„მარტივი აზროვნებიდან, ცოტა კომპლექსურ და გრძელვადიან აზროვნებაზე უნდა გადაეწყოს ბიზნესი, მათ შორის სატრანზიტო მიმართულებით. სატრანზიტო კომპანიებს უნდა ესმოდეთ, რომ დღეს გაკეთებული კარგი შეთავაზებით, შესაძლოა გრძელვადიანი ურთიერთობების დამყარება და სატრანზიტო კომპანიების სამუდამოდ გადმობირება“, — ამის შესახებ ეკონომიკის დოქტორმა, პროფესორმა, თსუ–ს ანალიზისა და პროგნოზირების ცენტრის დირექტორმა ვახტანგ ჭარაიამ, გიორგი აბაშიშვილის საავტორო გადაცემაში „ბიზნეს ინსაიდერი“ განაცხადა.

მისი თქმით, ტარიფების გადახედვა და ტრანზიტის პროცედურების გამარტივება სხვა დეტალების მოგვარებასთან ერთად, მოგვცემს საშუალებას რუსეთ-უკრაინის ომის გამო შემოსული ინვესტორი, არა დროებით, არამედ სამუდამოდ გადმოვიბიროთ.

„შუა დერეფნის საკითხი ახლა ძალიან მნიშვნელოვანია და ყველაზე აქტუალურია. თუმცა უნდა გავითვალისწინოთ, რომ მარტო საქართველოზე არ არის ეს დამოკიდებული, ჩვენ უნდა დავალაგოთ ეკონომიკურ ურთიერთობები მეზობელ ქვეყნებთან და ქვეყნის შიგნითაც ბევრია სამუშაო, მათ შორის თუნდაც ტარიფების გადახედვა, ტრანზიტის პროცედურების გამარტივება, რომ ინვესტორს გასვლა არ მოუნდეს ქვეყნიდან, ამაზე არის დღესვე სამუშაო.

თუმცა ბოლო პერიოდის ჩემი დაკვირვებები მაძლევს იმის თქმის საფუძველს, რომ ნაცვლად იმისა, რომ ვიზრუნოთ ტარიფების შემცირებაზე, სატრანზიტო კომპანიებისთვის უფრო მოქნილი პაკეტების შეთავაზებაზე, პირიქით. გვგონია რომ როცა მათი რაოდენობა იზრდება, რატომ უნდა გავამარტივოთ რამე? რატომ უნდა დავთმოთ როცა ბუნებრივი ზრდა გვაქვს? თუმცა ეს მიდგომა ჩვენ მოგვცემს იმას, რომ როგორც კი რუსეთ-უკრაინის ომი დამთავრდება ან სანქციები შესუსტდება, ეს ტრანზიტული ტვირთი საქართველოდან გაქრება და გადავა ისევ რუსეთში, სწორედ ეს არ უნდა დავუშვათ. 

ჩვენ შეგვიძლია უკრაინას თუ ევროკავშირის ქვეყნებს მივცეთ შესაძლებლობა, რომ რუსეთს აარიდონ თავი და ჩვენი სატრანზიტო დერეფანი გამოიყენონ. უკრაინის დახმარება და რუსეთის შესუსტება გადის სწორედ მათთვის გარკვეული ტვირთების წართმევით და საქართველოზე გატარებით“, — ამბობს ვახტანგ ჭარაია.