დღეს „ლელოს“ ლიდერებმა ბრიფინგი გამართეს და მთავრობის პროგრამა შეაჯამეს. ინფორმაციას „ლელო საქართველოსთვის“ პრესსამსახური ავრცელებს.
„ლელო“ ერთ-ერთი ლიდერის ანა ნაცვლიშვილის თქმით, ეს არ არის პროგრამა ევროპული სახელმწიფოს მშენებლობისთვის, ეს არის საბჭოთა სტილის გეგმა-სადღეგრძელო: გპირდებით ყველაფერს, შევასრულებთ არაფერს;
მისივე განცხადებით, ამ პროგრამით მოქალაქე მთავრობას ვერც კონკრეტულ შედეგებს მოსთხოვს, ვერც პასუხს შედეგების ვერ მიღწევისთვის.
„ლელოს“ ლიდერები აცხადებენ, რომ ისინი მთავრობისა და პარლამენტარების საქმიანობის კონტროლსა და მხილებას გააგრძელებენ, სწორედ ამიტომ მთავრობის წევრებს კომფორტში ყოფნის მოლოდინი არ უნდა ჰქონდეთ.
„პარლამენტარები რომ თავის ადგილზე იდგნენ, მთავრობაც ვერც კი უნდა ბედავდეს ასეთი მოუმზადებელი და არაფრისმთქმელი პროგრამით მისვლას, მაგრამ როგორი მინისტრობის კანდიდატებიც არიან, როგორი დეპუტატებიც ელოდებიან, ის პროგრამაცაა,“-განაცხადა ანა ნაცვლიშვილმა და მთავრობის მიერ წარდგენილი პროგრამა შეაჯამა.
„პროგრამა აღიარებს რომ ქვეყანას უჭირს, მაგრამ ეს ნიშნავს იმას, რომ უჭირს მხოლოდ მოქალაქეს, არა ხელისუფლებას. გახსოვთ, რომ ლელოს ანტიკრიზისული გეგმის მიხედვით, ხელისუფლებას უნდა განეხორციელებინა ე.წ. ქამრების შემოჭერის პოლიტიკა, თუმცა „ქართული ოცნების პროგრამაში ამას ვერ ვხედავთ, პირიქით: 2021 წლის ბიუჯეტის ხარჯვითი ნაწილი არათუ შემცირებული, არამედ გაზრდილია წინა წელთან შედარებით 500 მილიონი ლარით, ეს ზრდა მიმართულია სახელმწიფო ტენდერებში, რომელიც კორუფციის წყაროს წარმოადგენს დიდი ხანია, და შრომის ანაზღაურებაში.
კითხვაზე გვექნება თუ არა უცხოური ინვესტიციები, პროგრამაში პასუხი არის - არა, რადგან ოცნების ხელისუფლება არაფერს აკეთებს იმისთვის, რომ ინვესტორებისთვის მიმზიდველი ქვეყანა გავხდეთ. შედეგიც სახეზეა, 2020 წლის მესამე კვარტალში უცხოური ინვესტიციები 24 %-ით შემცირდა წინა წლის, ისედაც დაბალ მაჩვენებელთან შედარებით. ეს ნიშნავს იმას, რომ არ შეიქნება სამუშაო ადგილები, არ განხორციელდება ქვეყნისთვის საჭირო პროექტები.
