„დღეს არსებულ
სიტუაციაში განზრახ ისეთი ტიპის განცხადებების კეთება, რომელიც ხელოვნურად დათესავს პანიკას, არის ყოვლად
დაუშვებელი. მაგალითად, გერმანიიდან იმპორტირებულ ორგანულ ბრინჯზე აქცენტის გაკეთება, რომელიც ღირს 7 ლარამდე
და საჯაროდ საუბარი, რომ გუდვილში ბრინჯი მთლიანად
შვიდი ლარი ღირს ეს არის ისეთი დამოკიდებულება, რომელსაც არ უნდა ჰქონდეს ადგილი არცერთ შემთხვევაში.
ორგანული ბრინჯი შეიძლება 7 ლარიც იყოს და
15 ლარიც, მაგრამ ქსელში არის დაბალფასიანი
ბრინჯიც და საშუალოფასიანიც, რათა მომხმარებელს ჰქონდეს არჩევანი და ხელმისაწვდომობა
ნაკლებძვირიან პროდუქტთან.“ - ასე ეხმაურება ჰიპერმარკეტ „გუდვილის“ გენერალური დირექტორი გიორგი ხაბაშვილი საზოგადოებაში მოარულ ხმებს პროდუქტის არსებულ თუ მოსალოდნელ გაძვირებაზე.
როგორც ცნობილია, კორონავირუსის პანდემიის გავრცელების ერთერთი ნეგატიურ შედეგად პანიკის ფონზე მოსახლეობაში საკვები და საოჯახო პროდუქტების ჭარბად მომარაგებისა და ჰიპერმარკეტების გამოცარიელების მზადყოფნა შეგვიძლია მოვიაზროთ. რის შედეგადაც დაიწყო საუბრები, რომ სავაჭრო ობიექტები, ჰიპერმარკეტები, ყველაზე მოთხოვნად პროდუქციაზე ფასებს აძვირებენ და არსებული მდგომარეობის თავიანთ სასიკეთოდ გამოყენებას ცდილობენ.
„კომერსანტის“ კითხვაზე, არის თუ არა ფასები გაძვირებული და მოსალოდნელია თუ არა პროდუქციის ფასებში ცვლილება, „გუდვილის“ გენერალური დირექტორი გიორგი ხაბაშვილი პასუხობს, რომ ჰიპერმარკეტების ქსელი ყველაფერს აკეთებს იმისთვის, რომ არსებული ფასები შენარჩუნდეს, ხოლო ამაზე ხმების გავრცელება არსებულ მძიმე პირობებში სოციალური უპასუხისმგებლობის მაჩვენებელია.
„სამოქალაქო თვითშეგნების საკითხია, რომ არ მოხდეს მომხმარებელში ხელოვნურად ისეთი ტიპის მანიპულაციები, რომ ესა თუ ის კომპანია წარმოჩინდეს ნეგატიურად. დღესდღეობით, ქიმიის, პარფიუმერიის და ოჯახის მოვლის პროდუქციაზე ერთ-ერთი ყველაზე დაბალი ფასია გუდვილში. დაბალფასიანი ბრინჯიც არის გუდვილში და დაბალფასიანი ქაღალდიც .
ჩვენ მაქსიმალურად ვცდილობთ, რომ ფასების ზრდა არ მოხდეს, თუმცა ჩვენ დამოკიდებული ვართ მოსაწოდებელ ფასზე ანუ ბაზარზე არსებულ ფასზე. თუ რომელიმე ხილი ან ბოსტნეული ბაზარზე ძვირდება, ეს ასახვას ჰპოვებს სარეალიზაციო ფასზეც. ჩვენ არ გაგვიზრდია ჩვენი დარიცხვა, ჩვენი მოგება არის შემცირებული იმის გამო რომ, ბაზარზე არსებულ ფასთა ცვლილებებმა დიდად არ იმოქმედოს სუპერმარკეტში არსებულ ფასებზე.
იმ პროდუქტებზე რომელზეც არის გაზრდილი მოთხოვნა, იქნება ეს შაქარი, წიწიბურა მაკარონი, ბრინჯი თუ სხვა, ჩვენ გვაქვს ბევრნაირი შეთავაზება - დაბალფასიანი, საშუალო და მაღალფასიანი პროდუქტების, ხარისხისა და წამოების მიხედვით. თუ რომელიმე პროდუქტი ეძვირა მომხმარებელს, ეს არ ნიშნავს, რომ ფასები გაძვირდა, ჩვენ მაქსიმალურად ვაკავებთ გაძვირების პროცესს. იმ ძირითად პროდუქტებზე, რომელზეც არის გაზრდილი მოთხოვნა გულდვილს ფასნამატი არ გაუზრდია და ამას სრული პასუხისმგებლობით ვაცხადებ.“ - აღნიშნა ხაბაშვილმა.
რაც შეეხება მოარულ ხმებს პროდუქტების შესაძლო გაძვირებებზე და უნდა დაინტერესდეს თუ არა ამ საკითხით სამართალდამცავი ორგანოები, შესაბამისად, უნდა დადგეს თუ არა ვინმეს პასუხისმგებლობის საკითხი, ხაბაშვილი ამაზე ამ ეტაპზე ვერ საუბრობს და აცხადებს, რომ ახლა უჭირს ვინმეს პასუხისმგებლობებზე საუბარი.
მარიამ მორგოშია