„არავითარ იმედგაცრუებას ადგილი არ ჰქონია.  ჩემი პოზიცია იმასთან დაკავშირებით,  რომ 2020 წელს შერეული საარჩევნო სისტემა უნდა დარჩენილიყო,  არ გულისხმობდა იმას, რომ აუცილებლად ჩემს პარლამენტში დარჩენას ან ჩემს მაჟორიტარობას ვაძლევდი ხმას,“ - ასე აფასებს პარლამენტის მაჟორიტარი დეპუტატი ნინო წილოსანი მმართველი გუნდის მიერ მაჟორიტარობის კანდიდატების სიის პრეზენტაციას, რომელშიც თავად წილოსანი ვერ მოხვდა, მიუხედავად იმისა, რომ ერთერთი იყო ვინც პროპორციული სისტემის წინააღმდეგ მისცა ხმა.

შეგახსენებთ, მმართველმა გუნდმა მაჟორიტარი დეპუტატობის კანდიდატები დაასახელა. მაჟორიტარი დეპუტატების ნაწილი, რომლებმაც მაჟორიტარული სისტემის უპირატესობის მოტივით პროპორციულის ცვლილებები ჩააგდეს, „ქართული ოცნების“ ახალ სიაში ვერ მოხვდნენ. მათ შორის არიან ნინო წილოსანი, ენზელ მკოიანი, დაჩი ბერაია.

 ე.წ. პრინციპული მაჟორიტარებიდან კანდიდატობა წილად ხვდა ანზორ ბოლქვაძეს, გოჩა ენუქიძეს, სამველ მანუკიანს; დავით სონღულაშვილს, მიხეილ ყაველაშვილს, ხახუბია ირაკლის.

ერთი კვირით ადრე ნინო წილოსანმა ჟურნალისტებთან განაცხადა, რომ მზად იყო 2020 წლის არჩევნებშიც მაჟორიტარ კანდიდატად კენჭისყრისთვის, თუმცა სიის მიღმა დარჩენას აფასებს როგორც მმართველი გუნდის გადაწყვეტილებას ქვეყნის სასიკეთოდ.

„თითოეული პოლიტიკური გუნდი თავად გადაწყვეტს ვისზე შეაჩეროს არჩევანი. როგორც ადრე აღვნიშნე, მზად ვიყავი მაჟორიტარად კენჭისყრისთვის, თუ ჩვენი გუნდი ამას გადაწყვეტდა, მზად ვიყავი მიმეღო ეს გამოწვევა.  ვადასტურებ, რომ ჩემი ბმა გურიის რეგიონთან არის ერთერთი საკვანძო თემა, რატომაც მე პოლიტიკაში შემოვედი. თუმცა ყველა ჩემი გადაწყვეტილება თუ ნაბიჯი განპირობებულია საერთო და ქვეყნის ინტერესებიდან გამომდინარე და არა რამე პირადი ინტერესებით.

რაც შეეხება მაჟორტიტარული სისტემის მხარდაჭერას, მე თავად პრინციპს ვემხრობოდი, რაზეც დღემდე ვამბობ, რომ სწორი გადაწყვეტილება იყო. ის რაც 2020 წლის საარჩევნო მოდელის სახით მივიღეთ, იყო მეტნაკლებად გაწონასწორებული და დაბალანსებული მაჟორიტარული სისტემის სასარგებლოდ.  წარდგენილ მაჟორიტარულ კანდიდატებზე დიდ იმედებს ვამყარებ და ვთვლი, რომ თავიანთ სამაჟორიტარო ოლქებთან განსაკუთრებული ბმით და ურთიერთობით გამოირჩევიან.  მათ აქვთ რეიტინგი წარდგენილ ოლქებში და ბევრ შემთხვევაში კარგად იცნობენ იმ პრობლოემატიკას, რაც რეგიონებში იკვეთება. აქედან გამომდინარე, ვფიქრობ რომ სწორი პრონციპებით მოხდა ამ ადამიანების შერჩევა,“ - განმარტავს ნინო წილოსანი.

„ქართულმა ოცნებამ“  30-ვე მაჟორიტარი ერთმანდატიან მაჟორიტარულ ოლქში წარადგინა, აქედან 8 თბილისში, 22 კი რეგიონებში.

2020 წელს საპარლამენტო არჩევნები 120/30 საარჩევნო სისტემით ჩატარდება, საიდანაც 30 მაჟორიტარული წესით არჩეული დეპუტატი იქნება, 120 კი პროპორციული სისტემით.

საქართველოში საპარლამენტო არჩევნები 31 ოქტომბერს ჩატარდება.

მარიამ მორგოშია