საწვავის გაზრდილი ფასების გამო, საქართველოში საქალაქთაშორისო მგზავრობის ღირებულება ბოლო პერიოდში თითქმის არ შეცვლილა. ,,დიდუბის ავტოსადგურის“ ხელმძღვანელი, ნესტორ მიქატაძე „კომერსანტთან“ ამბობს, რომ რიგი მიმართულებებით მგზავრობა მაქსიმუმ 5%-ით გააძვირდა, თუმცა მიუხედავად საჭიროებისა, არალეგალური კონკურენციის გამო ფასების კიდევ დაკორექტირება ვერ ხერხდება.

„მიუხედავად იმისა, რომ მცირედით გაძვირდა ტრანსპორტი და საწვავის ფასების კუთხით კატასტროფული მდგომარეობაა, მნიშვნელოვან გაძვირებას  ფიზიკურად ვერც ვახერხებთ არალეგალური კონკურენციის გამო. ე.წ. ხიშნიკები, რომლებიც საბიუჯეტო გადასახადებს არ იხდიან და შესაბამისად, ბევრად იაფი უჯდებათ ფუნქციონირება, ავტოსადგომებთან ახლოს არიან ჩასაფრებულები და მგზავრებს შედარებით დაბალ ფასს სთავაზობენ. ისინი არც უსაფრთხოების წესებს იცავენ და ტექინსპექტირებაც უმეტეს მათგანს გავლილი არ აქვს. მიუხედავად იმისა, რომ სერიოზული ფინანსური პრობლემები გვაქვს, ბოლო თვეა, ჩვენთან ფასები ფაქტობრივად არ შეცვლილა“, - ამბობს ნესტორ მიქატაძე.

მისი თქმით, საქალაქთაშორისო ტრანსპორტის ფასები მარტში დაახლოებით 10-15%-ის ფარგლებში გაძვირდა და მას შემდეგ, მიუხედავად ზაფხულის დატვირთული სეზონის და მგზავრთნაკადის ზრდისა, თითქმის არ შეცვლილა. 

,,15 მარტს ახალი ტარიფები მძღოლების მოთხოვნით დადგინდა. გაძვირდა ბათუმის, ქუთაისის, წყალტუბოს და ტყიბულის მიმართულებები. ამ ეტაპზე, მიუხედავად იმისა, რომ სეზონია და საწვავიც გაძვირდა ფასები დიდად არ შეცვლილა, 25-30 ლარის ფარგლებში მერყეობს. მგზავრთნაკადიც შედარებით გაზრდილია, თუმცა ისევ ადგილობრივების ხარჯზე, ტურისტების ზრდა ჩვენზე ნაკლებად აისახება ხოლმე, ისინი უფრო სხვა სახის ტრანსპორტს ანიჭებენ უპირატესობა“, — აღნიშნავს ნესტორ მიქატაძე.

თბილისი-ქუთაისის მიმართულებით მგზავრობა 15 ლარი ღირს, ბორჯომის მიმართულებით - 10 ლარი, ხოლო ბათუმის მიმართულებით 25 ლარი.

ნინო თამაზაშვილი