მესამე უარი პარლამენტს ჯანდაცვის მინისტრ  ეკატერინე ტიკარაძისგან. მინისტრის არაკვალიფიციურობა თუ კითხვებზე თავის განზრახ არიდება. ეკატერინე ტიკარაძის  გადაწყვეტილებას დამოუკიდებელი დეპუტატი ლევან კობერიძე არაპროფესიონალურ ნაბიჯად და კანონის დარღვევად  აფასებს.

კობერიძე მიიჩნევს, რომ მინისტრის პარლამენტში არ მისვლა, კომიტეტის შეურაცხყოფაა და მისი თქმით, მსგავსი ფაქტები  ცირკში ხდება.

„უკვე მესამედ დაარღვია კანონი მინისტრმა და მსგავსი არასერიოზული საქციელი მხოლოდ  შაპიტოს ცირკში ხდება. ის მორჩილი მდუმარებაც გამაღიზიანებელია,  რომელიც მე მოვისმინე კომიტეტისგან. ეს ჩემთვის იყო გასაკვირი და დავტოვე სხდომა. ჯანდაცვის მინისტრზე ასე ირიბად გადაფარება ჩემთვის წარმოუდგენელია. „ ქართული ოცნების“ მაღალჩინოსნებს, როდესაც ნაციონალური მოძრაობის წარმომადგენლები იბარებენ  ყოველგვარი პრობლემის გარეშე მოდიან, ჩვენთან კი კომპეტენცია არ ჰყოფნით. არც ეკატერინე ტიკარაძეს არ აქვს მინისტრის შესაბამისი კომპეტენცია  და პასუხების გაცემას ვერ შეძლებს, შესაბამისად, მისი ქცევა თავის არიდებაა.კომიტეტის შეურაცყოფაა ის, რომ როდესაც დღეს კომიტეტი იმართებოდა და პარალელურად ექსპერტებთან გამართა შეხვედრა იმ თემაზე, რაზეც პარლამენტში უნდა გვემსჯელა. ექსპერტებს მოვუწოდებ, რომ  ხელს ნუ უწყობენ არაპროფესიონალ მინისტრს და ზურგს ნუ უმაგრებენ,“-აცხადებს ლევან კობერიძე.

პარლამენტის ჯანდაცვის კომიტეტის  „დამოუკიდებელი  დეპუტატის“  თქმით,  კომიტეტს ჯანდაცვის მინისტრთან ოთხი კითხვა ჰქონდათ, რომელიც პასუხგაუცემელი დარჩა. პანდემიის შემგომი რეაგირება და 520-ე დადგენილება, ეს ის ძირითადი თემებია, რომელზეც ჯანდაცვის მინისტრმა საუბარი არ ისურვა.

„რეალურად  საკარანტინო შეზღუდვების მოხსნის შემდეგ  იწყება ყველაზე რთული პერიოდი,  ეპიდემიოლოგიასთან დაკავშირებით.  აუცილებელი იყო მინისტრს დღეს თავისი ხედვა წარმოედგინა, თუ რა პროგნოზი აქვს კონკრეტულ საკითხზე. რამდენადაა ჯანდაცვის სექტორი მზად.  მე მაქვს ინფორმაცია რომ არ არის მომზადებული, მას  რომ  დაესაბუთებინა არგუმენტირებულად და ამ საკითხზე გვემსჯელა მაგრამ თავი აარიდა  და კითხვაზე პასუხებს გაექცა. მეორე საკითხი არანაკლებ მნიშვნელოვანი -  520-ე დადგენილებაა. ამ თემაზეც უნდა გვემსჯელა,  პრემიერი დაგვპირდა, რომ  გარკვეული კორექტირებები შევიდოდა დადგენილებაში.  ასევე უნდა შევხებოდით  სოციალური მუშაკების გათავისუფლების საკითხს, როდესაც  კოვიდ - 19-მდე გაათავისუფლა ჯანდაცვის მინისტრმა სოციალური მუშაკები ყოველგვარი  ახსნის გარეშე. მეოთხე  საკითხი ეხებოდა ეპიდემიოლოგიურ სურათს, რომელიც ქვეყანაშია და ამაზეც ვერ მივიღეთ პასუხი.  გვქონდა  კონკრეტული ჯანდაცვის საკითხები, რომელიც პოლიტიკური დღის წესრიგისგან მკვეთრად გამიჯნულია, რადგან  არ ვაპირებ ქალბატონ ეკატერინე ტიკარაძესთან პოლიტიკურ დისკუსიაში შესვლას, ამისთვის საკმაოდ სუსტია და ვერ შეძლებს დებატებს,“-აღნიშნა ლევან კობერიძემ.

ნათია ლომიძე