოდა ქალაქებს შორის მიმოსვლაც“,- აღნიშნავს ორთოიძე.

„არსის“ დირექტორი იმ ზარალზეც საუბრობს, რომელიც სამშენებლო სექტორმა საგანგებო მდგომარეობის პირობების გათვალისწინებით მუშაობის შეჩერებით მიიღეს.

„მშენებლობის 1 თვით შეჩერება, რა თქმა უნდა, ზარალს იწვევს. როგორც წესი, მშენებლობის დაწყება გარკვეულ ხარჯებთანაა დაკავშირებული, შესაბამისად, კომპანიებს რამდენჯერმე მოუწევთ ამ ხარჯის გაღება. თუმცა, უფრო მნიშვნელოვანია, რაც შეიძლება სწრაფად დაიწყოს ეკონომიკის აღდგენა და თუნდაც იმ ნიშნულს დავუბრინდეთ, რაც პანდემიამდე გვქონდა. ეტაპობრივად მერე გამოჩნდება ზიანი. ახლა შოკური მდგომარეობიდან გამოვდივართ, შესაბამისად, ბაზრის ქცევის ანალიზი მოგვიანებით გაკეთდება და რეალურ სურათსაც დავინახავთ.

წყარო: business-partner.ge