გეგმის მიხედვით, საბანკო სესხები, ამ პროგრამის მიხედვით ისე პრობლემად დარჩება. გახსოვთ რომ ლელოს ანტიკრიზისული გეგმის მიხედვით, სახელმწიფოს უნდა აეღო ამ თემაზე პასუხისმგებლობა, ეროვნული ბანკისა და კერძო ბანკების ერთად უნდა დამსხდარიყვნენ რომ მოქალაქეებს პანდემიით გამოწვეული სიმძიმეების გათვალისწინებით, სესხებზე რეალური შეღავათები მიეღოთ. ჩვენ ვთავაზობდით რეალურ პაკეტს, რომ მოქალაქეთა ტვირთი შემსუბუქებულიყო. ჩვენ ვთავაზობდით სესხების რეფინანსირების სისტემური მოგვარების გზას, რათა გარანტირებულად ჰქონოდა თითოეულ მოქალაქეს საბანკო სესხის გადავადების შესაძლებლობა, როგორც ეს მოხდა უამრავ ქვეყანაში. ოცნებამ სახელმწიფო დონეზე არაფერი გააკეთეთ ამისთვის და ეს პროცესი მთლიანად ბანკების კეთილ ნებაზეა დღეს დამყარებული. გასულ წელს საქართველოში გაუარესდა თითქმის ყველა ანტიკორუფციული მაჩვენებელი, რომლებიც საერთაშორისო ინდექსებში აისახა; ამ ფონზე განსაკუთრებით საგანგაშოა, რომ სამთავრობო პროგრამაში არ არის ნახსენები არც ერთი ღონისძიება, რომელიც კორუფციის წინააღმდეგ ბრძოლისათვის არის საჭირო. ცინიზმია, რომ სამთავრობო პროგრამა შემოიფარგლება მსგავსი ფრაზებით „ამაღლდება საზოგადოების ცნობიერება კორუფციულ დანაშაულებსა და მათთან ბრძოლის მეთოდებზე“. საჯარო ინფორმაციის ხელმისაწვდომობა 5 წლის მინიმუმზეა. ეს ნიშნავს იმას, რომ ხელისუფლება არათუ ანგარიშს არ აბარებს მოქალაქეებს იმაზე თუ რას აკეთებს, რა შედეგებს დებს, როგორ ხარჯავს მათ ფულს, არამედ ინფორმაციასაც კი არ აწვდის ამ ყველაფრის შესახებ. „ქართული ოცნების“ მმართველობის პერიოდში ბიუროკრატიული აპარატის შენახვის ხარჯი 1 მილიარდი ლარით არის გაზრდილი. ვიცით, რომ ხშირად ბიუროკრატიული აპარატი პარტ.აქტივის დასაქმების სფეროა, და ეს ტვირთი ხშირად პროფესიონალი და კომპეტენტური საჯარო მოხელეების ზურგზე გადადის. ადგილობრივი თვითმმართველობის რეფორმაზე და რეალურ დეცენტრალიზაციაზე პროგრამაში არ არის წარმოდგენილი არც ერთი ინიციატივა,“-განმარტა ნაცვლიშვილმა.
მისივე თქმით, პროგრამა, იმ ნაწილებში როგორიცაა ძალოვანი უწყებები, პროკურატურა, სასამართლო - კრიტიკასაც ვერ უძლებს
„საერთოდ არ გვხვდება ახალი ამბიციური ხედვა საქართველოს რეგიონული და მსოფლიო პოლიტიკის ეპიცენტრში დასაბრუნებლად, ან პროაქტიური საგარეო პოლიტიკის შექმნის სურვილი, რომელსაც ქვეყნის განვითარება უნდა დაეფუძნოს.
საგარეო სამოქმედო გეგმაშიც, ჩვენ ვისმენთ, რომ უნდა ჩამოყალიბდეს მოლაპარაკების ახალი ფორმატები, რეგიონში განვითარებული ახალი საფრთხეებისა და გამოწვევების პასუხად, მაგრამ ვერ ვისმენთ, თუ კონკრეტულად რა ტიპის ფორმატებზეა საუბარი. მსგავსი ბუნდოვანება ბადებს სერიოზულ კითხვებს, მითუმეტეს საქართველოს პრეზიდენტის მიერ გაჟღერებული არაერთგვაროვანი განცხადებების ფონზე კავკასიის საერთო ფორმატის თაობაზე.
და ბოლოს, ის რომ ჩვენ უარს ვამბობთ გაყალბებული არჩევნების შემდეგ პარლამენტში შესვლაზე, არ ნიშნავს იმას, რომ ხელისუფლებას შეუძლია მშვიდად იყოს. საქართველოს მოქალაქეების ინტერესებისთვის, „ლელო“ განახორციელებს მთავრობის და პარლამენტარების საქმიანობის კონტროლს და მხილებას, ნუ ექნებათ კომფორტში ყოფნის მოლოდინი,“- აცხადებს ნაცვლიშვილი.