ოფიციალურად დადასტურებული მზარდი ექსპორტის ფონზე ჩაის მწარმოებლები საპირისპირო ტენდენციაზე საუბრობენ. შპს ,,ანასეულის ექსპერიმენტალური ჩაის ფაბრიკაში“ პანდემიური პროცესის გავლენას მძიმედ მიიჩნევენ და აცხადებენ, რომ შემცირდა როგორც ჩვეულებრივი, ასევე ბიო ჩაის წარმოება. შესაბამისად, კომპანიის სამომავლო გეგმაც პანდემიამ თავდაყირა დააყენა. ჩაის ფაბრიკის დირექტორის გიორგი ხუჭუას თქმით, ერთჯერადი ჩაის წარმოების 20%-იან ზრდას გეგმავდნენ, თუმცა ტენდენცია საპირისპიროდ შემობრუნდა.

,,კორონავირუსმა მძიმე რეალობის წინ დაგვაყენა. წარმოების ზრდას ვგეგმავდით, მაგრამ პანდემიამ ხელი შეგვიშალა. მოთხოვნა არ შემცირებულა, პირიქით გაიზარდა, მაგრამ ბიზნესი მიწოდებას ვერ უზრუნველყოფს. სერიოზული პრობლემის წინ აღმოვჩნდით მწარმოებლები, ეს მხოლოდ ერთი კომპანიის გასაჭირი არ არის, ანალოგიური მდგომარეობაა წარმოების უმეტეს ნაწილში. ჩვენ ,,ანა ბატონიშვილის“ ბრენდით როგორც მწვანე, ასევე შავ ჩაის ვაწარმოებთ. 40%-ით შეგვიმცირდა წარმოება და შესაბამისად, ექსპორტზეც დიდი პრობლემა შეგვექმნა. ცვლილება შეეხო ბიო ჩაისაც, რომლის წარმოებაში ამ ეტაპზე 30%-იანი კლებაა, წინა წელთან შედარებით. ჯერჯერობით არ ჩანს ნიშნები, რომ მდგომარეობა შეიძლება გაუმჯობესდეს“, - ამბობს ,,კომერსანტთან“ გიორგი ხუჭუა.

ერთ-ერთ მთავარ დაბრკოლებად ამ ეტაპზე ფაბრიკის დირექტორი გაზის გადასახადის ზრდას მიიჩნევს, რის გამოც უახლოეს მომავალში ფასების კორექტირება იგეგმება.

,,გაზის გაძვირებამ ახალი თავსატეხი გაგვიჩინა, სამწუხაროდ, ფასების გადახედვა მოგვიწევს. ზუსტად რა მაჩვენებლით, ჯერ ვერ გეტყვით, რადგან ბოლომდე ჩამოყალიბებული არ ვართ. სავარაუდოდ, ცვლილება არ იქნება უმნიშვნელო, რადგან გაზის ტარიფს თვითღირებულების საკმაოდ დიდი ნაწილი - 25% უჭირავს. ხარჯი საგრძნობლად გაგვეზრდება და წარმოება იძულებული ხდება, ამ პროცესს ფასების ზრდით დაუპირისპირდეს, სხვა გამოსავალი არ გვრჩება“, - ამბობს გიორგი ხუჭუა.

შპს „ანასეულის ექსპერიმენტული ჩაის ფაბრიკა” ოზურგეთში მდებარეობს. ფაბრიკა 60 ჰექტარ ჩაის პლანტაციას ფლობს, საიდანაც 10 ჰექტარს ორგანული წესით უვლიან. პანდემიამდე კომპანია წელიწადში 10 ტონამდე ბიო და 70 ტონა ჩვეულებრივ ჩაის აწარმოებდა.

ფაბრიკა საკუთარი პლანტაციებიდან მოწეული ნედლეულის გარდა, მოსახლეობისგან ჩაბარებულ ჩაის ფოთოლსაც ამუშავებს

რაც შეეხება ფასს, ამ ეტაპზე 100 გრამი ჩაის საშუალო ღირებულება 6 ლარამდეა.

პროდუქციის ძირითადი წილი - 70% ექსპორტზე რამდენიმე ქვეყანაში, მათ შორის ევროპაში (ჩეხეთში) იყიდება, 30% კი ადგილობრივ ბაზარზე.
 ადგილობრივი წარმოების პრობლემის ფონზე ექსპორტთან დაკავშირებული სტატისტიკა საეჭვოდ გამოიყურება. კერძოდ, მიმდინარე წლის იანვარ-სექტემბერში საქართველოდან ექსპორტზე 3.5 მლნ დოლარის ღირებულების 1 645.5 ტონა ჩაი გავიდა.

ოფიციალური სტატისტიკის მიხედვით ჩანს, რომ წელს ჩაის საექსპორტო მოცულობა 7.3%-ით ანუ, დაახლოებით, 113 ტონით გაიზარდა, თუმცა ქვეყნის საზღვრებს გარეთ რეალიზებული პროდუქტის ღირებულება მცირედით 0.5%-ით შემცირდა.

ოფიციალური სტატისტიკის თანახმად საკვები პროდუქტების ქვე-ჯგუფი - ყავა, ჩაი და კაკაო 6.4 %-ით არის გაძვირებული.

საქსტატის მონაცემებით, 2021 წლის ოქტომბერში წინა თვესთან შედარებით ინფლაციის დონემ საქართველოში 1.3 %, ხოლო წლიური ინფლაციის დონემ 12.8 %  შეადგინა.