გაეროს გენერალურმა მდივანმა, ანტონიო გუტერეშმა საერთაშორისო საზოგადოებას მოუწოდა, კორონავირუსის წინააღმდეგ ვაქცინაზე თანაბარი წვდომა უზრუნველყონ.
ანტონიო გუტერეშმა ყურადღება გაამახვილა ცალკე აღებული ქვეყნის მასშტაბში პარალელური ინიციატივების შექმნაზე, რაც მისი თქმით, შეშფოთებას იწვევს, რადგან ასეთი მიდგომა წარმატების მომტანი არ იქნება და ინფექციის გავრცელებაზე საერთაშორისო რეაგირების ძალისხმევას ავნებს.
„ახალ ვაქცინაზე თანაბარი წვდომის უზრუნველყოფა ყველა ქვეყნის ინტერესში შედის. არც ერთი ქვეყანა უსაფრთხოდ არ იქნება მანამ, სანამ ყველა უსაფრთხოდ არ იქნება“, - აღნიშნა გაეროს ხელმძღვანელმა.
ანტონიო გუტერეშმა ასევე მოუწოდა საერთაშორისო დონორებს, დამატებით 35 მილიარდი დოლარი გამოყონ ვაქცინისა და დიაგნოსტიკის განვითარების მიზნებისათვის.
imedinews.ge