„კორონავირუსზე მეტად ქვეყანას ეკონომიკური კრიზისის საფრთხის წინაშე დგას“, -ამის შესახებ „კომერსანტთან“ ბიზნესმენი არმაზ თავაძე საუბრობს. მისი განმარტებით, კორონავირუსის გავრცელების პრევენციის ღონისძიებების თვალსაზრისით, ჩვენი ქვეყანა ერთ-ერთი სამაგალითოა. ჩვენი ხელისუფლების ნაბიჯები კი ერთ-ერთი ყველაზე ეფექტური გამოდგა.
„გულწრფელად რომ გითხრათ, სასიამოვნოდ გაკვირვებული ვარ იმით, რომ ხელისუფლება ორგანიზებულად შეხვდა კორონავირუსის გავრცელების საფრთხეს. თუმცა, კორონავირუსზე მეტად, ქვეყანა იმ შედეგების და საფრთხეების წინაშე დგას, რომელშიც შეიძლება ჩვენი ეკონომიკა უახლოეს მომავალში აღმოჩნდეს.
ჩემი აზრით, ხელისუფლება ცოტა აგვიანებს ამ თემაზე რეაგირებას. ქვეყანას სასწრაფოდ სჭირდება ძალიან კონკრეტული ანტიკრიზისული, ეკონომიკური გეგმა, სადაც მთავრობის მხრიდან გარკვეული ღონისძიებები მკაფიოდ იქნება გაწერილი. ბაზარი ყოველთვის მკვეთრად რეაგირებს მოლოდინებზე. დღეს ბიზნესის ყველა სფეროში ნეგატიური მოლოდინები სჭარბობს, ამიტომ ბიზნესს აუცილებლად სჭირდება მთავრობის მხრიდან მკაფიო ორიენტირები იმისათვის, თუ რაზე უნდა გაკეთდეს სამომავლოდ სწორება.
რა თქმა უნდა, ეს კრიზისი, გარკვეულ დარგებს უფრო მეტად დააზარალებს, ზოგიერთს კი შედარებით ნაკლებად. შესაბამისად, ამის წინასწარი პროგნოზირება და გათვლა მთავრობამ უნდა მოახდინოს. სასიცოცხლოდ მნიშვნელოვანია, რომ ხელისუფლების მხრიდან მოხდეს ცალკეული დარგების მიმართ გარკვეული სტიმულირების ან გადარჩენის ღონისძებების შეთავაზება. ვისურვებდი, რომ ხელისუფლება ამ საკითხშიც ისეთივე ეფექტური და ორგანიზებული იყოს, როგორც ვირუსის შეკავების საკითხში აღმოჩნდა. წინააღმდეგ შემთხვევაში ღრმა ეკონომიკური კოლაფსი გარდაუვალი იქნება და ამის პროგნოზირებას დიდი ანალიტიკური აზროვნება არ სჭირდება.
გუშინ, ჩვენი საზოგადოება ერთსულოვნად უკრავდა ტაშს ქართველ ექიმებს მადლიერების გამოხატვის ნიშნად. მათ შორის, ხელისუფლების წარმომადგენლებიც არ იშურებენ ჩვენი სამედიცინო სფეროს წარმომადგენლების მიმართ სამადლობელ სიტყვებს. თუმცა, რატომღაც ყველას დაავიწყდა, რომ სულ რამდენიმე თვის უკან, ხელისუფლების მხრიდან მიღებულმა ცნობილმა 520-ე დადგენილებამ სერიოზული პრობლემა შეუქმნა ჰოსპიტალურ სექტორს და ექიმებს. მე კარგად ვიცნობ ჰოსპიტალურ სექტორს და თამამად შემიძლია გითხრათ, რომ 520-ე დადგენილების და დღევანდელი კრიზისის ერთობლივი გავლენის გათვალისწინებით, უახლოეს თვეებში ქართველი ექიმების დიდი ნაწილი სახელფასო ანაზღაურების გარეშე შეიძლება დარჩეს. იმედი მაქვს, ხელისუფლებაში გააზრებული აქვთ ეს საფრთხე.
ჰოსპიტალური სექტორის მსგავსად, სერიოზული გამოწვევების წინაშე დგას ბიზნესის არაერთი სფერო. ამიტომ, კიდევ ერთხელ მინდა მოვუწოდო ხელისუფლებას, რომ დროულად მოახდინოს პრაქტიკული ანტიკირიზისული გეგმის შემუშავება, სანამ პროცესებს ჯერ კიდევ ეკონომიკური კოლაფსის ფორმა არ მიუღია“, -აცხადებს არმაზ თავაძე.