„რეალური მდგომარეობა სასტუმრო ბიზნესში საკმაოდ რთულია“-აღნიშნული შინაარსის პოსტებს აქვეყნებენ ტურიზმის სფეროს სპეციალისტები  Facebook-ზე.სასტუმროების მენეჯერი შალვა ალავერდაშვილი აცხადებს,რომ ის დიდი დიდი ხანია ცდილობს არ იყოს ნეგატიური და ისედაც დაძაბული ჩვენი სექტორი (ტურიზმი) უფრო არ დაძაბოს. 

„რეალური მდგომარეობა სასტუმრო ბიზნესში საკმაოდ რთულია და თითქმის 30%-40 %-იანი კლება გვაქვს ბოლო სამ თვეში შარშანდელ წელთან შედარებით. საკმაოდ რთულია, ინვესტორებს აუხსნა სტატისტიკური ზრდის ფონზე რატომ აქვს ბიზნესს უფრო ნაკლები შემოსავლები. ამ პირობებში მაინც ვეძებთ და ვპოულობთ გზებს როგორ შევინარჩუნოთ კადრები (ყველაზე დიდი პრობლემა), ბიზნესი არ გავხადოთ წამგებიანი და ინვესტორები არ გავაქციოთ ქვეყნიდან, თუმცა ძალიან რთულია მეპატრონეებთან ურთიერთობაში ასეთი წერილის შემდეგ სტაბილურობა შეინარჩუნო. მინიმუმ თბილისის STR -ში უნდა ჩაიხედო, booking. com - ის სტატისტიკა უნდა ამოიღო და რეალობა დაინახო, სანამ ინვესტორს ასეთ წერილს მისწერ“, - წერს შალვა ალავერდაშვილი.

სასტუმროების მენეჯერის  განცხადებით, ერთ-ერთმა კომერციულმა ბანკმა მისწერა ერთ-ერთი სასტუმროს ინვესტორს, რომ ტურიზმში ზრდა ფიქსირდება და გაუგებარია, 3 თვე რატომ ვერ ახერხებს სასტუმროს მენეჯმენტი სესხის მომსახურებას.

აღნიშნულ პოსტს საკუთარ Facebook-ზე ეხმაურება  ტურიზმის დეპარტამენტის ყოფილი უფროსი მაია სიდამონიძეც. „სავარაუდოდ, ესეთი ხასიათის წერილს მივიღებთ მალე ყველა სასტუმროს წარმომადგენელი.

ნოემბრიდან დაწყებული სასტუმრო ბიზნესი არის მკვეთრად დაცემული არა მარტო შარშანდელი წლის მაჩვენებლებთან შედარებით, არამედ საერთოდ ასეთი წელი გახსნიდან მოყილებული არ გვქონია. ამას ვაცხადებ მრავლობითში რადგან დიდი თუ პატარა სასტუმროს წარმომადგენელი ყველა ადასტურებს ამ ინფორმაციას პირად საუბრებში. მიზეზი ბევრია:

1. განთავსების საშუალებების სწრაფი ზრდა, რის გამოც მიწოდების ზრდამ გადააჭარბა მოთხოვნას და ყველა სასტუმროში დაეცა დატვირთვის კოეფიციენტი და საშუალო გასაყიდი ფასი.
2. რუსული ბაზრის ეფექტი.
3. დაბალმხარჯველიანი ტურისტები.
4. შიდა პოლიტიკური აურზაური მუდმივი.
5. კორონავურუსი.

მძიმე ზამთრის მერე ძლივს გაზაფხულის იმედი რომ გვქონდა ეხლა ჯავშნები უქმდება მომავალი თვეების. გაძვირდა პროდუქტები და დისტრიბუტორები ამბობენ, რომ ირანის ბაზარი რადგან ჩაიკეტა და აღარ შემოდის პროდუქტები იქიდან ეს არის მიზეზი. საბოლოო ჯამში, სასტუმრო ინდუსტრია არის სერიოზული დარტყმის ქვეშ და უკეთესი არაფერი გვემუქრება კორონავირუსის და საარჩევნო წლიდან გამომდინარე.

მისასალმებელი იქნება რომ ვინც კი ამ სექტორულ კვლევებს ატარებთ არ დაეყრდნოთ მხოლოდ საზღვრის გადაკვეთის ციფრებს და მეტად გაანალიზოთ რა ხდება სასტუმროებში და რა გარემოებები იწვევს ამ ყველაფერს.

მეორეს მხრივ, ყველა სასტუმროს ვალდებულებაა ამოვიღოთ ხმა და გავხადოთ ეს გამჭირვალე და არამარტო პირადი საუბრებით შემოვიფარგლოთ.

არის საშიშროება მალე ხელფასები ვეღარ გადავიხადოთ, სესხები და ეს უნდა იცოდეს საბანკო და საჯარო სექტორის წარმომადგენლებმაც. ესეთი გზით უფრო შევძლებთ ერთიანად პრობლემის გადაწყვეტას და პრობლემას ჯერ ჩვენი მხრიდან ჭირდება აღიარება რომ მომავალში ესეთი წერილები არ მივიღოთ“-წერს მაია სიდამონიძე. 

სოფო ქსოვრელი