საქართველოში უკვე მორედ, საქართველოს მთავრობამ კარანტინი გამოცხადა, ოფიციალურად ხელისუფლებამ წერტილოვანი შეზღუდვები აამოქმედა თუმცა, მათი გადაწყვეტილებით ქვეყანა რეალურად ისევ დაიკეტა. ათი ათასობით ადამიანი, ორი თვით, ჩაკეტილ ქალაქებში უმუშევრები, შემოსავლის გარეშე დარჩნენ.
გაჩერებული საზოგადოებრივი ტრანსპორტი, დაკეტილი სავაჭრო ცენტრები, ბაზრობები, ფიტნეს დარბაზები, აუზები, რესტორნები და კვების ობიექტები - ეს საქართველოს ახალი რეალობაა. რეალობა რომელშიც ყოველდღიურად 4 000 ახალი ინფიცირებულია, რეალობა რომელშიც მმართველი გუნდის წევრები ყოველდღიურად ამტკიცებენ, რომ ჯანდაცვის სისტემა კოლაფსის წინაშე არაა, რეალობა რომელში რადიკალურად განსხვავებულია ჰოსპიტალური სექტორის წარმომადგენლების აზრები, რეალობა რომელშიც რეალურად კოვიდ დადებითიც და უარყოფითი ადამიანებიც მარტო დარჩნენ.
მიიღო თუ საქართველოს მთავრობამ სწორი გადაწყვეტილება და რატომ აღმოჩნდა ქვეყანა რთულ ეპიდემიოლოგიურ და ეკონომიკურ მდგომარეობაში. საკითხზე "ახალი ეკონომიკური სკოლა - საქართველოს" პრეზიდენტი პაატა შეშელიძე საუბრობს. ეკონომისტი მიიჩნევს, რომ აქცენტების შეზღუდვაზე გაკეთება მცდარია. მისი თქმით, ბევრად უფრო გონივრული მოტივაციაზე და ჯანდაცვის სისტემის რეორგანიზაციაზე ორიენტირებული გადაწყვეტილების შემოთავაზება იქნებოდა. როგორც შეშელიძე განმარტავს ქვეყანაში შექმნილი რთული მდგომარეობა სრულიად ავანტიურისტულმა, საქმეში ჩაუხედავმა და ცხვირაწეულმა მიდგომებმა გამოიწვია, რისი გააზრებაც მისივე განმარტებით ნულოვანია. ექსპერტი საუბარს ჯანდაცვის სისტემაში შექმნილი პრობლემებით იწყებს:
„თავიდან „ცენტრალიზებული მკურნლობის“ მცდარი გადაწყვეტილება იყო მიღებული, შესაბამისად მივიღეთ ის მდგომარეობა რაც გვაქვს, ეს მკურნალობაა არაა, ეს არის ადამიანებზე ცდების ჩატარება. ადამიანები ითხოვენ შველას ამ დროს კი არ არის საკმარისი არც ექიმი, არც სააავადმყოფო და არც საწოლი. ამის გააზრება არის ნულოვანი. როცა მე არ მაქვს დამოუკიდებლად არჩევანი გადაწყვეტილებები მივიღო თუ სად ვიმკურნალო ეს არის კომუნიზმი, კომუნიზმი კი გავიარეთ და ვნახეთ, რომ არ მუშაობს. ამას მოჰყვება ქრთამი და ჩაწყობა, ეს თეორია არაა, ამას ჩვენ რეალობაში ვხედავთ.
ადამიანს, რომელიც ავად ხდება, არავინ ეკითხება რომელ ექიმთან და რომელ საავადმყოფოში მივიდეს, მოკლედ, რომ ვთქვათ მას არჩევანი არ აქვს. ამ გზით ჩვენ პრაქტიკულად სამედიცინო სისტემას ვზღუდავთ, რომ პაციენტს უკეთესი მომსახურება შესთავაზოს, იყოს მოტივირებული და პრობლემის შესაბმისად გადაწყვეტის საუკეთესო გზა ეძებოს. ამის გაგრძელება ასევე არის ის, რომ შემოთავაზება თუ როგორ იმკურნალო არის ცენტრალიზებული, მხედველობაში მაქვს ის, რომ არის ერთი პროტოკოლი რომლითაც უნდა იმკურნალო. კარგია ეს პროტოკოლი თუ არაა, ამაზე მოქალაქეებს ნულოვანი გავლენა აქვთ. ალბათ მკურნალ ექიმსაც ნაკლები გავლენა აქვს, რადგან ისიც დამტკიცებულ პროტოკოლს ემორჩილება.
