ექსპერტი ეკონომიკის საკითხებში ანდრია გვიდიანი ვარაუდობს, რომ ელექტროენერგიის ტარიფის ზრდა გარდაუვალია დღეს დარგში არსებული პრობლემების ფონზე. ზრდა უფრო მეტად იურიდიულ პირებზე აისახება, ვიდრე საყოფაცხოვრებო სამომხმარებლო ტარიფზე.

მისივე თქმით, „ელექტროენერგიაზე ტარიფის ბოლო გადახედვის შემდეგ საკმარისი დრო გავიდა. ბევრი რამ შეიცვალა ამ პერიოდში და შესაბამისად ტარიფების გადახედვა გარდაუვალია. აქედან გამომდინარე, ენერგოკომპანიები, სემეკის უახლოეს სხდომაზე დიდი ალბათობით, დააყენებენ ტარიფის გაზრდის საკითხს და ეს სრულიად ლეგიტიმური იქნება“.

ექსპერტი დარწმუნებულია, რომ ტარიფების არსებულ ნიშნულზე შენარჩუნების შემთხვევაში ძალიან დიდი პრობლემების წინაშე აღმოჩნდებიან ელექტროენერგიის დისტრიბუტორი კომპანიები და მიიჩნევს, რომ არსებული ტარიფის გადახედვით მნიშვნელოვანი გადაწყვეტილებები იქნება მიღებული. „ამას ემატება პანდემია, რომელმაც გააუარესა ზოგადად ეკონომიკური სიტუაცია და დაზარალდა ენერგეტიკის სექტორიც. ამდენად, კომპანიებს ესაჭიროებათ ახალი ტარიფები, რათა შენარჩუნდეს მოსახლეობის ელექტრომომარაგების საიმედოობა“, - ამბობს ანდრია გვიდიანი.

„ზოგადად, ძალიან მნიშვნელოვანია ადგილობრივი რესურსების გამოყენება ელექტროენერგიის გენერაციის მიმართულებით. როდესაც ენერგოდამოუკიდებლობაზეა საუბარი, აქ პირველ რიგში იგულისხმება ადგილობრივი გენერაციის განვითარება. ჩვენ ჰიდრორესურსების ძალიან დიდი პოტენციალი გვაქვს, რაც ადგილობრივი გენერაციის ობიექტების შექმნის შესაძლებლობას იძლევა. თუმცა, სამწუხაროა, რომ გარკვეული ჯგუფების მხრიდან ხელი ეშლება ახალი გენერაციის ობიექტების მშენებლობას.

თუ ჩვენ გვინდა მდგრადი ენერგეტიკული სისტემა, თუ ჩვენ გვინდა ენერგოდამოუკიდებლობა, ამის ერთადერთი შესაძლებლობა შიდა რესურსების გამოყენება და ადგილობრივი გენერაციის ობიექტების მშენებლობაა“, – აცხადებს ექსპერტი.
მისი გათვლებით, უახლოესი 10 წლის განმავლობაში, ყველაზე პესიმისტური პროგნოზით, თუ ყოველწლიურად 3%–ით გაიზრდება ელექტროენერგიის მოხმარება, 2030 წლისთვის საქართველოში მოთხოვნა 18,5 მლრდ კვტ/სთ–ს მიაღწევს. აქედან გამომდინარე, თუ მოხმარების ზრდის პარალელურად არ აშენდება ელექტროგენერაციის ახალი ობიექტები, მუდმივად მზარდი იქნება საქართველოს ენერგეტიკული დამოკიდებულება მეზობელ ქვეყნებზე.

ექსპერტები თანხმდებიან, რომ ახალი გადაწყვეტილებების მიღება აუცილებელია საქართველოს ენერგეტიკის ჯაჭვის ისეთი რგოლის გამართული მუშაობისთვის, როგორიცაა სადისტრიბუციო კომპანიები.

imedinews.ge