„არც ველოდით აუზების დახურვას, რადგან მთელი მსოფლიო აღიარებს, რომ წყლით კორონავირუსი არ გადადის. ეს ყველაფერი არ ყოფილა ჩვენთან გავლილი და კარგი იქნებოდა, გვცოდნოდა,“ - საცურაო აუზების კიდევ ორი თვით დახურვის შესაძლო შედეგებსა და მიზანშეწონილობაზე „კომერსანტს“ ვაკის საცურაო აუზის საზოგადოებასთან ურთიერთობის სამსახურში ესაუბრნენ.

როგორც უკვე ცნობილია, კორონავირუსის გავრცელების პრევენციის მიზნით, 28 ნოემბრიდან მაღაზიები, რესტორნები, ფიტნესცენტრები და საცურაო აუზები დაიხურა. შეზღუდვები 2 თვეს - 31 იანვრამდე გრძელდება.

როგორც „ვაკის საცურაო აუზის“ საზოგადოებასთან ურთიერთობის სამსახურში ამბობენ, აუზებში მარეგულირებლის მიერ ყოველკვირეულად მოწმდებოდა წყალი და  რეგულაციების სხვა პირობები, ამის გათვალისწინებით, მთავრობის გადაწყვეტილება სექტორისთვის გაუგებარი და მოულოდნელი იყო.

„თქმა არ სჭირდება იმას, რომ ხელმეორედ ბიზნესის დახურვა მძიმეა ჩვენთვის, მაგრამ ჩვენ ვიცავდით ყველა რეგულაციას და ინფიცირების ერთი შემთხვევაც კი არ დაფიქსირებულა კომპლექსში.

ეს შეზღუდვები არ იყო ჩვენთან გავლილი და კარგი იქნებოდა გვცოდნოდა. მსოფლიო ჯანდაცვის ორგანიზაციამაც აღნიშნა, რომ კორონავირუსი არ გადადის წყლით. ჩვენ ვაქცევდით ამ ყველაფერს იმაზე მეტ ყურადღებას ვიდრე შესაძლებელი იყო. ამასთან, ჩვენი კომპლექსი, გარდა წყლის ტერიტორიისა,  იმდენად დიდ სივრცეს მოიცავს, რომ მაქსიმალურად უსაფრთხოდ გრძნობდა თავს მომხმარებელი. მსოფლიო ჯანდაცვის ორგანიზაცია იმასაც ამბობს, რომ ადამიანმა მეტი ყურადღება გაჯანსაღებას უნდა მიაქციოს. გვყავს კლუბის 2000-ზე მეტი წევრი, რომელიც ასევე გაურკვევლობაში აღმოჩნდა.

ბევრი ამბობს, რომ რამე რეაგირება უნდა მოვახდინოთ, მაგრამ ალბათ, ამ გადაწყვეტილებას არ შეცვლიან. თუმცა, სჯობდა, რომ ჯერ ჩვენთვის ეკითხათ და სჯობდა რამე სხვა შეზღუდვები დაეწესებინათ იმ პირობებში, რომ ყოველ კვირა ამოწმებენ აუზებს და ვფიქრობ არ იყო დახურვა საჭირო. ფიტნეს ზონის დახურვას შევეგუებოდით, რადგან ჩვენი ინტერესია არ გავრცელდეს პანდემია მომხმარებელზე და დავთმობდით ამ ზონას. ცოტა არ იყოს,  გააბრაზეს ჩვენი მომხმარებლებიც“ - განმარტავენ „ვაკის საცურაო აუზში“ .

პირველი ლოქდაუნის პირობებში,  ვაკის საცურაო აუზის ფინანსური ზარალი მილიონ ლარს გაუტოლდა, ამის შესახებ კომპლექსის საოპერაციო მენეჯერმა მიხეილ გოგოლაძემ აღნიშნა. ამ პერიოდში თანამშრომლებს ხელფასები სრულად გაეცათ და აუზის თანამშრომლები არ გათავისუფლებულან.

მარიამ მორგოშია