უნდა შევეხოთ კიდევ ერთ საკითხს - ვთქვათ არ მჭირდება კლინიკაში მისვლა, მაგრამ მჭირდება კონსულტაციები, ის ექიმები რომლებიც უნდა გვკმურნალობდნენ არ არიან ფინანსურად მოტივირებულები, ყოველი დამატებით ზარი მისთვის არის დანახარჯი, მაგრამ არ არის შემოსავალი. წარმოვიდგინოთ, რომ ადამიანს ფიქსირებული ანაზღაურება აქვს, სიტყვაზე დღეში 100 ლარი და მას აქვს არჩევანი უპასუხოს 10 - ს თუ 100 ადამიანს, ცხადია 10 ადამიანს უპასუხებს და აჩვენებს, რომ ვითომ დაკავებულია. ამ საკითხის გაგრძელება არის კომპეტენცია, ამ კუთხითაც ადამიანების საკმარისი რაოდენობა არ გვყავს“, - აცხადებს პაატა შეშელიძე.
"ახალი ეკონომიკური სკოლა - საქართველოს" პრეზიდენტი აცხადებს, რომ ვერანაირი ფინანსური დახმარება რეალურ მდგომარეობას ვერ შეცვლის. მისი თქმით, მმართველი გუნდის მიერ გადადგმული ნაბიჯები ლოგიკას არ ექვემდებარება. როგორც პაატა შეშელიძე აცხადებს გადაწყვეტილება მოქალაქეებს შეუზღუდონ ეკონომიკური საქმიანობა უგუნურებაა.
„წარმოვიდგინოთ, რომ ადამიანს აქვს წარმატებული საქმე, რომელიც შეეზღუდა, მისი შემოსავალი 3 000 ლარი იყო, მას ამ თანხაზე აქვს ბევრი რამ აწყობილი მაგალითად სესხი, სწავლის გადასახადი, სხვა პირადი გეგმები და ა.შ. ეს ადამიანი, რომელსაც 3 000 ლარი აქვს შემოსავალი გათანაბრებულია ადამიანთან, რომელსაც საერთოდ არ აქვს შემოსავალი და ორივემ 300 ლარი უნდა მიიღოს. ეს არის დანაშაული, არ შეიძლება ადამიანებს ცხოვრება აუკრძალო, თუნდაც თავისი რისკით. ამ სიტუაციაში მნიშვნელოვანი არის ის, რომ სახელმწიფომ პანდემიის გამოცხადებით გარკვეულწილად ვალდებულება იკისრა იმაზე, რომ ყველაფერს უმკურნალებს, ის ვერ წვდება ამ ვალდებულებას და აქეთ გვზღუდავს, რომ დამოუკიდებლად შემოსავლის მიღების საშუალება არ გვქონდეს. ეს არის კატასტროფა და სრული სიგიჟე, დიქტატურაზე უარესია, ეს არის უგუნურება. ამბობენ, რომ სხვებიც ასე აკეთებენ, სხვები იდიოტურად, რომ იქცევიან შენ რა ვალდებული ხარ იდიოტობა გაიმეორო? რა ლოგიკაა რომ იქ ასეა მიღებული? იქაც შეცდომაა და აქაც.როცა მთავრობა თავის თავზე იღებს ყველა ხარჯს ეს არის სიგიჟე , არ იმუშავებს , ეს არის კერძო შეცდომების ნაციონალიზება, ასეთი სისტემა არ მუშაობს. არ მინდა პოლიტიკა ავურიო მაგრამ, ინტერესი არის ის, რომ ადამიანები იყვნენ დაშინებულები და დაჩაგრულები, რათა საპროტესტო აქციებზე არ გამოვიდნენ. დააფეთე და იბატონე ეს არის დღევანდელი პოლიტიკა“, - განაცხადა პაატა შეშელიძემ.
ბაჩო ადამია