ვანო მერაბიშვილის პოლიტიკურ მომავალს ვუსამძიმრებ ყველა იმ გაერთიანებას, სადაც ის მივა. მიუხედავად კრავის ნიღბისა, რომელიც მან მოირგო, იგი არის „პოლიტიკური კორონავირუსი“ ოპოზიციისთვის“, ეს იურისტ ანა დოლიძის შეფასებაა შინაგან საქმეთა ყოფილ მინისტრ ვანო მერაბიშვილზე.და აღნიშნავს, რომ შს ყოფილი მინისტრი საკუთარი თავის რეაბილიტაციას შეეცადა.

ანა დოლიძე აცხადებს, რომ ვანო მერაბიშვილს აქვს სერიოზული ბერკეტები, აიყვანოს მძევლად ოპოზიცია, რადგან პირველ წყაროდან ფლობს ნებისმიერ ინფორმაციას იმ დანაშაულების შესახებ, რომელიც ჩადენილი იყო „ნაციონალური მოძრაობის“ დროს.

მისი თქმით, ვანო მერაბიშვილი არის ოქროს მოწმე და ამ ცოდნის მეშვეობით მას შეუძლია, მძევლად ჰყავდეს აყვანილი ოპოზიცია - „ნაციონალური მოძრაობა“, „ევროპული საქართველო“.

ანა დოლიძის თქმით, ისინი ვერ შეძლებენ საკუთარი თავი გაითავისუფლონ იმ ცოდნისგან, რომელიც ვანო მერაბიშვილს აქვს.

„მოკლედ, ვანო მერაბიშვილი არის „პოლიტიკური კორონავირუსი“ და ნებისმიერი პოლიტიკური გაერთიანება, სადაც ის მივა, ავტომატურად საკუთარ კისერზე აიკიდებს უზარმაზარ ლოდს“, - აცხადებს ანა დოლიძე.

„დაახლოებით 14-15 წლის წინ პირადად ვიყავი ჩართული და ვიბრძოდი კბილებამდე შეიარაღებული ვანო მერაბიშვილის წინააღმდეგ. ვთვლიდი, რომ მასთან ბრძოლა დავასრულე 2012 წლის ოქტომბერს, როდესაც ის გავისტუმრეთ ხელისუფლებიდან.

დღემდე კარგად მახსოვს გირგვლიანის, ვაზაგაშვილის, ბუტა რობაქიძის საქმეები. პირადად ვიყავი მომსწრე იმ სადამსჯელო ოპერაციისა, რომელიც ვანო მერაბიშვილმა ჩაატარა ახალციხის უნივერსიტეტის რექტორის მერაბ ბერაძის წინააღმდეგ, რომელმაც მის მეუღლეს არ მისცა ყალბი დიპლომი. მახსოვს 2005, 2006, 2007 წლებში არაერთი ე.წ ლიკვიდაცია - ამ ტერმინს იყენებდნენ, რადგან არ უნდა გვეგრძნო, როგორ ხოცავდნენ ხალხს ქუჩაში. ეს ფაქტები არ მაძლევს საშუალებას მშვიდად მოვეკიდო და უბრალოდ იგნორი გავუკეთო მერაბიშვილის მიერ საკუთარი თავის რეაბილიტაციის მცდელობას“, - აღნიშნავს ანა დოლიძე Facebook-ზე ვიდეომიმართვის დროს.

ანა დოლიძის თქმით, „ტყუილად არ იყვნენ საპრეზიდენტო არჩევნებზე „ქართული ოცნების“ მიერ სახელდახელოდ დამზადებულ ფირნიშებზე გამოსახული ვანო მერაბიშვილი, მეგის ქარდავა და სხვა რეპრესიული მანქანის შემქმნელები.

„ეს ისტორიები, რომლითაც დღესაც სარგებლობს მმართველი გუნდი, კვლავ წამოვა წინ მომავალ არჩევნებზე. ამიტომ, სადაც არ უნდა მივიდეს ვანო მერაბიშვილი, ის პოლიტიკური გაერთიანება აიკიდებს „პოლიტიკურ კორონას“, რაც, რა თქმა უნდა, ძალიან სასარგებლო იქნება „ქართული ოცნებისთვის“. ახლა ელოდებიან, სად მივა ეს დაქოქილი ნაღმი“, - აღნიშნავს ანა დოლიძე.

imedinews.ge