საქართველო არაბი ტურისტებისთვის რომ მიმზიდველი ქვეყანაა, ამას სტატისტიკის გარდა ტურისტულ ადგილებში მათი სიმრავლეც მოწმობს. არაბი ტურისტების მოზიდვაზე ზრუნვას მთავრობაც აქტიურად ცდილობს. მაგალითად, რამდენიმე დღის წინ საქართველოს ეკონომიკისა და მდგრადი განვითარების მინისტრის მოადგილე მარიამ ქვრივიშვილმა საუდის არაბეთში წამყვანი ტურისტული სააგენტოებისა და უმსხვილესი ავიაკომპანიების ხელმძღვანელებისთვის პრეზენტაცია გამართა და აღნიშნა, რომ საუდის არაბეთი საქართველოსთვის ერთ-ერთი ყველაზე მნიშვნელოვანი სამიზნე ქვეყანაა.
„საქართველო ყველაზე მოთხოვნადი ტურისტული მიმართულებაა წელს საუდის არაბეთში, რადგან საქართველო არის უსაფრთხო მიმართულება, აქვს ოთხი სეზონი, მიმზიდველი ტურისტული პროდუქტები. მიმდინარე ზაფხულის ტურისტული სეზონი იქნება გამორჩეულად მაღალი მოთხოვნის სეზონი და ჩვენ ვიხილავთ ძალიან ბევრ მხარჯველუნარიან ტურისტს საუდის არაბეთიდან საქართველოში“, – განაცხადა მარიამ ქვირიშვილმა.
თუმცა ქართული ტურისტული კომპანიების უმეტესობა „კომერსანტთან“ ამბობს, რომ არაბი ტურისტების გაზრდილი რაოდენობა არც ადგილობრივი ტურისტული კომპანიებისთვის და არც ქვეყნის ეკონომიკისთვის მნიშვნელოვანი შემოსავლის წყარო არ არის.
ტურისტული კომპანია Georgian Holiday-ის ხელმძღვანელი მანანა ცირამუა „კომერსანტთან“ აღნიშნავს, რომ არაბ ვიზიტორებს საქართველოში ძირითადად მათივე ქვეყნის ტურისტული კომპანიების შვილობილი სააგენტოები ემსახურებიან და ეს თანხებიც მათთან რჩება.
„ყველაზე დიდი რაოდენობით და უფრო თამამად მიმდინარე სეზონზე საქართველოში მოდიან არაბული ქვეყნებიდან. ამ ქვეყნებიდან შემოსული ტურისტების რაოდენობა საკმაოდ დიდია, ისინი მოგზაურობენ როგორც ინდივიდუალურად, თავისით დაგეგმილი ტურით, ასევე ტურისტული კომპანიების საშუალებით. თუმცა აქ ყველაზე მთავარია, რომ მსხვილი არაბული ტურისტული კომპანიების ნაწილს აქ შვილობილი კომპანიები აქვთ გახსნილი და თავიანთ ქვეყანაში დიდი მარკეტინგულ კამპანიას აწარმოებენ საქართველოში მოგზაურობასთან დაკავშირებით. შემდეგ კი, თვითონვე აკონტროლებენ მათ გადაადგილებას, დაბინავებას და ა.შ. სწორედ იმ სასტუმროებსა თუ აპარტამენტებში, რომლებიც მათი საკუთრებაა.
შესაბამისად, არაბ ვიზიტორებს საქართველოში ძირითადად მათივე ქვეყნის ტურისტული კომპანიების შვილობილი სააგენტოები ემსახურებიან, იქ მიჰყავთ სადაც ისევ თვითონ იღებენ სარგებელს და ეს თანხებიც მათთან რჩება. საქართველოში მხოლოდ რამდენიმე ადგილობრივს ასაქმებენ, თუმცა ის თანხები რაზეც ქართული შემომყვანი ტურისტულები მუშაობენ, ისევ იქეთ მათ ქვეყანაში გადის, აქ მხოლოდ მინიმალურ საოპერაციო ხარჯებს სწევენ“, - ამბობს მანანა ცირამუა.
2022 წლის 5 თვის მონაცემით, ახლო და შუა აღმოსავლეთიდან საქართველოში 43 ათასზე მეტი ტურისტი შემოვიდა, რაც პანდემიამდელ 2019 წელთან შედარებით თითქმის 47%-იანი ზრდაა. საანგარიშო პერიოდში კონკრეტულად საუდის არაბეთიდან კი 13 ათასამდე ტურისტია შემოსული რაც 2019 წლის მონაცემებს 165%-ით აღემატება. გარდა ამისა, საერთაშორისო ვიზიტორების მიერ საქართველოში განხორციელებული ვიზიტებით საუდის არაბეთი მეთერთმეტე ადგილზეა. 5 თვეში არაბთა გაერთიანებული საემიროებიდან 3502, ქუვეითიდან კი 5210 ვიზიტორი შემოვიდა.