ანაკლიის პორტისთვის ახალი ინვესტორის შერჩევას მთავრობა მომავალ წელს გეგმავს. გეგმას 2021 წლის ბიუჯეტის პირველადი პროექტი ითვალისწინებს. სამიზნე მაჩვენებელზე გასვლის ცდომლების ალბათობა 20%-ად არის შეფასებული.

2021 წლის გეგმაშია ტენდერის შედეგად გამოვლენილ ინვესტორთან მოლაპარაკებების წარმოება და საინვესტიციო ხელშეკრულების გაფორმება.

„ინვესტორი განახორციელებს პროექტის ფინანსურ დახურვას, განახორციელებს სასესხო ხელშეკრულებების, ასევე ტერმინალის ოპერატორთან ხელშეკრულების გაფორმებას და დაიწყებს სამშენებლო სამუშაოებს, რაზეც სააგენტო განახორციელებს მონიტორინგს - 2022-2023 წწ. პორტი დაიწყებს ოპერირებას, სააგენტო განახორციელებს მონიტორინგს, მათ შორის შესრულების ძირითად ინდიკატორებზე - 2024 წ“, - ნათქვამია ბიუჯეტის პროექტში.

შესაძლო რისკებად კი, საარბიტრაჟო დავა და სხვა გაუთვალისწინებელი გარემოებები სახელდება, რის გამოც, შესაძლებელია ვერ შეირჩეს მაღალი რეპუტაციისა და გამოცდილების ინვესტორი.

შეგახსენებთ, საქართველოს მთავრობამ პორტის ინვესტორად შერჩეულ „ანაკლიის განვითარების კონსორციუმს“ 2020 წლის იანვარში ხელშეკრულება გაუწყვიტა. 2016 წელს კონსორციუმთან გაფორმებული საინვესტიციო ხელშეკრულების შეწყვეტის მიზეზად აღებული ვალდებულებების შეუსრულებლობა დასახელდა. ხელშეკრულების გაწყვეტამდე ერთი წლით ადრე, 2019 წლის იანვარში, საქართველოს გენერალურმა პროკურატურამ უკანონო შემოსავლის ლეგალიზაციის (ე. წ. ფულის გათეთრების) ფაქტზე „თიბისი ბანკთან“ და მის დამფუძნებელ აქციონერებთა დაკავშირებით დაკავშირებით გამოძიება დაიწყო, რაც „ანაკლიის განვითარების კონსორციუმის“ შეფასებით პროექტის განხორციელების ხელისშეშლისთვის მოხდა.

„ანაკლიის განვითარების კონსორციუმმა“ სარჩელი საერთაშორისო სავაჭრო პალატის საერთაშორისო საარბიტრაჟო სასამართლოში შეიტანა, ხოლო მისმა ერთ-ერთმა ინვესტორმა ბობ მეიერმა - საინვესტიციო დავების გადაწყვეტის საერთაშორისო ცენტრში.

29 ივლისს შეტანილი სარჩელებით მოსარჩლეები საქართველოს მთავრობას მიყენებული ზიანის ანაზღაურებას სთხოვენ. კონსორციუმის მხრიდან ზარალის სახით დაანგარიშებული თანხა 1 მილიარდ დოლარს აღემატება.

business-partner.ge