მეოცე საუკუნეში ფრანგი ძმების, ანანოვების მიერ აგებული ისტორიული შენობა, რომელიც ერთ დროს სამთავრობო რეზიდენციის ფუნქციასაც ასრულებდა 2020 წლის იანვარში 1 375 000 ლარად შპს „ინვესტ ჯგუფმა“ შეისყიდა. მაშინ საუბრები იყო იმაზეც, რომ ელექტრონული აუქციონი წლის ყველაზე არახელსაყრელ და არასამუშაო პერიოდში, საახალწლო არდადეგების დროს გაიმართა და ვიღაცას სურდა, რომ ამ აუქციონს სწრაფად და შედარებით გაუმჭვირვალედ ჩაევლო.

9 თვის შემდეგ,  „კომერსანტი“ კვლავ დაინტერესდა, თუ რა გეგმები აქვს ანანოვების მამულის მეპატრონეს და რა თანხის ინვესტირებას გეგმავს ის სასახლისთვის იერსახის შენარჩუნება-აღდგენაში და ტურისტული ფუნქციის დაბრუნებაში?როგორ იმოქმედა პანდემიით გამოწვეულმა შეზღუდვებმა რეაბილიტაციის გეგმაზე და როდის დაუბრუნდება იმერეთის მხარეს განახლებული ანანოვების სასახლე?

„პანდემიამ, ანანოვების სასახლის რეაბილიტაციაც შეაფერხა. რამდენიმე თვეა მიმდინარეობს გარე ტერიტორიის გაწმენდითი სამუშაოები და ხემცენარეების შეწამვლა. ტერიტორია თითქმის დაფარული იყო ეკალბარდებით. მოწესრიგდა სასახლის საწვიმარი და სანიაღვრე სისტემები, პარალელურად მიმდინარეობს მუშაობა ტერიტორიის საბოლოო არქიტექტურულ პროექტზე. პროექტის დასრულება 2024 წელს იგეგმება. გეგმაში გვაქვს სასტუმრო და ტურისტული კომპლექსის განვითარევბა, დამატებით დეტალებს მოგვიანებით გაცნობებთ, როდესაც საბოლოო პროექტი მზად გვექნება,“ - განმარტავს „ინვესტ ჯგუფის“ გენერალური დირექტორი დავით კობახიძე.

კობახიძე ჩვენთან საუბარში აღნიშნავდა, რომ პროექტის მზადებაში კვალიფიციური არქიტექტორების, დიზაინერებისა და რესტავრატორების გუნდია ჩართული, რომლებიც სასახლეს ახალ სიცოცხლეს შესძენენ და ისტორიულ ღირებულებას შეუნარჩუნებენ. კომპანიის დირექტორი ამბობდა, რომ დიზაინისა და კონცეფციის მათეულ ხედვებს საზოგადოებას ძალიან მალე წარუდგენენ.

შენობა, სადაც საბჭოთა პერიოდის დროს ჯერ საბავშვო ბაღი, შემდეგ კი სასტუმრო ფუნქციონირებდა, ამჟამად ძალიან მძიმე მდგომარეობაშია. შპს „ინვესტ ჯგუფი“ სრულ პასუხისმგებლობას იღებს, რომ იმერეთის რეგიონს ეს სასახლე ისტორიული იერსახით დაუბრუნდება. ჩვენ დაინტერესებული ვართ ტურისტულ ბიზნესში ინვესტიციების განხორციელებით, ამ სასახლის შესყიდვა პირველი ნაბიჯი იყო, ვეცდებით, რომ ტურისტებისთვის ვარციხე საინტერესო და აუცილებლად მოსანახულებელ ადგილად ვაქციოთ“, - აცხადებდნენ კომპანიაში.

ანანოვების სასახლის ტერიტორიაზე სხვადასხვა ტიპის სარეკრეაციო ზონა და საგამოფენო თუ დასასვენებელი სივრცეების მოწყობა იგეგმება.  როგორც კობახიძე „კომერსანტს“ უყვება, პირველადი გათვლებით, კომპლექსში დაახლოებით 30-მდე ადამიანის დასაქმება იგეგმება.

