„არ გვექნება ენერგეტიკა - არ გვექნება არაფერი! გვექნება მხოლოდ სხვისი წარმოებული პროდუქცია და ბევრად მეტი საგარეო ვალი, იმისთვის რომ ვიყიდოთ სხვისი პროდუქცია, და მერე საკუთარი ვალუტის კურსი დავიჭიროთ“, - ამის შესახებ „ისთ გეით ჯგუფის“ სამეთვალყურეო საბჭოს თავმჯდომარე ირაკლი იაშვილი სოციალურ ქსელში წერს. ბიზნესმენი აღნიშნული პოსტით ნამახვანჰესის პროექტის ჩავარდნას აფასებს და აცხადებს, რომ ინვესტორის ქვეყნიდან გაგდება მაშინ, როცა საგარეო ინვესტიციების ისტორიულ მინიმუმზე საინვესტიციო აქტივობას კიდევ უფრო შეამცირებს. „კომერსანტი“იაშვილის პოსტს უცვლელად გთავაზობთ:
„ფაქტობრივად ჩაიშალა ნამოხვანის პროექტი!
საქართველოს მოსახლეობის ნაწილს, რომელსაც ესმოდა ამ პროექტის მნიშვნელობა როგორც ენერგომომარაგების და უსაფრთხოების ასევე, ზოგადად, სახელმწიფოსთვის, როგორც დიდი საინვესტიციო პროექტის განვითარების შესაძლებლობის კუთხით, არ გაუხარდა ეს ამბავი!
საქართველოს მოსახლეობის ნაწილს, რომელმაც, მათი განცხადებით, გადაარჩინეს ქართული მიწა, წყალი და წიაღი გათურქებისგან და ეს სიმდიდრე დატოვეს ქართველების საკუთრებაში ხელუხლებლად, გაუხარდა, თან ძალიან!
დღეს „ვიზეიმეთ“ გამარჯვება, შევსვით შესაბამისი სადღეგრძელოები და დავმშვიდდით! მერე რას ვშვრებით, მერე? ესაა მთავარი საკითხი!
მერე იქნება შემდეგი:
1. კომპანია აუცილებლად დაიწყებს საერთაშორისო დავას სახელმწიფოსთან ხარჯების დასაფარავად( მიწები რომ გამოისყიდეს მოსახლეობისგან, იმისი) პლუს მიუღებელი მოგება. არც კი მინდა წარმოვიდგინო რა ხარჯები დააწვება კისერზე ამ ღატაკ ქვეყანას!
2. ინვესტორის გაგდება ქვეყნიდან ისედაც, ფაქტობრივად განულებული საგარეო ინვესტიციების ფონზე, იქნება საინვესტიციო აქტივობის თითქმის გაუქმება!
3. არც ერთი დიდი ზომის მარეგულირებელი(წყალსაცავიანი) ელექტროსადგური ქვეყანაში აღარ შენდება. ეს იყო ბოლო პროექტი, რომელიც მიმდინარეობდა. შენდება კანტიკუნტად, აქა-იქ ,მცირე ზომის მოდინებაზე დაფუძნებული სადგურები, რომლებიც ვერანაირ გავლენას ვერ მოახდენენ უკიდურესად დამძიმებულ ენერგო მომარაგებაზე. დავრჩით იმპორტის ამარა, ისიც შეზღუდული ტექნიკური შესაძლებლობით. გაზაფხულზე ორჯერ მოხდა მასშტაბური ავარია გამტარი ხაზების გადატვირთვის გამო და ჩაქრა თითქმის მთელი ქვეყანა. რამდენიმე წელიწადში დაგვეწყება შეზღუდვები და გამორთვები(ესეც გეხსომებათ).
4. არ გვექნება ენერგეტიკა - არ გვექნება არაფერი! გვექნება მხოლოდ სხვისი წარმოებული პროდუქცია და ბევრად მეტი საგარეო ვალი, იმისთვის რომ ვიყიდოთ სხვისი პროდუქცია, და მერე საკუთარი ვალუტის კურსი დავიჭიროთ!
5. და კიდევ ბევრი რამ....
ასეთი ვითარებაა მეგობრებო!
თუ იკითხავთ გამოსავალი რა არიო, ალბათ ის, რომ მოვიმარაგოთ " ვარლამის ნათურები" ! ოღონდ სად და ვის მივუერთოთ ისინი უნდა გვითხრას მოსახლეობის იმ ნაწილმა, ვისაც პროექტის ჩაშლა გაუხარდა“, - წერს ირაკლი იაშვილი.