ჩიპების მსოფლიოში უმსხვილესი მწარმოებელი Taiwan Semiconductor Manufacturing (TSMC) ფასების აწევას გეგმავს, რამაც შესაძლოა ელექტროტექნიკისა და ავტომობილების გაძვირება გამოიწვიოს. ამის შესახებ Fox Business პროცესებში ჩახედულ წყაროებზე დაყრდნობით წერს.
წყაროების ინფორმაციით, ტაივანური TSMC ყველაზე თანამედროვე მიკროსქემებზე ფასების 10%–ით გაზრდას გეგმავს. შედარებით მოძველებულ მიკროსქემებზე, რომლებსაც საავტომობილო კონცერნები მოიხმარენ, ფასები 20%–ით გაიზრდება.
Apple ტაივანური TSMC–ის ერთ–ერთი უმსხვილესი კლიენტია. ამ ჩიპებს კომპანია iPhone–ების და iPad-ების წარმოებაში იყენებს. თავის ბოლო ანგარიშში Apple წერდა, რომ ჩიპების უკმარისობის გამო iPad-ების და Mac-ების წარმოება შეფერხდა, რაც ბაზარზე მესამე კვარტალში აისახება, რომელიც სექტემბრის ბოლოს იწურება.
ნახევარგამტარების გლობალური დეფიციტის გამო მხოლოდ Apple არ დაზარალებულა – იგივე განიცადეს ავტომწარმოებელთა უმრავლესობამ, General Motors–ის (GM) და Toyota-ს ჩათვლით. GM–მა აგვისტოში განაცხადა, რომ ჩიპებთან დაკავშირებით შექმნილი ვითარების გამო იძულებულია ჩრდილოეთ ამერიკაში მდებარე სამი ქარხანა გააჩეროს, რომლებშიც პიკაპები იწარმოება და ყველაზე მეტ მოგებას აძლევს კომპანიას. Toyota–მ გასულ კვირაში გაავრცელა ინფორმაცია, რომ 40%–ით შეამცირებს წარმოებას.
Bernstein–ის ანალიტიკოსები აცხადებენ, რომ ჩიპების გაძვირება, დიდი ალბათობით, TSMC–ის შემოსავლებს 10–15%–ით, ხოლო მოგებას 20–30%–ით გაზრდის. მათივე თქმით, ეფექტი 2022–ის პირველ კვარტალში გახდება თვალსაჩინო.
Sinolink Securities–ის ნახევარგამტარების ანალიტიკოსის ენდრიუ ლუს თქმით, TSMC–მა თავისი კაპიტალური ბიუჯეტის უდიდესი ნაწილი დახარჯა ყველაზე თანამედროვე ჩიპებზე, რითაც ნაკლებად თანამედროვე ნახევარგამტარების ბაზრის გარკვეული წილი დაკარგა. ამ ნაბიჯით კი კომპანია არარაციონალური ხარჯების კომპენსირებას ცდილობს.