„კომპანია სრულად შეასრულებს აუქციონის პირობებს და სახელმწიფოს წინაშე აღებული ვალდებულებების მიხედვით, სასახლეში 6 ნომრიან სასტუმროს, ტერიტორიაზე კი ტურისტულ ცენტრს, ალკოჰოლური სასმელების საგამოფენო სივრცეს, რეკრეაციულ ზონებსა და სპორტულ მოედანს მოაწყობს. რაც შეეხება დამატებით სხვა ინფრასტრუქტურას, მიმდინარეობს მოლაპარაკება რამდენიმე საერთაშორისო სასტუმროს ბრენდთან, რომლებიც დაინტერესებულები არიან ჩვენთან თანამშრომლობით. რა შედეგით დასრულდება მოლაპარაკებები და მიიღება თუ არა რაიმე კონკრეტული გადაწყვეტილება, ამას საზოგადოება აუცილებლად შეიტყობს.  პროექტის საინვესტიციო ღირებულება ხელშეკრულებით განსაზღვრულ 4 მილიონ ლარს აღემატება, რეალურად ამ ტერიტორიისა და სასახლის კეთილმოწყობისთვის ბევრად მეტი თანხის დახარჯვა იგეგმება“, - განმარტავს დავით კობახიძემ.

„კომერსანტი“ ასევე გიყვებოდათ, რომ 77,500 კვ.მ. მიწის ნაკვეთი და მასზე განთავსებული ისტორიული ნაგებობა ბიზნესმენების ძმები დუგლაძეების საკუთრებაში გადავიდა. სამეწარმეო რეესტრში დუგლაძეების სახელი არ ფიქსირდება. დოკუმენტებში შპს „ინვესტ ჯგუფის“ 100%-იანი წილის მფლობელი ნინო ლორთქიფანიძეა, გავრცელებული ინფორმაციით, სწორედ ნინო ლორთქიფანიძეა ბიზნესმენ დუგლაძეებთან დაკავშირებული. კომპანიის დირექტორი დავით კობახიძე აცხადებს, რომ შპს „ინვესტ ჯგუფი“ დამოუკიდებელი კომპანიაა და ის არანაირ კავშირში არ არის არც ერთ სხვა ბიზნეს ჯგუფთან, მათ შორის, არც დუგლაძეების ღვინის კომპანიასთან.

შეგახსენებთ, რომ იმერეთში, ბაღდათის რაიონში, სოფელ ვარციხეში ანანოვების ყოფილი სასახლის გასაყიდად საჯარო აუქციონი 2019 წლის 31 დეკემბერს გამოცხადდა. ისტორიული ნაგებობა კი 2019 წლის 31 დეკემბერს რეგისტრირებულმა კომპანია შპს ინვესტ ჯგუფმა შეიძინა. ანანოვების მიერ აგებული შენობა,  თავდაპირველად საცხოვრებელი სახლი იყო, მოგვიანებით სასტუმროდ გადაკეთდა და ბოლოს სამთავრობო რეზიდენციის ფუნქცია შეიძინა.  მოგვიანებით,  ცნობილ მეღვინეებსა და ხის გადამამუშავებელი საწარმოს მფლობელებს ქონება ჩამოართვეს და სახელმწიფოს გადასცეს. სასახლის ისტორია საინტერესო განსაკუთრებით მას შემდეგ გახდა, რაც გასული საუკუნის 90-იან წლებში მას სამთავრობო რეზიდენციის სტატუსი მიენიჭა, წლების მანძილზე რეზიდენცია უმაღლესი რანგის სტუმრებს მასპინძლობდა. სამთავრობო რეზიდენციამ 2012 წლიდან პატრიოტთა ბანაკის ფუნქცია შეიძინა, ეს სტატუსი ანანოვების სასახლეს 2014 წლამდე ჰქონდა, ხოლო მას შემდეგ ქონება ეკონომიკის სამინისტროს ბალანსზე ფიქსირდებოდა.

მარიამ მორგოშია