„ჩვენი პრობლემა ბორჯომთან დაკავშირებით მარტო ის არ არის, რომ ფრიდმანს აქვს პრობლემა სანქციებთან დაკავშირებით. ჩვენი პრობლემა ისიც არის, რომ ბორჯომი როგორც ბრენდი ნორმალურ ბაზრებზე იქნა გაფუჭებული“, - ამის შესახებ რადიო „კომერსანტის“ გადაცემაში „კომერსანტი live“ პოლიტოლოგმა გია ხუხაშვილმა განაცხადა.
მისივე თქმით, სანამ ფრიდმანი ამ სასანქციო სიაში მოხვდებოდა, მანამდე ბალტიის ქვეყნებმა ბორჯომის იმპორტი აკრძალეს იმ მიზეზით, რომ ეს იყო რუსული პროდუქტი, რაც ხუხაშვილის თქმით ბრენდული ზიანია.
„აქედან გამომდინარე ჩვენ ეს უნდა ჩამოვირეცხოთ, ბორჯომი არ არის ჩვეულებრივი ბრენდი, ჩვენ ასეთი ანალოგი საქართველოში არ გვაქვს, რომლის დაფუძნებაში და ბრენდირებაში ასწლეულების მანძილზე ასეულობით მილიონი ლარებია ჩადებული და ახლა რუსული ბრენდი რომ დაერქვას და მისთვის დაიკეტოს მთელი დასავლური ბაზარი, ეს კატასტროფაა, აქ მრავალასეულ მილიონ დოლარზეა საუბარი.
ვფიქრობ ფრიდმანი საერთოდ უნდა გავიდეს, არანაირი სახვეწარი ფრიდმანთან არ გვაქვს, ჩვენ შეგვიძლია წარმოების ნაციონალიზაცია. წარმოება კი არის ფრიდმანის, მაგრამ წყალზე ლიცენზიას გასცემს სახელმწიფო, სამწუხაროდ ცოტა ხნის წინ ეს ლიცენზია 25 წლით გაგრძელდა, სალიცენზიო პირობებში ალბათ მოცულობები განსაზღვრულია თუ რამდენი და როგორ უნდა ჩამოასხას, რადგან ფრიდმანის წარმოება დღეს ამ სალიცენზიო პირობებს ვერ ასრულებს, მას უნდა ჩამოერთვას ლიცენზია და გამომდინარე იქიდან, რომ სხვა წარმოება საქართველოში რომელიც ამ სალიცენზიო პირობებს შესარულებს არ არსებობს, უნდა მოხდეს წარმოების ნაციონალიზაცია. ნაციონალიზაციაში არ ვგულისხმობ რომ წავართვათ, უნდა გადავუხადოთ გონივრული ფასი და გავუშვათ“, - აღნიშნა გია ხუხაშვილმა.
თაკო კვაჭანტირაძე