პოლიტიკური არასტაბილურობის პირდაპირი ასახვა საფონდო ბირჟზე გასული პარასკევის მონაცემებითაც კი აშკარა გახდა. ნიკა მელიას დაკავება და საერთაშორისო საზოგადოების შეშფოთება, რასაც არასტაბილურობის გამძაფრება შესაძლოა მოჰყვეს, „გალთ ენდ თაგარტის“ ანალიტიკოსების ვარაუდითაც შესაძელოა კაპიტალის ბაზარზე აისახოს.
„რა თქმა უნდა ცუდია ჩვენი სურათის დახატვისთვის ის, რაც დღეს ხდება საქართველოში. საბოლოო ჯამში მაინც მოლოდინებზეა კაპიტალის ბაზარიც დამყარებული. ქართული სამი კომპანიის აქტივი ივაჭრება როგორც ვიცით და პირდაპირ არიან მიბმული ჩვენს პოლიტიკურ ვითარებაზე. პოლიტიკური არასტაბილურობა განსაზღვრავს ამ აქციების მომავალს და ტრაექტორიასაც. არასტაბილურობა ყველაზე ცუდია, რამაც შეიძლება აქციების ფასებზე იმოქმედოს,“ - განმარტავენ „გალთ ენდ თაგარტში“
გასულ კვირას, პრემიერის გადადგომის შემდეგ ლონდონის ბირჟაზე განთავსებული ქართული კომპანიების კვირის ვაჭრობა „წითელ ზონაში“ დასრულდა.
თიბისი კაპიტალის მონაცემებით, ლონდონის საფონდო ბირჟის პარასკევის სავაჭრო სესიაზე, თიბისი ბანკის ჯგუფის (TBCG LN) აქციები 11.46 ბრიტანულ ფუნტ სტერლინგზე, წინა კვირის მაჩვენებელზე 5.4%-ით დაბალ ნიშნულზე დაიხურა. კვირის განმავლობაში ვაჭრობის მოცულობა 185.4 ათას აქციას გაუტოლდა.საქართველოს ბანკის ჯგუფის (BGEO LN) 128.6 ათასი აქცია ივაჭრა, დახურვის ფასმა კი 11.14 ბრიტანული ფუნტი სტერლინგი (-2.6% კვ/კვ) შეადგინა.
საქართველოს კაპიტალის (CGEO LN) აქციები ლონდონის საფონდო ბირჟაზე გასულ პარასკევს 5.15 ბრიტანულ ფუნტ სტერლინგზე (-2.3% კვ/კვ) დაიხურა, ვაჭრობის მოცულობამ კი 133.9 ათასი შეადგინა.
რაც შეეხება კომპანიების კაპიტალიზაციას: თიბისის კაპიტალიზაცია 632 მლნ ფუნტია, საქართველოს ბანკის 548 მლნ, ხოლო საქართველოს კაპტალის - 247 მლნ.