რადიო კომერსანტის გადაცემაში „ბიზნესი და სამართალი ნინო ლიპარტიასთან ერთად“ არბიტრაჟის, როგორც დავის გადაწყვეტის ალტერნატიული საშუალების შესახებ ისაუბრეს. გადაცემის სტუმრის იურიდიული კომპანია „ნოდია, ურუმაშვილი და პარტნიორები“–ს სასამართლოსთან ურთიერთობის მიმართულების ხელმძღვანელის, მაკა თოდუას თქმით, არბიტრაჟი და მედიაცია ბიზნესისთვის, დავის გადაწყვეტის ალტერნატიულ საშუალებებს წარმოადგენს, სასამართლოს გადატვირთულობიდან გამომდინარე ბიზნეს დავები დროში იწელება, რაც ბიზნესისთვის სერიოზულ წინაღობას წარმოადგენს.

„დარღვეული უფლების დაცვის მიზნით მხარეს აქვს უფლება მიმართოს სასამართლოს,როგორც ძირითად დაცვის საშუალებას, თუმცა ასევე არსებობს ალტერნატიული მექანიზმი,როგორიცაა არბიტრაჟი და მედიაცია. ყველა დავა არ არის არბიტრაჟუნარიანი, მაგრამ იმისთვის,რომ არბიტრაჟუნარიანი გახდეს დავა, საჭიროა მხარეთა შეთანხმება წერილობითი ფორმით.

ბიზნესისთვის ყველაზე მნიშვნელოვანი არის დრო და სასამართლოს გადატვირთულობიდან გამომდინარე, განხილვის ვადების ძალიან ჭიანურდება, ფიზიკურად ვერ უმკლავდება სასამართლო იმ ნაკადს, რაც ბიზნესის დავებს უკავშირდება. შესაბამისად, არბიტრაჟი წარმოადგენს დავის გადაწყვეტის ალტერნატიულ საშუალებას, ის აუცილებლად უნდა იყოს მიუკერძოებელი და ჰქონდეს მაღალი სტანდარტები.

თბილისის სააპელაციო სასამართლოს მოსამართლე ანა გოგიშვილი საარბიტრაო კვალიფიკაციასთან დაკავშირებულ ხარვეზებზე საუბრობს.

„არბიტრაჟის პირველი დადებითი მახასიათებელი არის ის,რომ მხარეები თავად განსაზღვრავენ,რომელ კონკრეტულ ორგანიზაციას მიანდონ თავიანთი დავის გადაწყვეტა, განსხვავებით სასამართლოსგან, სადაც არ აქვთ არჩევანის შესაძლებლობა. მხარეები თავადვე ადგენენ წესებს, რა წესებითაც უნდა  გადაწყდეს მათი სამომავლო დავა. მნიშვნელოვანია ასევე არბიტრი იყოს იურისტი, ვინაიდან ძირითადად,დავების განხილვის დროს არბიტრი იყენებს კანონმდებლობას, რომლის განმარტებასაც სჭირდება იურისტის კვალიფიკაცია. ალბათ ხარვეზია ის,რომ საარბიტრაჟო კვალიფიკაციის კუთხით აუცილებელი მოთხოვნა არ გახლავთ, რომ არბიტრი იურისტი იყოს.

სამწუხაროდ, არსებობს მიკერძოებული არბიტრაჟის არსებობის ფაქტებიც,რომლებიც კონკრეტული კრედიტორის ნებასურვილს ასრულებენ, ეს აზიანებს ამ ინსტიტუტს და მის მიმართ ნდობას,“- ამბობს ანა გოგიშვილი.