აუცრელი დასაქმებულების ტესტირების საფასურის გადახდას ბიზნესი არ აპირებს. კომპანიების ხელმძღვანელები ,,კომერსანტთან“ ამბობენ, რომ მომსახურების გადასახადის დაფარვა ანტივაქსერ თანამშრომლებს საკუთარი ჯიბიდან მოუწევთ. აღნიშნულთან დაკავშირებით ისინი მთავრობის გადაწყვეტილებას მიესალმებიან და აცხადებენ, რომ საჭიროების შემთხვევაში, მიდგომა კიდევ უფრო გამკაცრდეს.
კომპანია ,,თელავის ღვინის მარანის“ დირექტორი ზურაბ რამაზაშვილი ამბობს, რომ ყველანაირად ცდილობს კომპანიაში დასაქმებულების აცრას და ამისთვის ყველა ხელშემწყობი პირობა აქვთ. თუმცა არიან აცრის მოწინააღმდეგეებიც და ცხადია, საკუთარი ტესტირების საფასურის გადახდა თვითონ მოუწევთ.
,,ტესტირებას ამ ეტაპზეც პერიოდულად ვატარებთ, რის ვალდებულებაც ბიზნესს აკისრია. ცხადია, სახელმწიფოს იმდენი რესურსი არ აქვს, რომ ყველა დააფინანსოს, მით უმეტეს ის ნაწილი, რომელიც ვაქცინაციას ემიჯნება. ცხადია, ამ ფულს მომავალში არც კომპანიები გადაიხდიან და დასაქმებულები საკუთარი ჯიბიდან დაფარავენ. მიმაჩნია, რომ სწორი მიდგომაა, ნებისმიერი საშუალებით უნდა მოხდეს მოქალაქეების ჩართვა იმუნიზაციის პროცესში, რაც მაღალი ინფიცირების ფონზე ერთადერთი გამოსავალია“, - ამბობს ზურაბ რამაზაშვილი.
მთავრობის გადაწყვეტილებას აფასებს კომპანია ,,კუმისის“ დამფუძნებელი ზურაბ უჩუნბეგაშვილი, რომელიც ღიად აცხადებს, რომ აუცრელი თანამშრომლების ტესტირებისთვის ფულს არ დახარჯავს.
„ადამიანების საკმაოდ დიდი ნაწილი დღესდღეობით არ იცრება პრინციპულად, ამ პროცესს კატეგორიულად ემიჯნებიან. მათი მხრიდან ფულზე საუბარი არ არის, ყველგან შეხვდებით მათ, არასწორი პოზიცია აქვთ აცრასთან დაკავშირებით და საფრთხეს უქმნიან როგორც საკუთარ, ასევე სხვების ჯანმრთელობასაც. მქონდა რამდენიმეჯერ საუბარი სამსახურში, რომ შეიძლება პრობლემა შეექმნათ, მაგრამ ზოგი მაინც უარს აცხადებს. ასეთ დროს მთავრობა უფრო პრინციპულიც უნდა გახდეს, თუკი ვინმე არ აიცრება, უნდა იცოდეს, რომ არ შევა არსად, არც ერთ ობიექტში, ვერ მიიღებს საჭირო მომსახურებას, დაკარგავს სამუშაოს და სხვა. რაც შეეხება საფასურის გადახდას, რასაკვირველია, დასაქმებულები გადაიხდიან. დამსაქმებელი რა შუაშია, ჩვენ ვუწევთ აგიტაციას, რაც შეგვიძლია. მიგვაჩნია, რომ აცრას ალტერნატივა არ აქვს“, - ამბობს ბიზნესმენი ,,კომერსანტთან“.
ზურაბ უჩუნბეგაშვილის ინფორმაციით, კომპანიაში სულ 200-მდე ადამიანია დასაქმებული, აქედან დაახლოებით 10-15%-ია, რომელიც აცრის წინააღმდეგია.
შეგახსენებთ, რომ 2022 წლის 1-ლი იანვრიდან დასაქმებული მოქალაქეები კორონავირუსზე სავალდებულო ტესტირებას სახელმწიფოს დაფინანსებით ვეღარ მიიღებენ.
მომავალი წლიდან ბიზნეს სუბიექტებს დასაქმებულთა ტესტირებისათვის საჭირო ხარჯების გაღება თავად მოუწევთ. შესაბამისი გადაწყვეტილება სავალდებულო ტესტირების შესახებ მთავრობის განკარგულებაში 18 ნოემბრის ცვლილებით შევიდა.
ბიზნეს სუბიექტებს დასაქმებულების ტესტირება ყოველ 14 დღეში ერთხელ ევალებათ.
მარი ჩიტაია