გასული წელი განსაკუთრებით რთული იყო საყოფაცხოვრებო ტექნიკის ბაზრისთვის. 2019 წლის დასაწყისში ამოქმედებულმა საბანკო რეგულაციებმა სექტორს დიდი დარტყმა მიაყენა, კომპანიებს გაყიდვები გაუნახევრდათ.  ტექნიკის მაღაზიები ამ დრომდე სხვადასხვა აქტივობებით ცდილობენ იმ ზარალის დაკომპენსირებას, რომელიც ეროვნული ბანკის გადაწყვეტილებით მიადგათ. ზოგიერთმა მათგანმა საცალო ქსელის გააფართოვა, ზოგმა კი საბითუმო და ონლაინ გაყიდვების მიმართულების გაძლიერება  დაიწყო.

„კომერსანტი“ დაინტერესდა, დღეს რას მიიჩნევს ტექნიკის ბაზარი სექტორი ყველაზე დიდ გამოწვევად. „ბეკო“- ს გენერალური დირექტორი მეჰმედ მელექი აცხადებს, რომ არასტაბილური პოლიტიკური გარემო და მძიმე სოციალურ ეკონომიკური მდგომარეობა დღეს ბიზნესის ყველაზე დიდი გამოწვევაა, როგორც ერთ-ერთი უმსხვილესი საყოფაცხოვრებო ტექნიკის მწარმოებელი კომპანიის დირექტორი ამბობს, ქვეყანაში შექმნილი მდგომარეობა ბიზნესის განვითარებას აფერხებს.

„ტექნიკის ბაზრის ყველაზე დიდი გამოწვევა ქვეყნის ეკონომიკური მდგომარეობაა, ხალხი გაღარიბებულია და სოციალურ-ეკონომიკური მდგომარეობა დღითიდღე უარესდება. მას შემდეგ, რაც  საბანკო რეგულაციები გამკაცრდა,  ჩვენი გაყიდვები შემცირებულია. შემცირებულია მსყიდველუნარიანობაც, თუმცა ჩვენი შეღავათებით და ფასდაკლებებით რთული პერიოდის გადალახვა შევძელით. გარდა ამისა, უარყოფითად მოქმედებს გაუფასურებული ლარის კურსიც.  თუ ეკონომიკური და პოლიტიკური მდგომარეობა  საქართველოში სტაბილური იქნება, დანარჩენი პრობლემები ყველაფერი მოგვარდება. არჩევნები გვიახლოვდება და იმედია, ყველაფერი კარგად ჩაივლის. წინააღმდეგ შემთხვევაში, უარყოფით ეფექტს ბიზნესის ყველა სექტორი იგრძნობს“- აცხადებს მეჰმედ მელექი.

„კომერსანტთან“ საუბარში, მეჰმედ მელექისგან განსხვავებით, სულ სხვა პრობლემაზე ამახვილებს ყურადღებას „ტექნო ბუმის“ დამფუძნებელი ანზორ ქოქოლაძე. ბიზნესმენი მიიჩნევს, რომ კორონავისურმა, რომელიც მთელი მსოფლიოს პრობლემას წარმოადგენს, შესაძლებელია საქართველოს ეკონომიკის განვითარება მნიშვნელოვანად შეაფერხოს.

„ყველაზე მთავარი პრობლემა, რომელმაც დიდი გავლენა მოახდინა ტექნიკის ბაზარზე  იყო საბანკო რეგულაციები და ლარის კურსი. თუმცა, ახლა არსებობს კორონავირუსის საფრთხე, თუკი ეს მასშტაბურ სახეს მიიღებს და ტურისტულ სეზონს საფრთხე შეექმნება, ეს ავტომატურად გავლენას ბიზნესის ყველა სფეროზე მოახდენს. ტურისტული სექტორის წილი ეკონომიკაში შეიძლება 8 პროცენტამდეა მაგრამ, ირიბი გავლენა ბიზნეს სექტორებზე სამშენებლო მიმართულებით იქნება, ეს სასტუმროების მიმართულებით თუ ტექნიკის მიმართულებით საკმაოდ დიდია. რა თქმა უნდა აისახება ლარის კურსზეც  და თუ კი უფრო სტრესულად განვითარდება პროცესი და ტურისტულ სეზონზე მნიშვნელოვნად აისახა ვფიქრობ, რომ დიდი გამოწვევების წინაშე დავდგებით. ვიმედოვნებ, რომ ეს არ მოხდება“- განმარტავს ანზორ ქოქოლაძე.

ბაჩო ადამია