არსებობს რამდენიმე საკანონმდებლო ინიციატივა, რომლის გაერთიანებაც შესაძლოა ერთ პაკეტში მოხდეს,- ამის შესახებ იურიდიულ საკითხთა კომიტეტის თავმჯდომარემ ანრი ოხანაშვილმა განაცხადა.

როგორც მან განმარტა, „აზარტული და მომგებიანი თამაშების რეკლამის აკრძალვის შესახებ“ კანონპროექტთან დაკავშირებით რამდენიმე პროექტია დაინიცირებული.

„ფინანსთა სამინისტროს დაინიცირებული აქვს პაკეტი, რომელიც შეეხება არა მხოლოდ აზარტული თამაშების შესახებ რეკლამებს, არამედ მთელ რიგ საკითხებს. საკითხი ასევე, დაინიცირებულია ჩვენი კოლეგების მიერ უმრავლესობიდან და ასევე, ფრაქცია „დამოუკიდებელი დეპუტატების“ მიერ. ამიტომ მიზანშეწონილად მიგვაჩნია, რომ საკითხი მხოლოდ გადავდოთ. გეთანხმებით, რომ არ შეიძლება საკითხის გაჭიანურება და ჩვენ ამას არ ვაჭიანურებთ. აღნიშნულთან დაკავშირებით, მთავრობასთან გვაქვს ინტენსიური კომუნიკაცია, ვაწარმოებთ ძალიან ბევრ სამუშაო შეხვედრას. მთელ რიგ საკითხებთან დაკავშირებით, ვათანხმებთ პოზიციებს და მათ შორის, ის პროექტიც, რომელიც თქვენ და თქვენმა კოლეგებმა დააინიცირეთ, ითვალისწინებს იმ საკითხებს, რომელთა გათვალისწინებაც შესაძლოა მთლიანად ერთ პაკეტში მოხდეს“, - აღნიშნულის შესახებ იურიდიულ საკითხთა კომიტეტის თავმჯდომარემ ანრი ოხანაშვილმა ბიუროს სხდომაზე განაცხადა.

მისივე თქმით, ამ საკითხის თაობაზე კომიტეტებში განხილვას დაწყება მალე დაანონსდება.

„ვფიქრობ, საზოგადოებასთან ერთად, ამ საკითხს ძალიან კარგად და სწორად დავარეგულირებთ ისე, რომ დაცული იყოს ბალანსი. ადამიანებს, ვინც ამ პროცესში არიან ჩართულნი, ხელი შევუწყოთ იმისთვის, რომ არ იყვნენ თამაშობებზე დამოკიდებული და მეორე მხრივ - მაქსიმალურად არ დავაზიანოთ არავის ინტერესი. არავის ეგონოს, რომ ეს საკითხი ყურადღების მიღმა არის. ჩვენ ვმუშაობთ და ძალიან მალე, კონკრეტულ გეგმას წარმოვადგენთ თუ რას როგორ გავაკეთებთ. მათ შორის, შეხვედრები და კონსულტაციები გვექნება თქვენთანაც“, - მიმართა ანრი ოხანაშვილმა ფრაქცია „დამოუკიდებელი დეპუტატების“ თავმჯდომარეს.

ინფორმციას საქართველოს პარლამენტის პრესსამსახური ავრცელებს.