დარგობრივი ეკონომიკისა და ეკონომიკური პოლიტიკის კომიტეტის წევრი, ლევან კობერიძე რადიო „კომერსანტის“ გადაცემაში „კომერსანტის დილა“ 2021 წლის სახელმწიფო ბიუჯეტის პრობლემებზე საუბრობს, მისი თქმით, ხელისუფლება არ თანამშრომლობს ოპოზიციასთან და საზოგადოებასთან, ამიტომ ახალი ბიუჯეტიც შესაბამისად, არ პასუხობს ქვეყნის ეკონომიკურ გამოწვევებს.

„ბიუჯეტი არ ასახავს ხედვას, თუ როგორ უნდა გამოვიდეს ქვეყანა შექმნილი ეკონომიკური კრიზისიდან. ხელისუფლება ოპოზიციასთან ერთად უნდა მსჯელობდეს ამ საკითხებზე, თუმცა მას ეს უნარი არ გააჩნია. ის, ოპოზიციას და საზოგადოებას კი არა, საკუთარ თავსაც აღარ ელაპარაკება უკვე. რეალურად ბიუჯეტში უნდა იყოს ასახული ეკონომიკურ პოლიტიკასთან დაკავშირებული სიახლეები, ის, თუ როგორ უყურებს ხელისუფლება არსებულ გამოწვევებს. მსოფლიოში და არა მარტო საქართველოში, მთლიანად იცვლება ეკონომიკის სტრუქტურა, სწორედ ამ საკითხებზე უნდა ყოფილიყო მსჯელობა, თუ რა მიმართულებით ვაკეთებთ 2021 წლიდან აქცენტს და როგორ აისახება ეს ყოველივე დასაქმებულები შემოსავლებზე. ბიუჯეტში არა ეკონომიკური გათვლები, არამედ ბუღალტერიაა მოცემული,“- აცხადებს ლევან კობერიძე.

მისი თქმით, საგარეო ვალით შემოსულ თანხა ბიუჯეტში არამიზნობრივად არის გაწერილი და იმის ნაცვლად,რომ საგარეო ვალი იხარჯებოდეს პროგრამებში, ვხედავთ წინასაარჩევნო დაპირებების კასკადს.

„ამ ბიუჯეტშია ის თანხა, რაც ქვეყანამ და არა მთავრობამ, აიღო ვალად და რაც რეალურად, თითოეული ჩვენგანის გადასახადია. კარგია, რომ ვალი მოგვცეს და ეს ჩვენი, ყველას წარმატებაა და იმ ყველაფრის, რაც ბოლო 25 წლის განმავლობაში გაკეთდა, ეს წარმატებები მხოლოდ ამ მთავრობას არ ეკუთვნის. მაგრამ ხდება საგარეო ვალის ფლანგვა და როცა კოალიციური მთავრობა მოვა და პარლამენტში მოვხვდები, აღნიშნული საკითხი აუცილებლად დაისმევა დღის წესრიგში. ახლა ჩვენ, რეალურად, საქმე გვაქვს ბიუჯეტის ძარცვასთან,“- ამბობს ლევან კობერიძე.

„იცით, რა იქნებოდა სწორი? პოზიცია და ოპოზიცია ერთად რომ ვისხდეთ, ჩვენ ჩვენი ბიუჯეტი გვქონდეს წარდგენილი და მასზე მსჯელობის საშუალება გვქონდეს. ბიუჯეტზე მსჯელობა მხოლოდ ციფრების კრიტიკა არ არის, ეს არის პოლიტიკური პროცესი,რომელიც უნდა მიმდინარეობდეს პარლამენტში. ბიუჯეტში ერთი დიდი პროექტიც კი არ არის ასახული, რომელიც ქვეყანას ეკონომიკური კრიზისიდან გამოიყვანს,“- აცხადებს კობერიძე და ანაკლიის პორტთან დაკავშირებით ხელისუფლების მოქმედებებს აკრიტიკებს.

„ანაკლიის პროექტთან დაკავშირებით არანაირი გათვლა არ არსებობს, ეს იყო არა ერთი ადამიანის, ან ჯგუფის, არამედ საქვეყნო პროქტი, კარგი- ის ინვესტორი არ მოეწონათ, მაგრამ არც ახლების მოზიდვას არ ცდილობენ. ყველამ კარგად დავინახეთ, რაც გააკეთეს, ხელოვნურად გააჩერეს ეს პროექტი. ამ პროცესით ბედნიერი მხოლოდ რუსეთია. ანაკლია არ იყო მხოლოდ პროექტი, ეს იქნებოდა ქალაქი, სადაც 30 ათას ადამიანამდე დასაქმდებოდა გურიიდან, სამეგრელოდან, აფხაზეთიდან ხალხი გადმოვიდოდა. ჩვენ გვეკითხებოდნენ აქტიურად ამ პროექტისა და დასაქმების შესაძლებლობების შესახებ. ამ ხელისუფლებამ კი ეს პროექტი მოკლა და გააჩერა,“- აცხადებს ლევან კობერიძე და გადაცემის ბოლოს პარტიის „ლელო საქართველოს“ გეგმებზე საუბრობს და მოსახლეობას არჩევნებში მონაწილეობის მიღებისკენ მოუწოდებს.

„განსხვავებით სხვა ოპოზიციური პარტიებისგან, ლელო საქართველოსთვის არის პარტია,რომელსაც აქვს კონკრეტული გეგმა, სადაც დარგების და მიმართულებების მიხედვით გვაქვს გაწერილი ზუსტად ნაბიჯები შემდეგი წლების განმავლობაში. დაწყებული იმით, თუ როგორ უნდა შეიქმნას საშუალო ფენა ქვეყანაში, რაც მნიშვნელოვანია, როგორც პოლიტიკური, ისე ეკონომიკური სტაბილურობისთვისა და თითოეული ჩვენგანისთვის, დამთავრებული სოფლის მეურნეობის დარგით. აუცილებლად საჭიროა ცვლილებები 2020 წელს და მოვუწოდებ ამომრჩეველს, რომ არ დავრჩეთ სახლში, მიუხედავად ეპიდემიოლოგიური სიტუაციისა, პირბადეებით, მაგრამ აუცილებლად უნდა მივიდეთ არჩევნებზე,“- ამბობს ლევან კობერიძე.