ანაკლიის სასტუმროები საკარანტინო ხელშეკრულების დასრულებასა და შიდა ტურიზმისთვის გააქტიურებას ელოდებიან. ამჟამად განმუხურსა და ანაკლიაში მდებარე 4 პრემიუმ კლასის სასტუმროდან 2 საკარანტინო ზონადაა ქცეული. ივლისის დასაწყისიდან კი ეს სასტუმროები ადგილობრივი ტურისტების მისაღებად დაიწყებენ მზადებას, თუმცა, ამ ეტაპზე ეს სასტუმროები არ ფლობენ დაზუსტებულ ინფორმაციას, საკარანტინო პერიოდის დასრულების ვადებზე.
Anaklia Resort by Pratap`s Signature-ის სასტუმრო, რომელიც სანაპიროს პირველ ზოლშია და აქ ცნობილი საერთაშორისო მუსიკალური ფესტივალის Echo Waves და Gemfest-ის მთავარი სცენის წინ მდებარეობს, 15 ივლისიდან გეგმავს გააქტიურებას. სასტუმროს მენეჯერი მაია მურაჩაშვილი განმარტავს, რომ ამჟამად 56 ნომრიან სასტუმროში აფხაზეთიდან გადმოსული მოქალაქეები არიან. რაც შეეხება ანაკლიის ინფრასტრუტურას, შარშანდელისგან განსხვავებით, ამჟამად სანაპირო ზოლი დასრულების ეტაპზეა და ტურისტული პოტენციალიც გაიზარდა, თუმცა ერთხელ უკვე გადავადებული ხელშეკრულების შემდეგ, უცნობია დარჩება თუ არა საკარანტინო ზონად აღნიშნული სასტუმრო.
„ჩვენ ახლა საკარანტინო ზონა ვართ, გვყავს აფხაზეთიდან გადმოსული მოქალაქეები, რომლებიც შემდეგ გადადიან ან ცხელების ცენტრში ან სხვადასხვა კლინიკებში. კარანტინის დასრულების შემდეგ 15 ივლისიდან ვაპირებთ ქართულ ბაზარზე გააქტიურებას. პირველი ივლისიდან ჩვენს გვერდით იხსნება აკვაპარკი, მიმდინარეობს სანაპირო ზოლის რეაბილიტაცია, გაკეთებულია საშხაპეები, ეწყობა ინფრასტრუქტურა, წესრიგდება პლიაჟი. შარშან ეს ყველაფერი კეთდებოდა, რაც სირთულეებს ქმნიდა ტურისტებისთვის. გახსნიდან ფასდაკლებებს შევთავაზებთ ადგილობრივ სტუმრებს. თუმცა შარშანდელ ნიშნულს ბევრად ჩამოვცდებით შემოსავლების კუთხით. კარანტინი უნდა დამთავრებულიყო მაისის ბოლოს და გაგვიგრძელდა ივნისის ბოლომდე, ჯერ არ ვიცით კიდევ მოგვიწევს თუ არა ხელშეკრულების გაგრძელება, შეიძლება საკარანტინო ზონად დავრჩეთ. დღევანდელი მოცემულობით, თვის ბოლომდე გვაქვს კარანტინი და 15 ივლისიდან ვიხსნებით და მერე, როგორც კი ფრენები აღდგება, მიზნობრივ მარკეტინგულ სამუშაოებს დავიწყებთ ტურისტების მოსაზიდად, „ - განმარტავს მაია მურაჩაშვილი.
სასტუმრო Palm Beach-ის მენეჯერი მურთაზ ჯოლოხავა აღნიშნავს, რომ სასტუმროს საკარანტინო ზონად ფუნქციონირების ვადა 15 ივნისს სრულდება. როგორც კი სასტუმრო სტუმრების მიღებას დაიწყებს, ადგილობრივებს 20-30 პროცენტიან ფასდაკლებებს შესთავაზებს, თუმცა ამ ეტაპზე მენეჯმენტისთვის გაურკვეველია, როდემდე გაგრძელდება ხელშეკრულება.
„რეგულაციებს კარგად მოვერგეთ, ჯერჯერობით კარანტინის ზონა გვაქვს, რომლის ვადაც სავარაუდოდ, 15 ივნისს მთავრდება. ალბათ ერთი კვირა დაგვჭირდება მომზადებისთვის და შემდგომ გასახსნელად. ფესტივალების პერიოდში ძალიან ბევრი სტუმარი გვყავდა, თუმცა ბოლომდე მათზე დამოკიდებული არ ვყოფილვართ.“- აღნიშნავს მურთაზ ჯოლოხავა.
ანაკლია-განმუხურის სანაპიროები ცნობილია საერთაშორისო ფესტივალების ჩატარების ზონად. წელს ზაფხულის ელექტრონული მუსიკის ფესტივალის Echowaves-ის ჩატარება განუსაზღვრელი ვადით გადაიდო, ხოლო Gemfest-ი არა ანაკლიის შავი ზღვის სანაპიროზე, არამედ საბერძნეთში 8 აგვისტოს ჩატარდება. ეს პერიოდი საკურორტო სასტუმროებისთვის მნიშვნელოვანი შემოსავლის წყაროს წარმოადგენდა. ჯერჯერობით სასტუმროები ვერ აკეთებენ პროგნოზებს, თუ როგორი იქნება მათი ზაფხულის სეზონი.
მარიამ მორგოშია