ბიძინა ივანიშვილი არ არის ადამიანი, რომელიც ასეთ დროს სახელის მოხვეჭაზე ფიქრობს, აქამდეც, ოც წელზე მეტი დროის განმავლობაში ეხმარებოდა ქვეყანას და ჩვენმა საზოგადოებამ არც კი იცოდა, ეს საქმეები მისი მხარდაჭერით თუ კეთდებოდა. ვინც დღეს ამბობს, „სად არის ასეთ დროს ბიძინა ივანიშვილი?“ – ეს იგივე ხალხია, რომელიც წლები აცხადებდნენ, რატომ არის ჩართული ბიძინა ივანიშვილი სახელმწიფოს მართვაშიო. პოლიტიკურ ფარისევლებთან გვაქვს საქმე. რასაც ეფექტურად აკეთებს ახლა სახელმწიფო, ეს პოლიტიკური მენეჯმენტი, არის ბიძინა ივანიშვილის აწყობილი და ეს პოლიტიკური გუნდი არის „ქართული ოცნება“ – ასე უპასუხა საქართველოს პარლამენტის თავმჯდომარემ, არჩილ თალაკვაძემ ოპონენტების შეკითხვას, სად არის შექმნილ ვითარებაში ბიძინა ივანიშვილი.

ტელეკომპანია „იმედის“ ეთერში არჩილ თალაკვაძემ აღნიშნა, რომ ბიძინა ივანიშვილი ყოველდღიურ კავშირზეა პოლიტიკურ გუნდთან. ოპონენტების საპასუხოდ, პარლამენტის თავმჯდომარემ „ქართული ოცნების“ დამფუძნებელთან თანამშრომლობის პირადი მაგალითებიც მოიყვანა.

„ამ რამდენიმე დღეში, ორჯერ მქონდა მასთან კომუნიკაცია, სადაც შევთავაზე ორ სხვადასხვა საკითხთან დაკავშირებით კონკრეტული პროექტები და გადაწყვეტილებები, რაზეც, მუშაობა მისივე რჩევით დავიწყეთ და ხელშესახები შედეგებიც გვაქვს. ერთი ეს იყო კორონავირუსის საწინააღმდეგო სამკურნალო მედიკამენტის საკითხი, რომელზეც ჩვენს პარტნიორებთან თანამშრომლობა გვაქვს. მეორე, კორონავირუსთან დაკავშირებული ფონდის შექმნა იყო – ვთხოვე, რომ მას გაეკეთებინა ამასთან დაკავშირებით განცხადება და ეთქვა საზოგადოებისთვის, თუ რა პროგრესი გვაქვს და რას ვაპირებთ. მან უარი მითხრა ამაზე, მითხრა, რომ ამ ვითარებაში სახელმწიფო თანამდებობის პირების და სახელმწიფო ინსტიტუტებისგან ელოდება საზოგადოება ნაბიჯებს და გვირჩია, ეს გადაწყვეტილებები და სიახლეები ჩვენ მივაწოდოთ და ავუხსნათ ხალხს.

როცა ფონდმა „ქართუმ“ კორონავირუსით დაზარალებული მოქალაქეების დასახმარებლად ყველაზე მეტი რესურსი გამოყო – ამაზეც კი მას არ გაუკეთებია ხმამაღალი განცხადება. ბიძინა ივანიშვილი ხალხის გვერდით არის და მიაჩნია, რომ დღეს ვირუსის გავრცელებასთან ბრძოლა სახელმწიფო ინსტიტუტების და შესაბამისი თანამდებობის პირების საქმეა. თუ კითხვა არის, რომელი პარტია აკეთებს ამას და რომელი პოლიტიკური გუნდი მართავს ამ სიტუაციას ეფექტურად – ცხადია ეს პოლიტიკური გუნდის არის, „ქართული ოცნება“. ეს პოლიტიკური გუნდი ბიძინა ივანიშვილის მიერ არის შექმნილი“, – განაცხადა პარლამენტის თავმჯდომარემ.

მისი თქმით, მოყვანილი მაგალითებითაც შესაძლებელია დასკვნის გამოტანა, რომ ბიძინა ივანიშვილი გვერდით უდგას თავის ხალხს და ქვეყანას, მაგრამ ამ ვითარებაში ის სახელის მოხვეჭით არ არის დაკავებული.